Creative Space Design

"ဟင်းလင်းခွင် နှင့် အတွေး"

2011-09-22T10:46:00.003+08:00

"ဟင်းလင်းခွင် နှင့် အတွေး"

ချိုးနှစ်ကောင်၊
ထနောင်းပင်ညီနောင်က၊ လွမ်းအောင်ကူချွဲ။
ပန်းတော်ဖြူ၊ ပင်မြက်နေဇာထူလှတယ်၊
ဖိုးတောင်သူ့တဲ။

အညာ ကျေးလက်ဒေသနေ တောင်သူလယ်သမားကြီးတစ်ဦး၏ လယ်တဲလေးကို ရေးဖွဲ့ထားသော ဒွေးချိုး ကဗျာလေးသည် ယနေ့တိုင် စိတ်အတွေးထဲ စွဲထင်နေဆဲ။ ထနောင်းပင်ညီနောင်ထံမှ ချွဲချွဲနွဲ့နွဲ့ ကူလိုက်သော ချိုးလေးနှစ်ကောင်၊ ထူထူဆိုင်းဆိုင်း ပေါက်ရောက်နေမည့် ပဒေါ်မြက်အုပ်များနှင့် လယ်တဲငယ်ငယ်လေးအကြောင်းကို ကဗျာလေးက ပြောပြနေသည်။ ကဗျာလေးကို ရွတ်လိုက်တာနှင့် လယ်တဲငယ်ငယ်၊ ထနောင်းညီနောင်နှင့် ချိုးမောင်နှံတို့ဖြင့် အညာဒေသ ဟင်းလင်းခွင်လေး၏ အသွင်အပြင်ကို မြင်ယောင်မိစေသည်။ တစ်နည်းအားဖြင့် ခေတ်ကို ထင်ဟပ်နေသော၊ အချိန် ကာလ နေရာ ဒေသ တို့ကို ပြောပြောနေသော ကဗျာလေးဖြစ်သည်။ ရိုးရှင်းသော ပန်းချီကားတစ်ချပ်ကို စိတ်ဝိဉာဉ်တွင် ခံစားတွေ့နိုင်သည်။ သို့ဆိုလျှင် ဟင်းလင်းပြင် တစ်ခုအတွင်း ဖြစ်ပေါ်လာသော အတွေးအမြင်၊ အသိ၊ အယူအဆ၊ တန်ဖိုးထားမှု၊ နားလည်မှု၊ ယုံကြည်မှု၊ လက်ခံလိုက်မှု၊ အသုံးချမှု၊ လွင့်မြောမှု၊ အိပ်မက်ဆန်မှု၊ ထိတွေ့မှု များသည် စာပေ၊ ဂီတ အနုပညာများဖြင့် ပုံတူကူးရေးနိုင်သည်လား။ ပန်းချီ၊ ပန်းပုများဖြင့် အသွင်ပြောင်း ထုဆစ်နိုင်သည်လား။ ဟင်းလင်းခွင်တို့အား ဖန်တီးအလှဆင်မှုသည် အနုပညာလေလား၊ အတတ်ပညာလေလား။ ရိုးရှင်းသော ကဗျာလေးအပေါ် အတွေးနယ်ချဲ့မှုများစွာဖြင့် စိုးမိုးသွားမိသည်။ သေချာသည်မှာ ခံစားသိဖြင့် သိနိုင်သော အနုပညာ၊ လိုအပ်မှုဖြင့် ဖန်တီးနိုင်သော အတတ်ပညာများသည် လူသားတို့၏ နှလုံးအိမ်ကို အစဉ်ထာဝရ စွဲဆောင်နေမည်သာ။

_._._._._._._._._._._._._._._._.

"ဟင်းလင်းခွင် နှင့် ရှင်းလင်းဖြေဆိုမည့် ပြဿနာ"

Fine Arts အနုပညာတို့သည် သူ့ဆန္ဒ သူ့သဘောဆောင်ပြီး ခံစားမှုကို လွတ်လပ်စွာ ဖန်တီးခွင့်ရှိသည်။ အနုပညာသည် သူ့ဘဝ၊ ခံစားမှုကို ဖော်ထုတ်ခြင်းသည် သူ့အလုပ်ဖြစ်သည်။ သူ၏ နောက်ဆုံး workdone, သူ့ဖန်တီးမှု၏ နောက်ဆုံးအဖြေသည် သူတည်း တစ်ယောက်နှင့်သာ သက်ဆိုင်နေသည်။ ဟင်းလင်းကို ဖွဲ့ဆိုသူ ဒီဇိုင်းပညာရှင်တို့အတွက်မှု သူ၏ တစ်သီးပုဂ္ဂလိက ဆန္ဒထက် Client (အလုပ် အပ်နှံသူ) ၏ စိတ်ကူးနှင့် လိုအပ်မှုကို စနစ်တကျ အဖြေရှာ၍ လူအများလက်ခံအောင် ဖန်တီးပေးမှုသည် သူ့ဘဝ၊ သူ့အလုပ်၊ သူ့အနုပညာ ဖြစ်သည်။ ထို့အတွက် ဟင်းလင်းခွင် (Space) တစ်ခုကို ဖန်တီးပြုလုပ်ခြင်းသည် ပြဿနာတစ်ခုအား ရှင်းလင်းဖြေဆိုခြင်းနှင့် သဏ္ဌာန်တူပေသည်။ ဟင်းလင်းတစ်ခု၏ ထုထည်အတွင်း ကျွန်တော်တို့ လှုပ်ရှားသွားလာနေထိုင်သည်။
ပုံသဏ္ဌာန်အမျိုးမျိုးကို ကြည့်မြင်ခံစားလိုသည်။ နှစ်လိုဖွယ် အသံအမျိုးမျိုးကို ဖန်တီးနားဆင်လိုသည်။ လေပြေလေညင်းလေးများ ထိကပါး ရိကပါး ကျီစားတာကို ခံစားနိုင်လိုသည်။ နေရောင်ခြည်မှ တဆင့်ရရှိသော နွေးထွေးသော အထိအတွေ့ကို လိုလားသည်။ အချိန်တန် ပွင့်လန်းလာသော့ ပန်းရနံ့လေးများကို ခံစားလိုသည်။ ထို့အတွက် ဒီဇိုင်းပြုလုပ်ခြင်းသည် ဟင်းလင်းပြင်အတွင်း အသုံးပြုသူများ၏ အဆင်ပြေချောမွေ့မှု , အသုံးဝင် အကျိုးရှိမှု (functional improvement) ၊ ထို Space ၏ လှုပ်ရှားသက်ဝင်မှု , သာယာငြိမ်းချမ်းမှု (Aesthetic enrichment ) နှင့် စိတ်အတွေး၏ တောင့်တမှုကို ဖြည့်စွက်ပေးမှု (Psychological enhancement) တို့အား စနစ်တကျ အဖြေရှာ ဖော်ထုတ်ခြင်းဟု ဆိုရပေမည်။ Space သည် ဒီဇိုင်နာ တစ်ယောက်အတွက် ပင်မ ပစ္စည်းတစ်ခု၊ Space တစ်ခုအတွင်း နေထိုင်သူများ၏ လှုပ်ရှားမှု၊ သဘောထား၊ ခံစားမှုနှင့် ထိုသူတို့၏ သီးသန့် ဖြစ်တည်မှုတို့အပေါ် အခြေတည်၍ လိုအပ်ချက်များကို အဖြေရှာခြင်းသည် ဒီဇိုင်နာတစ်ယောက် လိုက်နာရမည့် အခြေခံ သဘောတရားပင် ဖြစ်သည်။
ဒီဇိုင်းတစ်ခုသည် ပြည့်စုံသည်။ အကြောင်းမှာ လိုအပ်ချက်များအားလုံး ချောချောမွေ့မွေ့ရရှိ၍ ဖြစ်ပေမည်။ ဒီဇိုင်းတစ်ခုသည် ကောင်းမွန်မည်။ အကြောင်းမှာ စီးပွားရေးအရ တွက်ခြေကိုက်၍ ကြာရှည်ခံ အကျိုးရှိသောကြောင့် ဖြစ်ပေသည်။ ဒီဇိုင်းတစ်ခုသည် နှစ်လိုဖွယ် ရှိသည်။ အကြောင်းမှာ စိတ်အတွေး၏ တောင့်တမှုကို ဖြည့်စွက်ပေးနေသည်။ ဒီဇိုင်းတစ်ခုသည် အဓိပ္ပါယ်ရှိသည်။ အကြောင်းမှာ ဖော်ပြလိုသော သဘောထားနှင့် အချိန်ကာလတို့ကို ညွှန်းဆိုနေသည်။ သို့သော် ဟင်းလင်းခွင်တစ်ခုအတွက် ပြီးပြည့်စုံသော အဖြေတစ်ခုသည် မည်သည့်အခါမှ ရရှိမည် မဟုတ်ချေ။ လိုအပ်မှုနှင့် ဖန်တီးလိုမှုတို့ကိုသာ အချိုးညီညီ အကောင်အထည် ဖော်ဆောင်ခြင်းသည် ဒီဇိုင်းတစ်ခု ဖန်တီးခြင်း ဖြစ်ပေသည်။ ဒီဇိုင်းတစ်ခုသည် တစ်နည်းအားဖြင့် ဟင်းလင်းခွင် တစ်ခုအတွက် ရှင်းလင်းဖြေဆိုရမည့် ပြဿနာတစ်ခုပင် ဖြစ်ပေသည်။

_._._._._._._._._._._._._._._._.

"ဟင်းလင်းခွင် နှင့် ဒီဇိုင်းပညာရှင်"

တိုးတက်လာသော လူမှုပတ်ဝန်းကျင် အသိုင်းအဝိုင်းနယ်ပယ်တွင် လူသားများသည် မိမိတို့ နေထိုင် လုပ်ကိုင်နေရသော အဆောက်အဦးများအား အမိုးအကာ လုံရုံဟူသော အနေအထားမျိုးတွင် ရောင့်ရဲတင်းတိမ် နေခြင်း မရှိတော့ပဲ တစ်နေ့ထက် တစ်နေ့၊ တစ်ရာသီထက် တစ်ရာသီ ပိုမိုဆန်းသစ်သော အဆင်တန်ဆာ ဒီဇိုင်းများဖြင့် ဖန်တီးပြုလုပ်ရန် ဆန္ဒရှိလာကြသည်။ ရှေးခေတ် အတီတေကလည်း ရှေးခေတ်အလျောက်၊ တိုးတက်သော နည်းပညာခေတ်တွင်လည်း နည်းပညာ ဖန်တီးမှုများအလျောက် လူသားတို့၏ လိုအပ်ချက် စိတ်ဆန္ဒတို့မှာလည်း တစ်ဆထက်တစ်ဆ မြင့်မားလာကြပေသည်။ စင်စစ်အားဖြင့် ထိုအရာသည် ခေတ်၏ လိုအပ်ချက် မဟုတ်၊ စနစ်အတွက် လိုအပ်ချက်မဟုတ်၊ "လူ"ဆိုသော အသစ် အသစ်ကိုမှ ခုံမင်တတ်သော သဘောထားကြောင့် ဖြစ်ပေသည်။ လူသားတို့၏ အသစ်၊ အသစ်သော ဆန္ဒများနှင့် လိုလားချက်များအတွက် ထိုထို လိုအပ်ချက်များကို ဝန်ဆောင်မှု အပြည့်အဝ ပေးနိုင်ရန် ကြိုးစားခြင်းသည် ဒီဇိုင်နာများ၏ အဓိက တာဝန်ပင် ဖြစ်သည်။
ဒီဇိုင်နာနှင့်အတူ လုပ်ငန်းခွင်၏ စံသက်မှတ်ချက်များနှင့် ကိုက်ညီအောင် လုပ်ဆောင်ပေးနိုင်သော ကျွမ်းကျင်လုပ်သားများ လိုအပ်လာပါသည်။ ဆန်းသစ်မှုသည် ကွဲလွဲမှု မဟုတ်၊ ကွဲလွဲခြင်းသည် ဆန်းသစ်ခြင်း မမည်။ နေရာ၊ ဒေသ၊ ကာလအလိုက်
ကွဲပြားခြားနားလာသော လူသားတို့၏ စိတ်ဆန္ဒကို အပြည့်ဝဆုံး ဖြည့်ဆည်းပေးရန် ဟန်ချက်ညီလှုပ်ရှားနိုင်သော၊ စနစ်တကျ လေ့လာသုံးသပ်မှုများဖြင့် ရှုထောင့် အဖုံဖုံမှ အတူတကွ ဝန်ဆောင်မှု ပေးနိုင်သော ပညာရှင်များ အတူတကွ ပေါင်းစည်းလုပ်ကိုင်ရန် လိုအပ်လာပါသည်။ လုပ်ငန်းရှင်များမှာလည်း လုပ်ငန်းခွင် စံသတ်မှတ်ချက်များနှင့် ကိုက်ညီသော အဖွဲ့အစည်းများအား ရှာဖွေလာတတ်ကြသည်။ ၄င်းတို့သည် တိုးတက်လာသည့် အမြင်တို့နှင့်အညီ လူသားတစ်ဦးချင်းစီ၏ သီးသန့် ရွေးချယ်ခြင်းဟူသော သဘောထားကွဲလွဲခြင်းများကို သည်းခံညှိနှိုင်းကာ သဘာဝပတ်ဝန်းကျင်နှင့် လိုက်လျောညီထွေမှုရှိသော အဆောက်အဦးများကို ဖန်တီးပေးနိုင်ကြမည့်၊ ယခုလက်ရှိ ပြောင်းလဲနေသော နည်းပညာရပ်များအား အမြဲတစ်စေ တီထွင်ကြံဆနေမည့် ဒီဇိုင်းပညာရှင်များကိုသာ လိုလားလာသည်။ ထိုအရာများသည် ဒီဇိုင်းပညာရှင်များအတွက် ပြောင်းလဲနေသော ခေတ်စနစ် အခြေအနေများကို မျက်ခြေအပျက်မခံပဲ အဆောက်အဦးတို့၏ ပြောင်းလဲခြင်းပုံစံ၊ ဖွဲ့စည်းတည်ဆောက်ပုံ ဆန်းသစ်မှု၊ ထပ်မံဖြည့်စွက်မည့် ပစ္စည်းများကို လူသားတို့၏ လိုအပ်ချက်နှင့် ထပ်တူကျအောင် အစဉ်တစိုက် ကြိုးပမ်းနေသင့်ကြောင်း ဖိအားပေးလျှက်ရှိသည်။ ထို့အပြင် ဒီဇိုင်းပညာရှင် တစ်ယောက်သည် တစ်ခုခုကို ဖန်တီးသောနေရာတွင် တစ်ထပ်တည်းဖြစ်နေသော ရှုခင်းကိုပင် အမြင် ပြောင်းလဲပေးနိုင်စွမ်း ရှိရမည့်အပြင် စွန့်ပစ်ပစ္စည်းထဲမှပင် ဆန်းပြားသော အသစ်အဆန်းတစ်ခု အသွင်ကို ဖန်တီးကာ အစားထိုး အသုံးပြုနိုင်အောင် ဖန်တီးမှုများ လိုအပ်လာသည်။
ဒီဇိုင်းဖန်တီးမှု အတတ်ပညာသည် အလျား၊ အနံ၊ အမြင့် ဟူသော ထုထည် ပမာဏများနှင့် ဆက်စပ်တွေးတော ကြံဆခြင်း ဖြစ်သော်လည်း အချိန်ဟူသည့် အတိုင်းအတာ ပမာဏနှင့် အဆောက်အအုံများ၏ ဆက်စပ်မှုကိုလည်း ထည့်သွင်းစဉ်းစားနိုင်ရမည်။ သတ်မှတ်ထားသော အချိန်ကာလအတွင်း သင့်လျော်သော ဒီဇိုင်းကို တီထွင်နိုင်ပေးရမည်။ ထို့အတူ နေထိုင်သည့် ကာလတစ်လျောက် Client ၏ လက်ခံမှုကို ရရှိနေအောင် လုပ်ဆောင်ပေးခဲ့ရမည်။ ဟင်းလင်းကို ဒီဇိုင်း ဖန်တီးသူ၏ အမြင်၊ ကြည့်ရှုခံစားသူနှင့် ထိုဖန်တီးသော ဟင်းလင်းအတွင်း သက်ဝင်နေထိုင်သူတို့၏ တုံ့ပြန်မှုသည် အချိန်တစ်ခုနှင့်အတူ စီးဆင်းနေပေမည်။ အဆောက်အအုံတစ်ခု၏ ထင်ရှားသော လက္ခဏာ အစိတ်အပိုင်း ( ၆ )ရပ် ဖြစ်သည့် တည်နေရာ၊ ဖွဲ့စည်းတည်ဆောက်ပုံ၊ ကိုယ်ထည်အခွံ၊ ဝန်ဆောင်မှု၊ နေရာလွတ်နှင့် စီမံချက်တို့ကို ပြည့်ဝစွာ နားလည်ရန် လိုအပ်ပေသည်။ ဒီဇိုင်းပညာရှင်များသည် နေရာလွတ်လပ်မှုနှင့် စီမံချက်အနေအထားတို့ကို အာရုံစူးစိုက်နေစဉ် ကျန်သော အချက်အလက်များအတွက် ကျိုးကြောင်းခိုင်လုံစွာ အကျိုးသက်ရောက်မှု ရှိစေရန်ကိုလည်း ထည့်သွင်းစဉ်းစားရမှာ ဖြစ်ပေသည်။ ထိုသို့ စဉ်းစား တွေးခေါ်မှုများသည် လက်တွေ့ ဆောက်လုပ်ရေး လုပ်ငန်းခွင်တွင် အကောင်အထည် ဖော်နိုင်ရန်အတွက် အမြဲတစ်စေ လေ့လာ လေ့ကျင့်ထားရန် လိုအပ်ပါသည်။ ဒီဇိုင်းပညာရှင်တစ်ယောက် အနေဖြင့် ၅နှစ်စာအတွက် ပြသနာများကို ကြိုတင်တွေးတော အဖြေရှာဖွေရာတွင် ၅မိနစ်အတွင်း ဖြေရှင်းလိုက်သော ဖြစ်ကတတ်ဆန်း လုပ်ရပ်မျိုးကိုလည်း ရှောင်ကြဉ်သင့်ပေသည်။
ဒီဇိုင်းပညာရပ်ကို လေ့လာသောအခါမှာ ပညာရပ်များ၏ သီအိုရီ သဘောတရားနှင့် ဒီဇိုင်းတွေကို လေ့လာရသကဲ့သို့ ဒီဇိုင်နာများထံမှလည်း ထိုသူတို့၏ ဒီဇိုင်းအတွေးအခေါ်များကို အပြန်အလှန် လေ့လာရကြောင်း ဖတ်မှတ်ဖူးပါသည်။ ဒီဇိုင်နာတစ်ဦးသည် အခြေခံ ဒီဇိုင်းသဘောတရားများကို သီအိုရီများမှလည်း ဖော်ထုတ်လေ့လာရသည်။ အခြား အခြားသော ဒီဇိုင်နာများ၏ ဖန်တီးမှုများမှလည်း ထပ်ဆင့်လေ့လာရသည်။ ဒီဇိုင်းပညာရှင် တစ်ယောက်သည် စွယ်စုံရသော အတတ်ပညာရှင် တစ်ယောက်ဖြစ်ရန် မလိုအပ်သော်လည်း မိမိ၏ ဒီဇိုင်းနှင့် ပတ်သက်၍ အရာရာ အားလုံးကို ခြုံငုံ သုံးသပ်တတ်နိုင်ရပေမည်။ တိုးတက်နေသော ယနေ့ကမ္ဘာပေါ်တွင် လူဦးရေ တိုးတက်လာသည်နှင့်အမျှ အဆောက်အဦးများ ပြွတ်သိပ်လာမှုကြောင့် လက်တွေ့အသုံးကျသော အယူအဆ၊ သဘောတရားနည်းများကို စဉ်းစားတွေးခေါ်နိုင်မှသာ ထူးချွှန်သော ဒီဇိုင်းပညာရှင်တစ်ယောက် ဖြစ်နိုင်ပေမည်။

_._._._._._._._._._._._._._._._.

"ဟင်းလင်းခွင် နှင့် နေထိုင်မှု အနုပညာ"

ဟင်းလင်းကို ဖွဲ့ဆိုသူ ဒီဇိုင်နာတို့အတွက် ဒီဇိုင်း၏ အမှန်တရားသည် စီးပွားရေးဆန်သော အနုပညာတစ်ခု ဖြစ်ကောင်းဖြစ်မည်။ လိုအပ်ချက်ကို အဖြေရှာရမည့် ပြဿနာတစ်ခုဖြစ်ကောင်းဖြစ်မည်။ ဒီဇိုင်နာသည် ဒီဇိုင်းအခြေခံ သဘောတရားများ (Element of Design) ကိုလည်း သေချာ နားလည် အသုံးချနိုင်ရမည်။ မိမိ အသုံးပြုမည့် material များ၏ သွင်ပြင် (texture) ကိုလည်း ဂဃဏန သိထားရမည်။ ဟင်းလင်း (Space) ကို စနစ်တကျ အသုံးချနိုင်ရမည်။ အမြင်လှည့်စားမှုအပေါ် ပြောင်းလဲသွားတတ်သည့် အခြေခံ ပြောင်းလဲခြင်းများကိုလည်း ကျွမ်းကျင်ရမည်။ နရီ၊ ဟန်ချက်နှင့် အချိုးကျမှုတို့ကိုလည်း ကစားနိုင်ရမည်။ သူဖန်တီးသော ဒီဇိုင်းသည် အနုပညာတစ်ခု ဖြစ်သလို ထုတ်ကုန်တစ်ခုလည်းဖြစ်ကြောင်း လက်ခံထားရပေမည်။
သဘာဝ၏ အလှအပသည်လည်း ဟင်းလင်းခွင်တစ်ခုအတွင်း၊ လူသားတို့၏ ဖန်တီးဖွဲ့တည်မှုသည်လည်း ဟင်းလင်းခွင်တစ်ခုအတွင်း။ တေးဆိုနေသော လေနုအေး၊ နွေးထွေးသော နေရောင်ခြည်၊ ယိမ်းနွဲ့နေသော ပန်းခင်းများနှင့် မွှေးထုံရစ်သော ပတ်ဝန်းကျင်သည် သဘာဝ၏ ရသကို ဖွင့်ဟနေသည်။ လင်းလက်သော နီယွန်မီးများနှင့် ကြည်လင်သော မှန်ချပ်များအကြား ရပ်တည်နေသော စက်မှုထုတ်လုပ်မှု ထုထည်တစ်ချို့သည် လူသားတို့၏ ဖန်တီးမှုတစ်ချို့ကို ပြသနေသည်။ နေရောင်ခြည်အလင်းသည် အချိန်ကာလအလိုက် အမှိန်အဖျော့ ပြောင်းလဲလျက်။ နီယွန်မီး၊ မာကျူရီမီးတို့၏ အလင်းသည်လည်း ဖန်တီးမှုအလိုက် အတိုးအနှုတ် ပြောင်းလဲလျက်။ လိုအပ်မှုနှင့် စိတ်ကူးဆန္ဒတို့ကို အချိုးညီညီ ပေါင်းစပ်ထားသော ဟင်းလင်းခွင်တို့အား ဖန်တီးမှုသည် အနုပညာတစ်ခုလည်း ဖြစ်သည်။ အတတ်ပညာလည်းဖြစ်သည်။ တစ်နည်းအားဖြင့် Applied Art (သို့) အသုံးချ အနုပညာ။ ထို ဟင်းလင်းခွင်တို့အား ဖန်တီးသောသူများသည် Technician (သို့) Designer (သို့) Artist (သို့) နေထိုင်မှုတစ်ခုအား ဖန်တီးသော အနုပညာခံစား အတတ်ပညာရှင်များ ဟု ခေါ်ဝေါ်ပညတ်ရမည် ဖြစ်ပါသည်။
“နေလုံးရယ်နီ တိမ်ပန်းချီ နေသွေးနဲ့၊ နတ်ရေးသည်သို့။ ဒီအကျပေမို့ အလှ လတာပြင်က၊ ကျူရိုးရှင်လှေကလေးနဲ့ မျှော်ငေးလို လို့။” ဆည်းဆာချိန် တိမ်ပန်းချီကားသည် နေသွေးနှင့် နတ်ရေးထားလေသည်လား။ ဒီရေလည်း ကျလာပြီမို့ ပေါ်လာသော လတာပြင်မှာ ကဗျာအတွင်းမှ ကျူရိုးရှင်သည် နတ်ရေးသော တိမ်ပန်းချီကို လှေတစ်စင်းနှင့် မျှော်ငေးရသည်ကို နှစ်သက်ကောင်း နှစ်သက်မည်။ အချို့ ကျူရိုးရှင်တို့ကတော့ဖြင့် သာသာယာယာ ညနေခင်းမျိုးတွင် လတာပြင်၏ အစွန်းတစ်ဖက်နား ငါးပျံတစ်ချို့က ညှာညှာတာတာမရှိ၊ ဘယ်ပြောင်းညာပြန် ဂျွမ်းထိုးလိုက်၊ ဘုတ်မက ခုနှစ်သံချီအောင် လွမ်းတေးတွေဆိုလိုက် လုပ်နေသည်ကိုမှ ခံစားလိုကောင်း ခံစားလိုလိမ့်မည်။ ဆရာ ဇော်ဂျီကတော့ အဆုံးသတ် သူ့ကဗျာမှာ “အိုအချင်း ကျူရိုးရှင်။ သူ့မူယာသူ့အတင်း၊ မင်းဆိုခဲ့စဉ်။ မင်းကိုယ်လဲ မင်းပင်လျင်၊ ဘာထင်လို့လေလဲ။ မဗေဒါစုန်ဆန်လမ်းမှာ ၊ ပန်းခဲ့သည်ပဲ။” ဟု ဆိုခဲ့သည်။ ဟင်းလင်းကို ဖန်တီးခြင်းသည်လည်း
ကျူရိုးရှင်နှင့် အလား သဏ္ဌာန်တူပေတော့သည်။ အကန့်အသတ်မဲ့သော ဒီဇိုင်းလောကအတွင်း စုန်ဆန်ကူးခတ်ရင်း မောပန်းလိုက်၊ မိမိ ဖန်တီးမှုလေးအပေါ် ပြန်လည်ကြည့်ရှုရင်း ကျေနပ်ပီတိဖြစ်လိုက်နှင့် ကိုယ်တိုင်လည်း ကူးခတ်ရပေဦးမည်။ သူတပါး ဖန်တီးမှုများကိုလည်း လေ့လာခံစားရင်း မုဒိတာထား ကျေနပ်ရပေဦးမည်။

Written by DESIGN ideology

Reference
Interior Design (Arch.08012) lecture Notes
Interior Design Handbook of Professional Practice by Cindy Coleman (Mimarlìk)
Interior Deisgn Illustrated 1987 by Francis D.K.Ching

_._._._._._._._._._._._._._._._.

သဘာဝမှ ပုံသဏ္ဍာန်များ(Shapes from nature)

2011-05-15T09:37:00.003+08:00

သဘာဝမှ ပုံသဏ္ဍာန်များ(Shapes from nature)

ဗိသုကာ ဆိုင်ရာ ထုသွင် Forms များနှင့် ပုံသဏ္ဍာန် Shapes များဖြစ်တဲ့ အမျိုးမျိုးသော Cone, Cube, cylinder, sphere နှင့် pyramid အစရှိတဲ့ ပုံများအတွက် သဘာဝလောကကြီးဟာ စံပြုစရာ Model တစ်ခုလိုပါပဲ။ ထို့အပြင် ဂျီသြမေတြီ ပုံမဟုတ်တဲ့ ဗိသုကာ Forms များအတွက်လည်း သဘာဝတရားကြီးသာ အတုယူစရာ၊ နမူနာယူစရာ၊ Model ဖြစ်နေပါတယ်။ (ယူကလစ်ဒီရမ်)
သဘာဝတရားဆိုတာ ဘာများပါလိမ့် ဆိုတဲ့ အမေးများရှိလာခဲ့မယ်ဆိုရင်... ဒီနေရာမှာ ရုပ်ဝတ္တုပိုင်း အားဖြင့် လူသားတို့ ဖန်တီးထားတာ မဟုတ်တဲ့ ကမ္ဘာမြေပြင်နှင့် ပတ်ဝန်းကျင်ရှိ အစိတ်အပိုင်း အားလုံးကို ဆိုလိုပါတယ်။ ဥပမာ ဆိုရရင် နေ၊ လ၊ နက္ခတ် တာရာများ အပါအဝင် ကောင်းကင်ပြင်ကြီး နှင့် မိုးသား တိမ်လိပ်၊ တိမ်စိုင်များ။ ကမ္ဘာမြေပြင်ပေါ်ရှိ သစ်ပင်၊ ပန်းပင်၊ သစ်သီး၊ သစ်ဥ၊ သစ်ရွက်၊ သစ်ဖက် အစရှိတဲ့ အရာများ၊ ကျောက်တုံး၊ ကျောက်စိုင်၊ ကျောက်ခဲ အစရှိတဲ့ အရာများ၊ ပင်လယ်သမုဒ္ဒရာအတွင်း မှီတင်းနေထိုင်ကြတဲ့ ခရုခွံ၊ ကမာခွံ အစရှိတဲ့ သက်ရှိ နှင့် သက်မဲ့ရုပ်ကြွင်းများ။ လူသားနှင့် သက်ရှိတို့၏ ဖန်တီးမှုကြောင့် မဟုတ်ပဲ ဆန်းကြယ်သော သဘာဝ ဖြစ်စဉ်အရ အလိုအလျှောက် ဖြစ်ပေါ်တည်ရှိနေတဲ့ အထက်ပါ အရာအားလုံးပါပဲ။
အဲဒီလို သဘာဝ ပစ္စည်းတွေကနေ ကျနော်တို့အတွက် သစ်ဆန်းတဲ့ ဒီဇိုင်းတွေ ဖန်တီးနိုင်လာပါတယ်။ သေးငယ်တဲ့ အရာတွေကို အနီးကပ်လေ့လာကြည့်ခြင်း၊ ကြီးမားတဲ့ အရာတွေကို ဝေးကွာတဲ့ နေရာကနေ ကြည့်ခြင်း အစရှိတဲ့ လုပ်ဆောင်မှုတွေကနေ Shape, color, texture နှင့် Form အစရှိတဲ့ အရာတွေအတွက် အတွေးအမြင်တွေ ပုံဖော်ရရှိနိုင်ပါတယ်။

ကျနော်တို့ရဲ့ အင်္ကျ ီအဝတ်အစားများပေါ်သို့ကျရောက်လာတဲ့ နှင်းပွင့် နှင်းစက်ကလေးများကို မှန်ဘီလူးဖြင့် အဆချဲ့ကြည့်မည်ဆိုလျှင် အဲဒီနှင်းပွင့်လေးတွေဟာ တစ်ခုနှင့် တစ်ခု မတူညီပေမယ့် တူညီတဲ့ သဏ္ဍာန်ရှိနေတာကို တွေ့နိုင်မှာပါ။ ဥပမာဆိုရရင် ခြောက်ထောင့် ကြယ်ပုံစံကဲ့သို့သော ပုံစံလေးများ ဖြစ်ပေါ်နေတတ်ပါတယ်။ အဲဒီပုံလေးတွေဟာ ဗဟိုကနေ အပြင်ကို ဗဟုဂံပုံ အချိုးညီ ဖြာထွက်နေတဲ့ ပုံများလည်း ဖြစ်နေပါမယ်။ အဲဒီလို နှင်းပွင့် သဏ္ဍာန်လေးလိုပဲ ၁၂ ရာစုအလယ်ပိုင်းက Gothic cathedrals ဂိုးသစ် ဘုရားကျောင်းများမှာ (နှင်းဆီ ပြူတင်း) Rose windows များကို တပ်ဆင်ခဲ့ကြပါတယ်။

အောက်ကပုံမှာ ပြထားတဲ့ အီရက်နိုင်ငံမှာရှိတဲ့ Great Mosque of Samarra ဗလီဘုရားရှိခိုး ကျောင်းကြီးရဲ့ ခွေလိမ်ရစ်တတ်သွားသော ခရုပတ်ပုံ နှင့် အမေရိကန်နိုင်ငံ တက္ကဆက်ပြည်နယ် ဒေးလတ်စ် မြို့ (Dalas)ရှိ ဗိသုကာ Phillip Johnson နှင့် John Burgee တို့တည်ဆောက်ထားတဲ့ Thankisgiving square chapel ရဲ့ အပြင်ဒီဇိုင်းနှင့် အတွင်း ဒီဇိုင်းတို့ဟာ သဘာဝတရားက ဖန်တီးထားတဲ့ ပင်လယ်ခရု တစ်ခုရဲ့ သဏ္ဍာကို ရယူတည်ဆောက်ထားခြင်းပါ။

Great Mosque of Samarra

Thankisgiving square chapel

seashells(ပင်လယ်ခရုများ)

အမေရိကန်လူမျိုး အင်ဂျင်နီယာ engineer, စာရေးဆရာ author, ဒီဇိုင်နာ designer, တီထွင်သူ inventor နှင့် စက်မှုစွမ်းအားနှင့် ပြင်းပြင်းထန်ထန် လှုပ်ရှားမှုကို အသားပေးသရုပ်ဖေါ်သော (၂ဝရာစု နှစ်ဦးပိုင်းမှ ) ပန်းချီပန်းပုအနုပညာရှင်(futurist) အစရှိတဲ့ ဂုဏ်ထူးဝိသေသများနှင့် ပြည့်စုံတဲ့ Richard Buckminster “Bucky” Fuller (July 12, 1895 – July 1, 1983) ဟာ အဲဒီလို သဘာဝတရားရဲ့ပုံစံမှာ အိုင်ဒီယာ ရယူပြီး Godesic dome လို့ခေါ်တဲ့ Structure တစ်ခုကို ဒီဇိုင်းပြုလုပ်ခဲ့ပါတယ်။ သူရဲ့ ဒီဇိုင်းဟာ Alveoli cell တွေနှင့် ပုံသဏ္ဍာန် ဆင်တူတယ်လို့ ဆိုပါတယ်။ (ကျနော့အမြင်တော့ ပျားအုံပုံသဏ္ဍာန့် နဲ့ တူတယ်ထင်မိပါတယ်...။) သူ့အနေနဲ့ သူ့ရဲ့ ထုလုံးခုံးသံဗရာခြမ်းကြီးရဲ့ အခြေခံ အလုံးပုံစံရဖို့ ဖြောင့်တန်းတဲ့ ဆောက်လုပ်ရေး Material တွေ အသုံးပြုပြီး အလွယ်တကူ ဆက်သွယ်နိုင်မယ့် နည်းလမ်းတွေ ကြံဆတီထွင် စီစဉ်ပြုလုပ်ခဲ့ပါတယ်။

နောက်တစ်ခုက သြစတြီးယား နိုင်ငံရှိ ဆစ်ဒနီပြဇတ်ရုံ (The Opera House in Sydney, Austrila) ရဲ့ အမိုးတွေဟာ ခရုခွံနှင့် သဏ္ဍာန်တူ တည်ဆောက်ထားပါတယ်။

Andre' Morisseau တည်ဆောက်ထားတဲ့ ပြင်သစ်နိုင်ငံမှာရှိတဲ့ ဈေးတစ်ခုမှာတော့ သမုဒ္ဒရာထဲမှာ တွေ့နိုင်တဲ့ ပင်လယ်ခရုဖြူတစ်မျိုးနှင့် သဏ္ဍာန်တူ ပါတယ်။ အောက်က ပုံတွေကို နှိုင်းယှဉ်ကြည့်ပါ။

White Shell

Market Place ,Royan, France; Andre' Morisseau

ကျောက်တုံးကျောက်ဆောင်တွေဟာ သဘာဝ၀န်းကျင်မှာ အရေးပါတဲ့ အရာတခု ဖြစ်ပါတယ်။ ဒါကြောင့် ကျောက်သားတွေကို အဆောက်အအုံ ဆောက်လုပ်တဲ့ ပစ္စည်းအဖြစ် အသုံးပြုထားတဲ့ အဆောက်အအုံတွေဟာ ပိုပြီး သဘာဝဆန်ပါတယ်။

အပေါ်က ပုံလေးက တော့ ရှေးဦးသဘာဝကျောက်တုံးအိမ် ရိုးရိုးလေး တစ်လုံးပါ။ အဲဒီပုံဟာ အခြေခံ သေတ္တာ တစ်လုံးပုံသဏ္ဍာန်ပဲ ရှိနေပါသေးတယ်။ ကျောက်တုံး မျက်နှာပြင်တွေက တော့ ဘေးက သစ်ပင်တွေ၊ သစ်ကိုင်းတွေ အစရှိတဲ့ သဘာဝ အရာတွေနှင့် ဟာမိုနီကျလိုက်ဖက် တင့်တယ်နေပါတယ်။

အောက်က ပုံမှာ မြင်ရတဲ့ ဆက်ပြာဘူဘောင်းလေးတွေ ဆပ်ပြာမြှုပ်လေးတွေကို တွေ့ဖူးကြမှာပါ။

အဲဒီလိုပဲ ဆပ်ပြာပူပေါင်းလေးတွေ ကို သေချာ ဂရုစိုက်ကြည့်မယ်ဆိုရင် တစ်ခုနှင့် တစ်ခု တူမယောင်နှင့် ကွဲနေတာကို သတိထားမိနိုင်ပါတယ်။

သလင်းကျောက်လို့ ကျနော်တို့တွေ သိနေတဲ့ Crystal ကျောက်ကလေးတွေမှာ သဘာဝမှာရှိတဲ့ ပုံသဏ္ဍာန်တွေ အတော်များများ ရဲ့ ပုံသဏ္ဍာန်ပုံသွင်တွေကို တွေ့နိုင်ပါတယ်။ ဂျီသြမေတြီပုံတွေဖြစ်တဲ့ regular shape, straight line အစရှိတဲ့ ပုံသဏ္ဍာန်လေးတွေ အဲဒီသလင်းကျောက်မှာ တစ်ခုနှင့် တစ်ခု တူညီသယောင်နှင့် မတူညီပဲ ကွဲပြားစွာတွေ့နိုင်ပါတယ်။

ဗိသုကာတွေဟာ သူတို့ရဲ့ ဒီဇိုင်းတွေ ပြုလုပ်ရာမှာ Boxes ပုံသဏ္ဍာန်နှင့်သာ အများအားဖြင့် ပြုလုပ်ကြခြင်းဟာ အဆင်ပြေလွယ်ကူစွာ လုပ်နိုင်ကြလို့ပါ။ T-square၊ Compasses အစရှိတဲ့ ပုံဆွဲ ကိရိယာများနှင့် အလွယ်တကူ အဖြောင့်မျဉ်းများ အမတ်မျဉ်းများ ဆွဲသားနိုင်သောကြောင့် ပြုလုပ်ကြခြင်းလည်း ဖြစ်ပါတယ်။ ဒါကြောင့် များသော အားဖြင့် သဘာဝရဲ့ တည်ဆောက်မှုကြောင့် ဖြစ်ပေါ်လာတဲ့ ပုံသဏ္ဍာန်တွေ မှီးယူခြင်းကို တတ်နိုင်သမျှ လစ်လျှူရှုတတ်ကြပါတယ်။ လွယ်ကူတဲ့ အဖြောင့် ဒီဇိုင်းများဖြင့်သာ အဆောက်အအုံများကို တည်ဆောက်တတ်ကြပါတယ်။

သို့သော်လည်း အထက်က ပုံမှာ ပြထားတဲ့ အီတလီနိုင်ငံ(Italy), Cisternino အနီးနား မှာရှိတဲ့ Rural community, Trulli ဆိုတဲ့ အဆောက်အအုံများ တည်ဆောက်ထားမှုကတော့ တစ်ခုလုံးအတွက် ကျွမ်းကျင်မှုတွေ၊ ကိရိယာတန်ဆာပလာတွေ နှင့် အသိအမြင် နည်းပညာ အသစ်တွေ လို့အပ်နေပါလိမ့်မယ်။ ဒီလိုအိမ်မျိုးတွေကတော့ ပျော့ပြောင်းတဲ့ဟန်၊ မာကြောကြမ်းတမ်းမှုမရှိတဲ့ သဏ္ဍာန်တွေကြောင့်
သဘာဝတရားနှင့် ပိုမို နီးစပ်တယ်လို့ ဆိုနိုင်ပါတယ်။ အဆောက်အအုံ တစ်ခုနှင့် တစ်ခု ဆင်တူသဏ္ဍာန်ရှိသော်လည်း အကုန့်အသတ် မရှိတဲ့ အလွှဲအပြောင်းတွေကြောင့် နှစ်သက်စဖွယ်ဖြစ်နေပါတယ်။
တခါတလေမှာ ကျနော်တို့တွေရဲ့ အဆောက်အအုံမှာ သဘာဝတရားရဲ့ အစိတ်အပိုင်းတစ်ခု ဖြစ်စေလိုသောစိတ်ခံစားမှုအတွက် တစ်ခုတည်းသော ဖန်းတီးနိုင်တဲ့ ပညာကတော့ Landscape Architecture မြေခင်းဗိသုကာ ပညာပဲ ဖြစ်ပါတယ်။ ပန်းပင်တွေ၊ မြက်ခင်းတွေ၊ ချုံပင်တွေ၊ သစ်ပင်တွေ၊ သစ်ကပ်နွယ်ပင်တွေ အစရှိတဲ့ အပင်များ စိုက်ပျိူးပြုပြင်ခြင်းဖြင့် နေထိုင်တဲ့သူတွေကို နွေးထွေးမှု၊ စိတ်ချမ်းသာမှု၊ ဆွဲဆောင်နိုင်မှု၊ သာယာကြည်နူးမှုစတဲ့ စိတ်ကျေနပ်စေမှုများကို သာမန် အကြမ်းထည် အဆောက်အအုံထက် ပိုမိုပေးစွမး်နိုင်ပါတယ်။
အချုပ်အားဖြင့် ဆိုရရင် ကျနော်တို့ အနီးပတ်ဝန်းကျင် အိမ်အနီးတဝိုက်၊ ရပ်ကွက်၊ မြို့ရွာ အနီးတဝိုက်၊ တောတောင်ရေမြေ၊ မြစ်၊ ချောင်း၊ အင်း၊ အိုင်၊ ပင်လယ်ကမ်းခြေ အစရှိတဲ့ နေရာများကို သွားရောက်လေ့လာ စူးစမ်း၍လည်းကောင်း၊ ဇီဝဗေဒနှင့် ခန္ဓာဗေဒ အစရှိသော စာအုပ်စာတမ်းများမှ ပုံစံများ ကိုလေ့လာခြင်းဖြင့်လည်းကောင်း သဘာဝတရားမှ ဖန်တီးထားသော သက်ရှိသက်မဲ့အရာဝတ္ထုများမှ ထူးခြားဆန်းသစ်သော ဒီဇိုင်းများပြုလုပ်နိုင်စေကြောင်း။

လေးစားစွာဖြင့်
MMO

ပြင်ညီမျက်နှာပြင်များ(Planes)

2011-04-23T12:41:00.003+08:00

ပြင်ညီမျက်နှာပြင်ကို ကျနော်တို့ ပတ်ဝန်းကျင်မှာ ရှိတဲ့ ပစ္စည်းအတော်များများမှာ တွေ့နိုင်ပါတယ်။ နံရံ(Walls)၊ မျက်နှာကြက်(Ceilings)၊ ကြမ်းခင်း(Floors)စတဲ့ အရာတွေလို မျက်နှာပြင် ညီညာပြန့်ပြူးနေတဲ့ အရာ အားလုံးကို ပြင်ညီမျက်နှာပြင်(Planes) များအဖြစ်သတ်မှတ်ပါတယ်။ ပြင်ညီဆိုတာ ဘယ်လိုဖြစ်နိုင်သလဲ။ ပြင်ညီတစ်ခုကို ဖန်တီးမယ်ဆိုရင် ဘယ်လိုဖန်တီးနိုင်မလဲ။ နားလည်လွယ်အောင် ပြောရမယ်ဆိုရင် မြေဖြူတစ်ချောင်းနှင့် သင်ပုန်းတစ်ချပ်ပေါ်မှာ မျဉ်း(line) တစ်ကြောင်းဆွဲသားနိုင်တယ်ဆိုတာ သိမှာပါ။ အဲဒီမြေဖြူကို သင်ပုန်းမျက်နှာပြင်ပေါ်မှာ လှဲကိုင်လိုက်ပြီး မျဉ်းဖြောင့် ဆွဲသလို ရှပ်တိုက် ဆွဲလိုက်မယ်ဆိုရင် ပြင်ညီ(plane) တစ်ခုအဖြစ်ဆွဲသားပြီး ဖြစ်သွားပါတယ်။

နောက် ဥပမာအနေနှင့် အပေါ်ကို ခေါက်တင်ထားသော ယင်းလိပ်(သို့မဟုတ်) လိုက်ကာ တစ်ခုကို အောက်သို့ဖြေချလိုက်ခြင်းဟာလည်း ပြင်ညီ(plane) တစ်ခုဖြစ်ပေါ်နိုင်စေတာပါပဲ။
ပုံသဏ္ဍာန် shapes အမျိုးမျိုးရှိတဲ့ ပြန့်ပြူးတဲ့ အရာဝတ္ထုတွေကို ကျနော်တို့တွေ တွေ့ဖူးမြင်ဖူးကြမှာပါ။ အဲဒီ Shapes တွေဟာ ပြင်ညီ(plane) ရဲ့ သွင်ပြင်လက္ခဏာတစ်ခုပါပဲ။ ဒါကြောင့် ပြင်ညီ(plane) ဆိုတာကို အမည်အမျိုးမျိုးနှင့် ရှိနေနိုင်ပါတယ်။ ဥပမာအားဖြင့် စက်ဝိုင်းပြင်ညီ(Circular Plane)၊ တြိဂံပြင်ညီ(Triangle Plane)၊ စတုဂံပြင်ညီ( Rectangular) စသည်ဖြင့် သီးခြားဂျီသြမေတြီပုံစံအနေနှင့် ရှိနေနိုင်သလို အဲဒီ ပုံစံတွေ မျိုးစုံပေါင်းစပ်ထားတဲ့ ပြင်ညီတွေ အဖြစ်လည်း ရှိနေနိုင်ပါတယ်။ အောက်က ပုံလေးတွေကို နမူနာအဖြစ်လေ့လာကြည့်နိုင်ပါတယ်။

အဲဒီလို ပြင်ညီတွေကို ဗိသုကာပညာရှင်တွေဟာ အိမ်တွေ ၊ အဆောက်အအုံတွေ Plan ထုတ်ရာမှာ များစွာ အသုံးပြုကြပါတယ်။ Overhead plane တွေအဖြစ် (အိမ်ခေါင်မိုး)Roof တွေ၊ မျက်နှာကြက် (Ceiling) တွေ၊ အဖြစ်တွေ့နိုင်ပါတယ်။ Wall plane တွေအဖြစ် အိမ်တွေရဲ့ နံရံ(Wall)တွေ အဖြစ်တွေ့နိုင်ပါတယ်။ တံခါးပေါက်(Door)၊ ပြူတင်းပေါက်(Window) တွေဟာ wall plane ရဲ့ အစိတ်အပိုင်းတွေပါပဲ။ Base plane တွေအဖြစ် မြေပြင်(Ground) သို့မဟုတ် ကြမ်းခင်း၊ ကြမ်းပြင် (Floor) တွေအဖြစ် တွေ့ရမှာပါ။ အဲဒီလို ပြင်ညီမျက်နှာပြင်တွေ အသုံးပြုရာမှာ ဘယ်လိုနေရာမှာပဲ အသုံးပြုပါစေ လျောစောက်(slope) အဖြစ်ပြုလုပ်၍ လည်းကောင်း၊ မြင့်တတ်(rise) သော အမတ် အထောင်အဖြစ် ပြုလုပ်၍ လည်းကောင်း၊ နိမ့်ချ(lower)၍ လည်းကောင်း အပြောင်းအလဲ တစ်မျိုးမျိုးပြုလုပ်ခြင်းကို ဗိသုကာတွေ ပြုလုပ်တတ်ကြပါတယ်။ အဲဒီလို အသုံးပြုခြင်းကြောင့် ပိုမိုစိတ်ဝင်စားမှုဖြစ်စေ နိုင်သလို၊ လှပသော ၊ ဆန်းသစ်သော ပုံစံတွေ အဖြစ်လည်း ပြောင်းလဲ ဖန်တီးတတ်ကြပါတယ်။

Lines တွေကိုပေါင်းစပ်ပြီး shape အဖြစ်လုပ်နိုင်သလို Planes တွေပေါင်းစပ်ပြီး ထုသွင် form (volume) အဖြစ် ပြုလုပ်နိုင်ပါတယ်။ (Boundary and descriptive relationship)
Planes တွေကို volume(form) ပြုလုပ်ရန်အတွက် ပတ်လည်ကာရံပေးရပါတယ်။ Lines တွေကို shape ပြုလုပ်ဖို့ရန်အတွက် outline ဘောင် အဖြစ် အသုံးပြုပါတယ်။ ဒါဟာ Boundary determiners အဖြစ် အသုံးပြုလိုက်ခြင်းပါ။
ဗိသုကာပညာဆိုတာ အမှန်တကယ်အားဖြင့် ထုသွင် နှင့် ဟင်းလင်းပြင်တို့ရဲ့ သုံးဖတ်မြင် ဆက်သွယ်ချက်ကို ဖော်ပြတဲ့ အမြင်ဆိုင်ရာ အနုပညာတစ်ရပ်ပါ။ ဒါကြောင့် Planes တွေဟာ ဗိသုကာပညာရပ်မှာ အလွန်အင်မတန်ကို အရေးပါလှပါတယ်။

Planes တွေရဲ့ မြင်ကွင်းဆိုင်ရာ အရည်အသွေးတစ်ရပ်ကတော့ ယင်းတို့ကို ဘောင်ခတ်ခြင်းဖြင့် volume နှင့် space တွေရဲ့ qualities များကို သတ်မှတ်ပေးနိုင်ခြင်းပါ။ planes တွေကို တွန့်ခြင်း၊ ခေါက်ခြင်း၊ လိပ်ခြင်း၊ အပေါက်ဖေါက်ခြင်း အစရှိတာတွေ ပြုလုပ်ပြီး ရိုးရိုးပြင်ညီမျက်နှာပြင်ကို စိတ်ဝင်စားဖွယ်ဖြစ်အောင်၊ အဆန်းတကြယ်ဖြစ်အောင် စိတ်ကူးဆန်းသစ်သလို အသွင်ပြောင်းလဲ ပြုပြင်နိုင်ပါတယ်။
အခုလောက်ဆိုရင် ဗိသုကာ ပညာရပ်မှာ ပြင်ညီမျက်နှာပြင် Planes များရဲ့ အသုံးချမှု၊ အသုံးဝင်မှုတွေကို နားလည်သိရှိနိုင်လိမ့်မယ်လို့ မျှော်လင့်မိပါတယ်။

MMO

The Function(ဆောင်တာ) နှင့် The Form(ထုသွင်)

2011-04-06T23:20:00.003+08:00

The Function(ဆောင်တာ) နှင့် The Form(ထုသွင်)

ဆရာ ဒေါက်တာလွင်အောင်က Function ဆိုတဲ့ စကားလုံးကို ဆောင်တာ လို့ဘာသာပြန်ထားတာ ဗိသုကာဒဿန ဆိုတဲ့ ဆောင်းပါးမှာ ဖတ်ရှုခဲ့ရပါတယ်။ အဲဒီကနေ ဆောင်တာဆိုတဲ့ စကားလုံးလေးကို ယူထားပါတယ်။
အဆောက်အအုံတစ်လုံးရဲ့ ဆောင်တာ Function ဆိုတာ အဲဒီအဆောက်အအုံရဲ့ ထုသွင် Form အတွက် အင်မတန် လွှမ်းမိုးမှုရှိပါတယ်... ဆိုသော အချက်ကို ကျနော်တို့တစ်တွေ သတိထားမိပါသလား။

အဲဒီအကြောင်းကို ကျနော်တို့ ပတ်ဝန်းကျင်မှာရှိတဲ့ အဆောက်အအုံများထဲမှ ဆပ်ကပ်တဲများကို လေ့လာကြည့်မယ်ဆိုရင် Function နှင့် Form တို့အတွက် အကောင်းဆုံးနှင့် အသင့်လျှော်ဆုံး ဥပမာပင်ဖြစ်ပါတယ်။ ဆပ်ကပ်တဲ တွေဟာ သာမန်မဟုတ်တဲ့ Function တွေလိုအပ်တဲ့ အဆောက်အအုံ တစ်မျိုးပါ။ ဆပ်ကပ်အဖွဲ့သားတွေ မြို့ရွာထဲမှာ ရောက်ရှိလာရင် မြို့ထဲမှာပဲ တည်ဆောက်ထားရှိရပါတယ်။ နောက် ရက်အနည်းငယ် စတည်းချ နေထိုင်ကြရပါမယ်။ အဲဒီနောက် ပြပွဲပြသပြီးချိန်မှာတော့ ပြန်လည်ထုတ်ပိုးပြီး အဲဒီနေရာက စွန့်ခွါလို့ တခြားအရပ်ကို ပြောင်းရွေ့ကြရ ပြန်ပါတယ်။ အဲဒီတော့ အဲဒီဆက်ကပ်ရုံမှာ ဆပ်ကပ်ပွဲကို လာရောက်ကြည့်ရှု့တဲ့ လူပေါင်းများစွာကို မိုးဒါဏ်၊ လေဒါဏ်၊ နေဒါဏ်တို့မှ လုံခြုံအောင် ကာကွယ်ပေးနိုင်ရပါမယ်။ နောက်ပြီး ဆပ်ကပ်တဲကို တည်ဆောက်တပ်ဆင်ရာနှင့် ပြန်လည်ဖြုတ်ယူ သိမ်းဆည်းရာတို့မှာလည်း လွယ်ကူအောင် စီမံထားရပါမယ်။ နောက် သယ်ယူရလွယ်ကူအောင်ပါ စီမံထားရပါမယ်။ အမြင့်ကိုလည်း ကောင်းကင်ကြိုးဘား ကစားသူတွေအတွက် ကောင်းစွာပြသ ကစားနိုင်အောင် မြင့်မြင့်မားမား တည်ဆောက်ထားရပါမယ်။ အဲဒီတော့ ဆပ်ကပ်တဲ တစ်လုံးဟာ ကြီးမားရမယ်။ ရောင်သွေးစုံလင်စွာ ရှိနေရမယ်။

ဒါတွေအပြင် ဖြုတ်သိမ်း လွယ်ကူပြီး ထရက်ကား(ကုန်တင်ကား) သို့မဟုတ် ရထားလမ်းပေါ်မောင်းနှင်နိုင်သော ကားရထားတို့ဖြင့် သယ်ယူရွှေ့ပြောင်းနိုင်အောင် စီမံထားရပါမယ်။ ထို့အပြင် အကယ်၍ ကုန်တင်ကားကြီးရဲ့ မော်တာစက်ပစ္စည်းတစ်ခုခု ပြင်ဆင်ဖို့လိုအပ်တယ်ဆိုလျှင်လည်း ကားဂိုထောင်အတွင်း ဆွဲယူပြင်ဆင်နိုင်အောင် ကားကြီးရဲ့ အရွယ်အစားကိုလည်း အဆောက်အအုံရဲ့ Function တစ်ခုအဖြစ် ထည့်သွင်းတွက်ချက်ထားရပါမယ်။ ပုံသဏ္ဍာန်ဟာ ကားရဲ့အရှည်၊ အမြင့်အတိုင်း တည်ဆောက်ဖို့ နှင့် တံခါးများကိုလည်း ကားကြီး ဝင်ထွက်နိုင်အောင် ပြုလုပ်ထားဖို့ လိုအပ်ပါတယ်။ နောက် ကားရဲ့ အောက်မှ စက်များပြုပြင်နိုင်ရန် အလုပ်သမားဝင်ရောက်နိုင်ဖို့ Pit ကျင်းတစ်ခုလည်း ထားရှိရပါမယ်။ နောက် လေဝင်လေထွက် ventilation အထူးကောင်းမွန်အောင် air fans များ၊ Opening များ နှင့် Outlet များကိုလည်း ပြုလုပ်ထားရှိရပါမယ်။ အထက်ပါ လိုအပ်ချက်တွေ အားလုံးဟာ အဆောက်အအုံရဲ့ ပုံစံမှာ သက်ရောက်နေမယ့် အချက်များဖြစ်ပါတယ်။ အကြမ်းပြောရရင် ဆက်ကပ်ပြပွဲတစ်ခုအတွက် အဓိကလိုအပ်တဲ့ အဆောက်အအုံကတော့ ကြီးမားပြီး၊ အရောင်အသွေးစုံလင်စွာရှိနေမယ့် တဲကြီးတစ်လုံးပါပဲ။

အခုပြောတဲ့ သဘောတရားအတိုင်းပင် အဆောက်အအုံများနှင့်ပတ်သတ်ပြီး Function မှ Form အပေါ်တွင် လွှမ်းမိုးမှု မည်မျှအထိရှိကြောင်းကို သိနိုင်မယ်ထင်ပါတယ်။

Louis Sullivan (September 3, 1856 – April 14, 1924) "father of skyscrapers" လို့ နာမည်ကျော်တဲ့ အမေရိကန် အာခီတတ်ကြီးက သူ့အန္တေဝါသိကဖြစ်တဲ့ Frank Lloys Wright ကို " Form follows function" ဆိုတဲ့စကားကို ပြောခဲ့ဖူးပါတယ်။ အသို့ဆိုစေ အချို့ အဆောက်အအုံတွေကတော့ သူတို့ရဲ့ Function တွေ ကောင်းမွန် အဆင်ပြေ သော်လည်းပဲ သူတို့ရဲ့ Form က အင်မတန်အရုပ်ဆိုး အကျည်းတန်နေတာ၊ ပုံတုံးကြီးဖြစ်နေတာကို တွေ့ရတတ်ပါတယ်။

ကဲ ကျနော်တို့တွေ Function ဆောင်တာ နှင့်ပတ်သတ်ပြီး လက်တွေ့ ကျနော်တို့ဝန်းကျင်မှာ ရှိတာတွေနှင့် ယှဉ်ထိုး နှိုင်းယှဉ်မယ် ဆိုရင် ဘယ်လောက်များများ စဉ်းစားမိကြပါမလဲ...။ ဥပမာအနေနဲ့ ပြောရရင်.. ခဲချွန်စက် တစ်ခုမှာ ခဲတံချွန်ဖို့ ဓါးလေး မပါဘူးဆိုရင်၊ အမှိုက်တောင်းတစ်ခုမှာ အောက်ခံမပါဘူးဆိုရင်၊ သွားတိုက်တံတစ်ခုမှာ သွားတိုက်ဖို့ အမွှေးကြမ်းတွေ မပါဘူးဆိုရင်၊ နောက် ဥပမာ တစ်ခုအနေနဲ့ အိမ်တစ်လုံးမှာ အမိုးမပါခဲ့ဘူးဆိုရင် အစရှိတဲ့ အဓိကလိုအပ်ချက် ဆောင်တာတွေ မပါတဲ့ ကိရိယာတွေ၊ ပစ္စည်းတွေကို စဉ်းစားမိကြမှာပါ။ ဒါဆိုရင် ဆောင်တာ ဆိုတာ ဘယ်လိုအရာလဲ ဆိုတာ ပိုပြီး ရှင်းရှင်းလင်းလင်း သိနိုင်မယ်ထင်ပါတယ်။

ကျနော် အရင်က ရေးခဲ့ဖူးတဲ့ ပတ်ဝန်းကျင်ကို တည်ဆောက်ခြင်း(Built Environment) မှ The Three Bears ပုံပြင်မှ ပစ္စည်းများကို မှတ်မိကြမယ်ထင်ပါတယ်...။ အဲဒီထဲမှ အချို့ ပစ္စည်းတွေဟာ ဇာတ်ဆောင် ဂိုဒီလော့လေးအတွက် အဆင်မပြေဖြစ်နေပြီး အသုံးမဝင်ပါဘူး။ အချို့ပစ္စည်းတွေဟာတော့ သူမနှင့် အံဝင်ခွင်ကြ သင့်တော်နေတာကိုတွေ့ နိုင်မှာပါ။ ဘယ်ပစ္စည်းတွေဟာ သူမနှင့် အဆင်ပြေခဲ့တယ်ဆိုတာ မှတ်မိပါသလား။ အဲဒီသူမနှင့် အဆင်ပြေတဲ့ ပစ္စည်းတွေဟာ သူမအတွက် သူမရဲ့ အရွယ်အစားနှင့် ကိုက်ညီပြီး သူမလိုအပ်ချက်နှင့် ပြည့်စုံတဲ့ ပစ္စည်းတွေပါပဲ။ အဲဒီတော့ အဲဒီပစ္စည်းတွေဟာ သူမအတွက် Functional things တွေလို့ ပြောနိုင်ပါတယ်။ တနည်းပြောရရင်
အသုံးဝင် အသုံးကျတဲ့ ပစ္စည်းတွေလို့ ဆိုနိုင်ပါတယ်။

တခါတရံမှာ အသုံးပြုတဲ့ ပစ္စည်း materials တွေကလည်း အရာဝတ္ထုတစ်ခုကို အသုံးပြုလို့ ဖြစ်နိုင်မဖြစ်နိုင်ဆိုတာ လွှမ်းမိုးတတ်ပါတယ်။ ဥပမာပြောရရင် ခေါင်းအုံးတွေကို သံမဏိနှင့် ပြုလုပ်ထားမယ်ဆိုရင် အဘယ်သို့ ရှိမလဲ။ အင်မတန် အိပ်လို့ ကောင်းမယ်လို့ ထင်ပါသလား။ နောက် သစ်သားဖြင့်ပြုလုပ်ထားတဲ့ တံခါး၊ ပြူတင်းပေါက်များ ဆိုရင်ရော အဆင်ပြေကြပါမလား။ အဆင်ပြေတယ်ဆိုရင်ရော ဘာကြောင့်များ အဆင်ပြေကြပါသလဲ ဆိုတာ စဉ်းစားနိုင်ကြမယ်ထင်ပါတယ်။ အသုံးပြုတဲ့ ပစ္စည်းက သုံးစွဲသူရဲ့ လိုအပ်ချက်နှင့် အဆင်ပြေ ကိုက်ညီဖို့လိုအပ်နေလို့ပါပဲ။

ကျနော်တို့ ပတ်ဝန်းကျင်မှာရှိတဲ့ ပစ္စည်းဝတ္ထုတွေကို Function ကြောင့် ဘယ်လိုတည်ဆောက်ထား ကြသလဲ...ဆိုတာကိုလည်း စဉ်းစားတွေးတော ကြည့်သင့်ပါတယ်။ ဆရာတစ်ယောက် သို့မဟုတ် အကြီးအကဲတစ်ယောက် ထိုင်တဲ့ ဆုံလည်ကုလားထိုင်တစ်လုံးရဲ့ Form ဆိုရင် Function အနေဖြင့် အဆင်ပြေမည်လား။

ပုံမှာပြထားတဲ့ လေယျာဉ်ပျံတစ်စင်းရဲ့ ပုံစံကိုကြည့်ပြီး သူ့ရဲ့ Function ဟာ သူ့ရဲ့ Form ကိုလွှမ်းမိုးမှု ရှိမရှိဆိုတာကို စဉ်းစားကြည့်လိုက်ပါအုန်း…။

အထက်က ပုံမှာပြထားတဲ့ ချီကာဂို မှာရှိတဲ့ ဗိသုကာ Skidmore, Owings and Merrill (SOM) ရဲ့ဒီဇိုင်းနဲ့ တည်ဆောက်ထားတဲ့ Willis Tower (formerly named, and still commonly referred to as Sears Tower) ရဲ့ Form ကို သူ့ရဲ့ Function က ဘယ်လို လွှမ်းမိုး အကျိုးသက်ရောက်မှုရှိနေပါသလဲ။ အဲဒီအဆောက်အအုံကြီး လှပခန့်ညားတယ်လို့ ထင်ပါသလား။ အဲဒီအဆောက်အအုံဟာ ပြိုင်စံရှားလှတဲ့ ဗိသုကာကြီးရဲ့ Rectangular tubes ပုံတွေကို စုစည်းထားတဲ့ အိုင်ဒီယာကို တည်ဆောက်မှုမှာ အသုံးပြုထားခြင်းပါပဲ။ Rectangular tubes ကြီးများ တစ်ခုနှင့် တစ်ခု အားပေးထောက်ကူထားတဲ့ ပုံမျိုးပေါ်နေပါတယ်။ အခြားသော အဆောက်အအုံများမှာလည်း အလားတူ နှိုင်းယှဉ်လေ့လာနိုင်ပါတယ်....။

အခု Function ဆောင်တာ အကြောင်းပြောရင်း ဆောင်တာအပေါ်မှာ ဘယ်လောက်အထိနားလည်လိုက်သလဲ ဆိုတာမေးခွန်းလေးတွေ မေးကြည့်ပါမယ်...။ မူရင်းစာအုပ်မှ ရေးသားထားသော ဥပမာများအတိုင်း ဖော်ပြပေးလိုက်ပါတယ်။

1. Function is to form as fire/heat is to ________ . (Chimney, firebrick, etc.)
2. How it look and how you use it are the same as its ________. (Form)
3. Form is to function as __________ is to lawn sprinkler. (Horse, pipe, spout)
4. Form is to function as __________ is to __________ .

စဉ်းစား အဖြေရှာရင်း Function အကြောင်းပိုမိုနားလည် နိုင်မယ်လို့ မျှော်လင့်ပါတယ်။

နောက်ဆုံးအနေဖြင့် အိမ်တစ်လုံးကို Function နှင့် Form ကို ကောင်းမွန်စွာ ဆက်စပ်ဖွဲ့စည်းထားသော ဒီဇိုင်းလေးတစ်ခုကို လေ့ကျင့်ရင်း လုပ်ဆောင်ကြည့်ပါခင်ဗျာ။ အဲဒီအိမ်လေးဟာ အသုံးလည်း ဝင်ရမှာ ဖြစ်သလို ကြည့်ပျော်ရှု့ပျော် ဖြစ်ဖို့လည်း လိုအပ်ပါသေးတယ်။ အဲ.. နောက်တစ်ခုအနေနဲ့ နေ့စဉ်သုံးနေတဲ့ ပစ္စည်းများမှ တချို့ပစ္စည်းများကို ပြန်လည် ဒီဇိုင်းပြုလုပ်ကြည့်ပါ...။ တစ်ခုသတိထားရမှာက အဲဒီပစ္စည်းကို သင်ဘယ်လိုအသုံးပြုတယ် ဆိုတာကို လစ်လျူရှု့ထားလိုက်ပါခင်ဗျာ။ အချုပ်ပြောရမယ်ဆိုရင် ဒီဇိုင်းတစ်ခုလုပ်ရာမှာ အဲဒီ ဒီဇိုင်းရဲ့ Function အသုံး သို့မဟုတ် ဆောင်တာနှင့် Form ပုံသဏ္ဍာန် တို့ ယှက်နွယ်ပေါင်းစပ်မှုကို စိုးရိမ်ပူပန်မနေပဲ ရဲရဲသာ ဒီဇိုင်းပြုလုပ်ဖို့ပါပဲ ခင်ဗျာ။

လေးစားစွာဖြင့်
MMO

Design and Ideology _ 1st Newsletter

2011-03-27T22:13:00.004+08:00

ဒီဇိုင်း နှင့် အိုင်ဒီယော်လိုဂျီ (Design and Ideology)

ချားစ်ဒါဝင်ရဲ့ အီဗော်လူးရှင်း သီအိုရီအရ လူသည် မျောက်နှင့် မျိုးစိတ်တူသောသတ္တဝါ တစ်မျိုးဟု ဆိုခဲ့သည်။ ဘာသာရေးအသီးသီးမှလည်း လူ၏ဖြစ်တည်ရာကို အမျိုးမျိုးဆိုခဲ့ကြသည်။ မည်သို့ဆိုစေ သတ္တလောက၌ လူ၏ တည်ရှိနေမှု ကဏ္ဍသည် မှေးမှိန်သွားခြင်းမရှိခဲ့။ မည်သည့်နေရာမှ ဖြစ်တည်လာခဲ့ပါစေ လူဟူသော သက်ရှိတစ်မျိုးသည် သတ္တလောကအတွင်း တည်ရှိနေသည်မှာ အမှန်ပင်ဖြစ်သည်။ ဗုဒ္ဓအလိုအရ စင်္ကြဝဠာတစ်ခွင်ရှိ သတ္တဝါများ အားလုံးအတွင်း လူသားဘဝသည်သာ အမြင့်မြတ်ဆုံး အဖြစ် သတ်မှတ်ထားသည်။ ထိုအမြင့်မြတ်ဆုံးသော လူသားသည်ပင် လောကကို အကျိုးပြုနိုင်သလို၊ လောကကို ပျက်စီးအောင် ပြုလုပ်နိုင်ပေသည်။ လောကရှိ သက်ရှိ သတ္တဝါအားလုံး၌ တူညီသော လိုအပ်ချက်များ ရှိပေသည်။ ထိုအရာတို့မှာ စားရေး၊ ဝတ်ရေး၊ နေထိုင်ရေး နှင့် ဘေးကင်း လုံခြုံရေးများပင် ဖြစ်သည်။ ထိုလိုအပ်ချက်များမှာ မရှိမဖြစ် အခြေခံများပင် ဖြစ်သည်။ သို့သော်လည်း အခြားသက်ရှိတို့နှင့် မတူကွဲပြားသော လိုအင်ဆန္ဒများမှာ လူသားတို့၌ သိသာထင်ရှားစွာ ဖြစ်ပေါ်တတ်သည်။ ထိုဆန္ဒမှာ အခြေခံ လိုအပ်ချက်အပေါ်မှာ မူတည်ဖြစ်ပေါ်လာတတ်သလို အချို့မှာ စိတ်ခံစားမှုအတွက် ပေါ်ပေါက်လာတတ်သော လိုအင် ဆန္ဒများ ဖြစ်သည်။ ထိုလိုအင်ဆန္ဒများမှ လူသားတို့၏ ထွေပြားဆန်းကျယ်သော စိတ်ကူး အကြံဉာဏ် ကွန့်မြူးမှုဖြင့် အမျိုးမျိုးသော တီထွင်မှုများဖြစ်ပေါ်လာခဲ့သည်။ လူသားတို့၏ လိုအင်မှ စိတ်ကူး အကြံဉာဏ်များ ဖြစ်ပေါ်လာခဲ့ပြီး ထိုဖြစ်ပေါ်သော အကြံအစည် စိတ်ကူးစိတ်သန်းများကို အကောင်အထည် ဖော်ဆောင်ရန် ဒီဇိုင်းများမွေးဖွားခဲ့ကြသည်။ အတွေးအခေါ်သစ်များ ထွေးပွေ့ခဲ့ကြခြင်းပင် ဖြစ်သည်။

_._._._._._._._._._._._.

ဒီဇိုင်းနှင့် အိုင်ဒီယာဆိုသောစကားလုံးနှစ်လုံးကို ကျွန်တော်တို့ မြန်မာအတော်များများ ရင်းနှီးနေကြသည်။ ဒီဇိုင်း ဆိုသည့်အဓိပ္ပါယ်ကို အတိအကျ မသိကြသော်လည်း အလွယ်တကူ သုံးစွဲနေတတ်ကြသည် ။ Oxford အဘိဓါန်၌ ဒီဇိုင်း ဆိုသည်ကို “ A plan or drawing produced to show the look and function of something before it is built or made (or) The art or action of planning the look and function of something (or) The arrangement of the features of an artifact ” ဟုလည်းကောင်း “A decorative pattern (or) The purpose or planning that exists behind an action or object” ဟုလည်းကောင်း၊ “Decide upon the look and functioning of something, especially by making a detailed drawing of it (or) do or plan (something) with a specific purpose in mind” ဟုလည်းကောင်း အဓိပ္ပါယ်ဖွင့်ဆိုထားပါသည်။

ခေတ်သစ် အင်္ဂလိပ်မြန်မာ အဘိဓါန်မှာ
ကြိယာအဖြစ်
၁။ ပုံ-ထုတ်သည်-ဆွဲသည်-ရေးသည်။
၂။ အနုပညာလုပ်ငန်းအတွက် အကြမ်းစီမံဖော်ပြသည်။
၃။ လိုရင်းအကြောင်း ပြီးမြောက်အောင် ဖန်တီးသည်။ ရည်ရွယ်သည်။ ကြံရွယ်သည်။ ရည်စူးသည်။
၄။ စီမံ-သတ်မှတ်သည်-လျာထားသည်။ မှန်းထားသည် ဟုလည်းကောင်း၊

နာမ်အဖြစ်-
၁။ အလှပုံ-ဆွဲ-ရေးထားသည့်ပုံ။
၂။ အနုပညာလုပ်ငန်းအတွက် အကြမ်းစီမံဖော်ပြချက်- အတိုချုပ် စီမံဖော်ပြချက်။
၃။ အဆောက်အအုံ-ဆွဲ ရေးထားသည့်ပုံ- ထုထားသည့် အရုပ်- အစီအစဉ်ဖွဲ့စည်းပုံ- အနေအထား အချိုးအစားကျပုံ။
၄။ အကြံအစည်။ စီမံထားခြင်း။ ကြံစည်ဖန်တီးထားခြင်း။
၅။ တမင်တကာ-ရည်မှန်းထားခြင်း- ရည်ရွယ်ထားခြင်း။
၆။ မကောင်း-အကြံအစည်-အကြံအရွယ် ဟုလည်းကောင်း အဓိပ္ပါယ်များဖွင့်ဆိုထားသည်ကို တွေ့နိုင်ပါသည်။

_._._._._._._._._._._._.

အိုင်ဒီယော်လိုဂျီ ကို Oxford အဘိဓါန်၌ “A system of ideas and ideals forming the basis of an economic or political theory (or) The set of beliefs characteristic of a social group or individual ဟုလည်းကောင်း၊ Archaic the study of the origin and nature of ideas” ဟုလည်းကောင်း အဓိပ္ပါယ်ဖွင့်ဆိုထားပါသည်။ Wikipedia တွင်တော့ အိုင်ဒီယော်လိုဂျီကို “An ideology is a set of ideas that constitutes one's goals, expectations, and actions” ဟု အဓိပ္ပါယ်ဖွင့်ဆိုထားပါသေးသည်။

ခေတ်သစ် အင်္ဂလိပ်-မြန်မာ အဘိဓါန်တွင် နာမ် အဖြစ်-
၁။ လူ့ စိတ်ကူး စိတ်ကမ်း အခြေပြုရာ အကြောင်းအချက်။ အယူအဆ ယုံကြည်စွဲမြဲချက်များ။
၂။ သဘောတရား။
၃။ စိတ်ကွန့်မြူးတွေးဆချက် ဟု အဓိပ္ပါယ် ဖွင့်ဆိုထားပါသည်။

အဘိဓါန်များအတွင်း ဖွင့်ဆိုချက်များအပေါ် ဆက်လက် ဆင်ခြင်တွေးတောလိုက်လျှင်ဖြင့် ဒီဇိုင်းနှင့် အိုင်ဒီယော်လိုဂျီတို့၏ ဆိုလိုချက်များကို ပုံဖော်နားလည်သွားနိုင်ပါမည်။ ဆက်လက်၍ အဘိဓါန်၏ ယေဘုယျ အချက်တွေအပြင် အခြား အတွေးပွားနိုင်သည်မှာ အင်ဂျင်နီယာ ပညာရပ်နှင့် ဗိသုကာပညာရပ်တို့တွင် ဒီဇိုင်းသည် မည်သည့်အပိုင်းကဏ္ဍတွင် ပါဝင်နေသနည်း။ အိုင်ဒီယော်လိုဂျီတို့သည် ဒီဇိုင်းသည် မည်သည့်အပိုင်းကဏ္ဍတွင် ပါဝင်နေသနည်း ဆိုသည့် အတွေးများဖြစ်သည်။

_._._._._._._._._._._._.

စင်စစ် ဒီဇိုင်းဆိုသည်မှာ အရာဝတ္ထုတစ်ခုအတွက် တိကျသေချာ အသေးစိတ်သော အဓိပ္ပါယ်ဖော်ပြချက်။ သွားရောက်လိုတဲ့ ပန်းတိုင်တစ်နေရာမှ ပေးစွမ်းမယ့် ပြီးပြည့်စုံတဲ့ ခံစားလိုမှု။ စိတ်အဆာ၏ လိုအပ်ချက်ကို ပြည့်စုံစေမှု။ စည်းချက်ညီညီ ကန့်သတ်ချုပ်ချယ်မှု။ အကန့်အသတ်မရှိ လွင့်ထွက်သွားနိုင်သော ဖန်တီးမှု စသည်ဖြင့် အမျိုးမျိုး ခံစားသိမြင်နိုင်ပါသည်။ ဖန်တီးသူတစ်ဦးမှ ပြောပြလိုသော သီးခြား ခံစားမှု သို့မဟုတ် ခံစားမှု အဖုံဖုံကို ဒီဇိုင်းများမှ ရရှိနိုင်သည်။ ဒီဇိုင်းတစ်ခု အတွင်းမှာပင် အတွေးအမျိုးမျိုး ကွဲပြားနိုင်ပါသည်။ ထို့ပြင် ဒီဇိုင်းကို သွင်ပြင်ခွဲ၍ ဆိုလျှင် ဒီဇိုင်းသည် ဘာသာဗေဒ အကန့်အသတ်မရှိ။ ကွဲပြားခြားနားတဲ့ အတွေးအခေါ်အမျိုးမျိုးသည် ဒီဇိုင်းတွင် ရှိနေသည်။ ဒီဇိုင်းတွင် လမ်းခွဲအမျိုးမျိုးမှ ချဉ်းကပ်လာမှုများ ရှိသည်။ ဒီဇိုင်းတွင် လက်ဆင့်ကမ်း ဆင်းသက်လာတဲ့ သုခုမရသတွေ ရှိသည်။ တိုးထွက် ဖောက်ထွက်လာတဲ့ အနုပညာတွေ ရှိသည်။ နည်းစနစ်တကျ တွေးခေါ်ပေးရတာတွေ ရှိသည်။ ထို့အပြင် ဒီဇိုင်းတွင် စီးပွားရေးအတွက် တွက်ခြေကိုက် လုပ်ဆောင်ချက်တွေ ရှိသည်။ လှုမှုဗေဒ လိုအပ်ချက်အပေါ် အဖြေရှာမှုတွေရှိသည်။ လိုအပ်ချက်အပေါ် သုတေသန ပြုလုပ်ရတာတွေ ရှိသည်။ အတွေးခံစားချက်ကို ဖော်ထုတ် ပေးရတာတွေ ရှိသည်။ ဖန်တီးမှုအတွေးကို အကောင်အထည် ဖော်ဆောင်ရတာတွေ ရှိသည်။ ခြုံ၍ ဆိုရပါလျှင် ဒီဇိုင်းသည် အရာအားလုံးကို စနစ်တကျ ချိန်ညှိပေးရခြင်းဟု ဆိုရပေမည်။

အိုင်ဒီယော်လိုဂျီအား ယေဘူယျဆိုရပါလျှင် အတွေးအမြင် သဘောတရား အယူအဆလို့ ဆိုနိုင်ပါမည်။ သိပ္ပံပညာရှင်များသည် အခြေခံကျတဲ့ သဘောတရားတွေနဲ့ သီအိုရီတွေ အမျိုးမျိုး ဖော်ထုတ်ကြသည်။ အင်ဂျင်နီယာများသည် သူတို့ပြုလုပ်မယ့် ဒီဇိုင်းနဲ့ တည်ဆောက်ရေး လိုအပ်ချက်အတွက် ဖြစ်နိုင်ချေရှိသော သင့်တော်မည့် သီအိုရီများကို စနစ်တကျ အသုံးပြုကြသည်။ ဗိသုကာများသည် လူမှုပတ်ဝန်းကျင်တွင် အဆင်ပြေချောမွေ့စွာ နေထိုင်နိုင်ရန် ကြံစည်တွေးတော အဖြေရှာကြပါသည်။ ဘာသာရေး၊ လူမှုရေး အသိပညာရှင်များသည် လူသားတို့အတွက် လိုက်နာ စောင့်ထိန်းအပ်တဲ့ ကျင့်ဝတ်၊ သိက္ခာ၊ လူမှုဘဝ တိုးတတ် ကြီးပွားရေး တတ်ကျမ်းများ၊ နီတိ အစရှိသည်တို့ကို တွေးတော အဖြေရှာ စူးစမ်းဖော်ထုတ် လေ့လာကျင့်သုံးရန် လမ်းညွှန်ပြင်ဆင်ကြတယ်။ နိုင်ငံရေးသုခမိန်များ၊ ဘောဂဗေဒ စီးပွားရေးပညာရှင်များသည် နိုင်ငံတစ်နိုင်ငံ၊ လူမျိုးတစ်မျိုး၏ နိုင်ငံရေးနည်းဗျူဟာနှင့် စီးပွားရေးနည်းဗျူဟာတို့အပေါ် ကြံစည် တွေးတောတတ်ကြသည်။ ထို့ကြောင့် လူသားအားလုံး၏ အတွေးအမြင် အကြံအစည် အားလုံးသည် အတွေးဗေဒ အိုင်ဒီယော်လိုဂျီဆိုသော ခေါင်းစဉ်အောက်မှာ ကိန်းဝပ်နေသည်ဟု ဆိုနိုင်ပါသည်။

_._._._._._._._._._._._.

ဒီဇိုင်းဆိုသည်မှာ အိုင်ဒီယော်လိုဂျီ၏ ကုန်ထွက်တစ်မျိုးဟု ဆိုနိုင်ပါသည်။ အတွေးအမြင်မပါသော ဒီဇိုင်းသည် ဆားမပါသော ဟင်းတစ်ခွက်နှင့်တူသည်။ အတွေးအမြင်တစ်ခုသည် ဘက်စုံဒေါင့်စုံ ပြည့်စုံနိုင်ရန် ခဲယဉ်းသကဲ့သို့ ဒီဇိုင်းတစ်ခုသည်လည်း အရာအားလုံးအတွက် ကုံလုံပြည့်စုံစေမှုပေးနိုင်ရန် မလွယ်ကူလှချေ။ အတွေးတစ်ခုကို အကျိုးအကြောင်း တွေးဆနိုင်သကဲ့သို့ ဒီဇိုင်းတစ်ခုတွင်လည်း ကျိုးကြောင်းပြည့်စုံသော အဓိပ္ပါယ်ကို ပေးနိုင်ဖို့ လိုအပ်ပါလိမ့်မည်။ အတွေးတစ်ခု၏ အမှန်အမှားဆိုသည်ကို ရလာဒ် အကျိုးအမြတ်နှင့် တိုင်းတာသကဲ့သို့ ဒီဇိုင်းတစ်ခု၏ အမှန်အမှားဆိုသည်ကိုလည်း ထိုဒီဇိုင်းမှ ရရှိသော ရလာဒ်ဘောင်နှင့် ချိန်ညှိုရပါသည်။ အတွေးအမြင် တစ်ခုသည် ပြဿနာတစ်ခုမှ ဖြစ်တည်လာနိုင်သကဲ့သို့ ဒီဇိုင်းတစ်ခုသည်လည်း ဖြေရှင်းရမည့် ပြသနာအတိမ်အနက်အတွက် နည်းစနစ်တစ်ခု ဖြစ်နေနိုင်ပါသည်။ အတွေးတစ်ခု၏ ရင်းမြစ်သည် ဘာကြောင့်ဖြစ်လာသည်ဆိုသော မေးခွန်းမှ ဖြစ်တည်လာသကဲ့သို့ ဒီဇိုင်းတစ်ခုသည်လည်း ဘာကြောင့် ဖြစ်လာရသလဲဆိုသည့် အဓိပ္ပါယ်တော့ ရှိရပါမည်။ နောက်ဆုံး အတွေးတစ်ခု၏ ဦးတည်ချက်သည် သေချာတိကျမှသာ တန်ဖိုးရှိနိုင်သကဲ့သို့ ဒီဇိုင်းတစ်ခုသည်လည်း ဘယ်ကို ဖြစ်သွားရမလဲဆိုသော ဦးတည်ချက် ရှိနေမှသာ ထိုဒီဇိုင်း၏ အနှစ်သာရကို ခံစားသိရှိနိုင်မှာ ဖြစ်သည်။

_._._._._._._._._._._._.

ဒီဇိုင်းတစ်ခု ကောင်းသည် မကောင်းသည် ဆိုသည်ကို ရည်ရွယ်ချက်ရှိခြင်း၊ အဓိပ္ပါယ် ဖော်ဆောင်နိုင်ခြင်း၊ ဆွဲဆောင်မှုရှိခြင်း၊ ဆန်းသစ်တီထွင်မှုရှိခြင်း၊ မှန်ကန်သော စည်းစနစ် ရှိခြင်း စသော အချက် ငါးချက်ဖြင့် အကြမ်းဖျဉ်း သုံးသပ်နိုင်ပါသည်။ ဒီဇိုင်းနှင့် အိုင်ဒီယော်လိုဂျီတို့သည် သိမ်မွေ့သော အသိပညာ၊ နက်ရှိုင်းသော အတတ်ပညာများ ဖြစ်သကဲ့သို့ ခန့်ညားသော၊ ဒဏ္ဍာရီဆန်တဲ့ အနုပညာတစ်ရပ်ဟု ဆိုလျှင်လည်း မမှားနိုင်ချေ။ ကျွန်တော်တို့ လူသားအားလုံးသည် မည်သည့်နေရာမှ ဖြစ်တည်လာခဲ့ပါစေ လူသားတစ်ယောက်ရဲ့ ဖြစ်တည်မှုသည် အခြား လူသားများအပေါ် ထိခိုက် နစ်နာခြင်းမရှိစေသော၊ မိမိကိုယ်တိုင်လည်း အကျိုးမမဲ့သော အတွေးအမြင်အသိပညာ အတတ်ပညာတို့ဖြင့် တန်ဖိုးရှိသော၊ လှပခန့်ညားသော၊ လူသားတစ်ယောက်အဖြစ် မိမိကိုယ်ကို ပုံဖော်ရေးဆွဲ ထုဆစ်နိုင်သော လူသားဒီဇိုင်းတစ်ခုအဖြစ် မိမိကိုယ်ကို ဖန်တီးနိုင်ကြသည်။ ဟင်းလင်းပြင် တစ်ခုအတွက် ဖြစ်ပေါ်လာသော အတွေးအမြင်၊ အသိ၊ အယူအဆ၊ တန်ဖိုးထားမှု၊ နားလည်မှု၊ ယုံကြည်မှု၊ လက်ခံလိုက်မှု၊ အသုံးချမှု၊ လွင့်မြောမှု၊ အိပ်မက်ဆန်မှု၊ ထိတွေ့မှု စသည့် မနောဝိဉာဉ်မှာ ဖြစ်ပေါ်လာမိသော စိတ်ခံစားမှုတွေကို ပုံဖော်တင်ပြနိုင်သည့် ဒီဇိုင်းဆိုသည်ကို တီထွင်ဖန်တီးရင်း ကျွန်တော်တို့၏ ပတ်ဝန်းကျင်ကို တတ်စွမ်းသမျှ ထိန်းသိမ်းကာကွယ် စောင့်ရှောက်ကြပါစို့။

Written By Design Ideology!
1st News Letter of our Unity.
1st January 2011

Design Ideology Forum

2011-01-01T15:46:00.004+08:00

"Design Ideology ဖိုရမ်မှ “24” နာရီ တံခါးဖွင့် ကြိုဆိုနေပါသည်"

သိပ္ပံပညာရှင်ကြီးတွေက အခြေခံကျတဲ့ သဘောတရားတွေနဲ့ သီအိုရီတွေ အမျိုးမျိုးဖော်ထုတ်ကြပါတယ်။ အင်ဂျင်နီယာတွေ၊ ဗိသုကာတွေ၊ ဒီဇိုင်းပညာရှင်တွေကတော့ သူတို့ပြု...လုပ်မယ့် ဒီဇိုင်းနဲ့ တည်ဆောက်ရေး လိုအပ်ချက်အတွက် ဖြစ်နိုင်ချေရှိတဲ့ သင့်တော်မယ့် သီအိုရီတွေကို စနစ်တကျ အသုံးပြုကြပါတယ်။ Design Ideology ဖိုရမ်ဟာ သီအိုရီ အမျိုးမျိုးအပေါ် ကွဲလွဲချက်တွေနဲ့ တိုက်ခိုက်ဖို့မဟုတ်ဘဲ အသုံးပြုမယ့် အခြေအနေအလိုက် လိုအပ်ချက်တွေကို ဆွေးနွေးနိုင်စေရန်။

ဗိသုကာပညာရပ် နှင့် မြို့ပြအင်ဂျင်နီယာပညာရပ်များဟာ လူသားတစ်ဦးတစ်ယောက်အတွက် လုံခြုံစွာနေထိုင်ဖို့ အကာအရံ တစ်ခုအဖြစ်သာမဟုတ်၊ လူ့ယဉ်ကျေးမှု တစ်ခုလုံးအတွက် ချန်ထားရစ်ခဲ့မယ့် သမိုင်းတစ်ခုအဖြစ် ဘယ်လို အသုံးပြုကြမလဲဆိုတာ အဖြေရှာနိုင်စေရန်။

ဟင်းလင်းပြင်အတွက် ထွက်ပေါ်လာတဲ့ အတွေးအမြင်၊ အသိ၊ အယူအဆ၊ တန်ဖိုးထားမှု၊ နားလည်မှု၊ ယုံကြည်မှု၊ လက်ခံလိုက်မှု၊ အသုံးချမှု၊ လွင့်မြောမှု၊ အိပ်မက်ဆန်မှု၊ ထိတွေ့မှု စတဲ့ မနောဝိဉာဉ်မှာ ဖြစ်ပေါ်လာမိတဲ့ စိတ်ခံစားမှုတွေ အားလုံးအတွက် အဖြေရှာကြည့်နိုင်စေရန်။

ပတ်ဝန်းကျင် စိမ်းလန်း စိုပြည် သာယာနေခြင်းဟာ လူသားတို့အတွက် နေ့စဉ်လူမှု ဒုက္ခ အထွေထွေမှ တဒင်္ဂကင်းလွတ်ခွင့် ရရှိနိုင်စေပါတယ်။ အဲဒီလို စိမ်းလန်း စိုပြည် လှပမှုတွေကို မြေခင်းပညာရှင်များက ဖန်းတီးတည်ဆောက်ပေးနိုင်ပါတယ်။ အဲဒီမြေခင်းအလှဆင်ပညာရပ်ရဲ့ အရေးပါ အသုံးဝင်မှုကို လေ့လာနိုင်စေရန်။

အတွေ့အကြုံတွေဆိုတာ စာတွေ့နဲ့ လက်တွေ့ ကွာဟချက် တွေကိုလည်း ချိန်ညှိပေးနိုင်ပါတယ်။ သီအိုရီတိုင်းဟာ သက်ဆိုင်ရာ သက်သေပြချက်တွေနှင့် ပြီးပြည့်စုံနေပြီလို့ ထင်ရတတ်ပါတယ်။ ဒါပေမယ့် လက်တွေ့အသုံးပြုဖို့ ဆိုတာကတော့ သူ့ကို သေချာနားလည်ရုံနဲ့ ပြည့်စုံနိုင်ခြင်း မရှိပါ။ စနစ်တကျ အသုံးချတတ်ဖို့နဲ့ အသုံးချစဉ်မှာ ဖြစ်ပေါ်လာမယ့် အကောင်းအဆိုး အကြောင်းအကျိုးကိုလည်း နားလည်၊ ဖြေရှင်း၊ ချိန်ညှိနိုင်ဖို့ လိုအပ်ပါတယ်။ ဒီနေရာလေးဟာ လက်တွေ့ လုပ်ငန်းခွင်များမှ ရရှိလာတဲ့ အတွေ့အကြုံ၊ အသိအမြင်၊ အတွေးအခေါ်များကို အဖြေရှာဆွေးနွေးနိုင်စေရန်။

ပြတိုက်တစ်ခု မဟုတ်ပေမယ့် Design Ideology ဖိုရမ်မှာ အနာဂတ်ရဲ့တေးကို နားဆင်နိုင်သလို အတိတ်တချိန်က ထားရစ်ခဲ့တဲ့ ပညာရပ်တွေကိုလည်း မျှော်ကြည့်နိုင်ပါသေးတယ်။ လက်တွေ့လုပ်ငန်းခွင် ဝင်ရောက်တဲ့အခါ လိုက်နာရန် လိုအပ်တဲ့ အချက်အလက်များနဲ့ ကျင့်ဝတ်သဘောတရားများကို သိရှိနိုင်ပြီး ဆောင်ရန်၊ ရှောင်ရန် တို့ကိုလည်း မှတ်သားနာယူ နိုင်စေရန်။

တစ်ယောက်ရဲ့ အတွေးအခေါ်၊ အယူအဆကို အခြားတစ်ယောက်က ပြောင်းလဲပေးခြင်းထက် နေရာ၊ ဒေသ၊ ကာလ အလိုက် မတူညီနိုင်တဲ့ အခက်အခဲနဲ့ လိုအပ်ချက်များအပေါ် ဆွေးနွေးအဖြေရှာနိုင်စေဖို့။

အစရှိသော ရည်ရွယ်ချက်ပေါင်း များစွာဖြင့် Design Ideology ဖိုရမ်ကို ဖန်တီးတည်ဆောက် ခဲ့ပါတယ်။

အထက်ပါ ရည်ရွယ်ချက်များဖြင့် ဝါသနာတူ ညီအကို မောင်နှမများအား နွေးထွေးလှိုက်လှဲုစွာ ဖိတ်ခေါ်လိုက်ပါတယ်။ မည့်သည့်နေရာဒေသမှ ဖြစ်စေ၊ လာရောက်သော ဝါသနာတူ မောင်နှမများကို ကျနော်တို့ Design Ideology ဖိုရမ်မှ 24 နာရီ တံခါးဖွင့် ကြိုဆိုနေမည် ဖြစ်ပါတယ်။

Design Ideology Forum
http://www.designideology.info/ds/index.php

ဝန်းကျင်ထဲက ဗိသုကာ

2010-12-26T16:33:00.007+08:00

ဝန်းကျင်ထဲက ဗိသုကာ (Architecture in Environment)

ဒီပိုစ့်မှာ ပထမဆုံးပြောချင်တာက Environment ပတ်ဝန်းကျင်ဆိုတာဘာလဲက စလိုက်ပါမယ်။ ပတ်ဝန်းကျင်ဆိုတာ ဘာလဲမေးရင် ကိုယ်နေတဲ့နေရာပေါ့ လို့အလွယ်ဖြေမိမယ်ထင်ပါတယ်။ Wiki မှာတော့ Environment အကြောင်းကို “In general, environment refers to the surroundings of an object.” လို့ဆိုထားပါတယ်။ နောက်ထပ်ပြီး
Environment may refer to:
* The natural environment, all living and non-living things that occur naturally on Earth
* Built environment, constructed surroundings that provide the setting for human activity, ranging from the large-scale civic surroundings to the personal places
* Environment (biophysical), the physical and biological factors along with their chemical interactions that affect an organism
* Environment (systems), the surroundings of a physical system that may interact with the system by exchanging mass, energy, or other properties
* Environmental art
* Environmental determinism
* Environmental policy
* Environmental psychology
* Environmental quality
* Environmental science, the study of the interactions among the physical, chemical and biological components of the environment
* Environments (series) A series of LPs, cassettes and CDs depicting natural sounds
* Knowledge environment
* Social environment, the culture that an individual lives in, and the people and institutions with whom they interact
ဆိုပြီး Environment ကိုအမျိုးအစားတွေ ခွဲခြားထားပြန်ပါသေးတယ်….။

အမှန်တကယ်ဆိုရရင် Environment ဆိုတာ အတော်လေးကိုကျယ်ဝန်း၊ များပြားပါတယ်။ သဘာဝပတ်ဝန်းကျင် မြေမျက်နှာသွင်ပြင်တွေ (မြေယာတည်ဆောက်ပုံ၊ တောင်ကုန်းတောင်တန်း ကွန်တိုအနိမ့်အမြင့်) စတာတွေ၊ ပတ်ဝန်းကျင်ဒေသမျိုးစုံမှာရှိတဲ့ သက်ရှိတိရစ္ဆာန်မျိုးစုံ၊ လူသားတွေ ဖန်တီးထားတဲ့ ပတ်ဝန်းကျင်ရှိအဆောက်အအုံတွေ၊ မြေကွက်ဟင်းလင်းတွေမှာ ပြုလုပ်ထားတဲ့ လူထုဆိုင်ရာ အပန်းဖြေပန်းခြံ၊ ကုန်ထုတ်လုပ်မှုဆိုင်ရာ စက်ရုံအလုပ်ရုံတွေ စတာတွေနှင့် ရာသီဥတုတွေ အစရှိတာတွေ အကုန်လုံးဟာ Environment ပတ်ဝန်းကျင်ဆိုတာနှင့် အကြုံးဝင်နေတာပါ….။ အဲဒီတော့ ဗိသုကာတစ်ယောက်ဟာ Structure တစ်ခု Planning လုပ်တော့မယ်ဆိုရင် Environment ပတ်ဝန်းကျင်ရဲ့ အရေးပါမှုကို လစ်လျှူရှုမထားသင့်ပါဘူး။ ဗိသုကာဖွဲ့စည်းတည်ဆောက်ထားမှု တစ်ခုဟာ သူ့ပတ်ဝန်းကျင်နှင့် ဆက်စပ်နေတတ်ပါတယ်။ အဲလိုဆက်စပ်မှုမှာ သူ့ဘာသာ သီးခြားရပ်တည် တည်ရှိနေနိုင်တာလည်း ရှိသလို သူ့ပတ်ဝန်းကျင်နှင့် သဟဇာဖြစ်ပြီး ဟာမိုနီဖြစ်နေတာမျိုးလည်း ရှိနေနိုင်ပါတယ်။
ကျနော်တို့ အနှေနှင့် ကျနော်တို့ ပတ်ဝန်းကျင်နေထိုင်ခဲ့ဖူးတဲ့ နေရာတွေ၊ လက်ရှိနေထိုင်နေတဲ့ နေရာတွေမှရှိတဲ့ ပတ်ဝန်းကျင်ကိုလေ့လာကြည့်မယ်ဆိုရင် ဘာတွေများတွေ့နိုင်ပါသလဲ။ တော၊ တောင်၊ သစ်ပင်၊ ပန်းပင်၊ နောက်အနီးပတ်ဝန်းကျင်က မြို့ကြီး၊မြို့ငယ်တွေ၊ ကျေးရွာတွေ၊ မြို့ရွာအတွင်းက ဈေးဆိုင်တွေ၊ ဆူပါမားကတ်တွေ၊ အိမ်ကြီးတွေ၊ အိမ်လေးတွေ၊ စက်ရုံကြီးတွေ၊ စက်ရုံလေးတွေ စတာတွေကို သတိပြုစဉ်းစားမိပါလား။ အဲဒါတွေကို စိတ်ဝင်တစား လေ့လာမိဖူးပါသလား။ အဲဒီမှာ ဗိသုကာတွေ ဖန်တီးထားတဲ့ အဆောက်အအုံတွေဟာ ပတ်ဝန်းကျင်ထဲမှာ အဘယ်မျှအသားကျနေသလဲ။
အဲဒီအဆောက်အအုံဟာ ပတ်ဝန်းကျင်နှင့် သဟာဇာတဖြစြ်ပီး ပတ်ဝန်းကျင်ကိုလွမ်းမိုးနေသလား။ ပတ်ဝန်းကျင်မှာ အဘယ်မျှ သက်ရောက်မှုရှိသလဲ ဆိုတာတွေ လေ့လာကြည့်ရမှာပါ။ ဥပမာအနေနှင့် New York City’s Mahanttan section တည်ဆောက်မှု နှင့် Log Cabin တို့ နှစ်ခုအကြား Unity ဖြစ်မှု၊ နောက် 110-storey skyscraper နှင့် Yellowstone National park စတာတွေရဲ့ ပေါင်းစပ်မှုတွေဟာ အင်မတန်နည်းပါးပါတယ်။ အဲဒီတော့ Log Cabin ဟာ New York City ထဲမှာရှိနေတယ်ဆိုရင် မသင့်လျှော်သလို skyscraper တွေကို Yellowstone National park မှာ ထည့်မယ်ဆိုတာမျိုး ဟာလည်း လုံး၀မဆီလျှော်တဲ့ ဟာပါ။

New York City’s Mahanttan Section

Log Cabin

Skyscraper

Yellowstone National park

အခြားအလားတူပုံစံတွေကို ဥပမာဆိုရမယ် ဆိုရင် Tree Forgs လို့ခေါ်တဲ့ မိုးများသစ်တောတွေမှာ နေတတ်တဲ့ သစ်ပင်တတ် ဖားပျံတွေကို သဲကန္တာရမှာ ထားတာမျိုး၊

Horned toads လို့ခေါ်တဲ့ အပူပိုင်း သဲမြေမှာနေတဲ့ ဖားပြုတ်တစ်မျိုးကို မိုးများသစ်တောတွေမှာ ထားတာမျိုး၊

Igloos လို့ခေါ်တဲ့ နှင်းခဲအိမ် သို့မဟုတ် စနိုးအိမ်လေးတွေကို အီကွေတာရပ်ဝန်း ပူနွေးရာသီဥတုလိုနေရာမျိုးမှာ ဆောက်တာမျိုး၊

မြက်ခင်းတွေမှာ ဆောက်လုပ်တတ်တဲ့ Grass huts မြက်ခင်းတဲလေးတွေကို ဝင်ရိုးစွန်းဒေသမျိုးမှာ ဆောက်တာမျိုး၊

အစရှိတဲ့ အရာတွေဟာ အတော်လေးမဆီမလျှော် ပြုလုပ်ထားတဲ့ အဖြစ်တွေပါ။

နောက်ထပ် အခြားပြောရအုန်းမယ်ဆိုရင် တယောတွေကို ရော့ခ်တီးဝိုင်းမှာ ဘန့်တွေမှာတွေ့ရခြင်းနှင့် လျှပ်စစ်ဂစ်တာကို ဆင်ဖိုနီအော်ချက်စထရာ ဝိုင်းတွေမှာ တွေ့ရခြင်းဟာ အတော်မဆီလျှော်သလိုတွေပေါ့။

ဒါဟာ သီအိုရီအရ ဗိသုကာပညာမှာ သတိထားသင့်တဲ့ မဆီလျှော်အောင်ဖြစ်တတ်တဲ့ အချက်တွေကို နားလည်သဘောပေါက်အောင် ပြောပြခြင်းပါ။ တကယ်တော့ နည်းပညာတိုးတတ်လာတဲ့ခေတ်ကြီးမှာ လူတွေရဲ့ တီထွင်ကြံဆမှုတွေကြောင့် အဲဒီမဆီလျှော်တာတွေကို လှပအောင် သစ်ဆန်းအောင် ဖန်တီးနိုင်တဲ့ သူတွေလည်း ရှိပါတယ်။ ဒါကတော့ တီထွင်ဆန်းသစ်သူတွေရဲ့ အံ့မခန်းပညာစွမ်းတွေနှင့် အဆင်ပြေအောင် ဖန်တီးနိုင်ခြင်းတွေပါ။
တည်ဆောက်မှုတွေမှာ ပတ်ဝန်းကျင့်နှင့် သဟဇာတမဖြစ်ပဲ ကွဲလွဲခြားနားနေတာဟာ ဘယ်အရာအတွေများဖြစ်နိုင်ပါသလဲ။
ဆိုရရင် ဆောက်လုပ်ရေး ပစ္စည်းများ (Building Material) ၊ ဆောင်တာပြ ဒီဇိုင်း(functional Design)၊ ဥတုရာသီ (Climate)၊ မြေမျက်နှာသွင်ပြင် လက္ခဏာ(Topography)၊ လက်ရှိ Themes (Existing themes)တွေနှင့်၊ မြေခင်း Landscape တည်ရှိမှုတွေဟာ အထူးသဖြင့် ကွဲလွဲနိုင်တဲ့ အချက်တွေပါ။
ပတ်ဝန်းကျင်နှင့် ဗိသုကာဆက်စပ်မှုကို စဉ်းစားခြင်းဟာ သူ့ရဲ့ပတ်ဝန်းကျင်နှင့် ဗိသုကာလက်ရာတို့ Unity ဖြစ်မှုကို ဖန်တီးနိုင်ပါတယ်။ အဲဒီ Unity ဆိုတာဟာ အနီးဝန်းကျင်နှင့် အံဝင်ခွင်ကျပြီး ၊ အသုံးဝင်သော ဆောင်တာဖြစ်စေသည့် ဒီဇိုင်းအဖြစ် ဟာမိုနီဖြစ်နေတဲ့ အခြေအနေမျိုးကို ဖန်တီးနိုင်ခြင်းကို ဆိုလိုပါတယ်။
အချုပ်အားဖြင့် ဒီဇိုင်းတစ်ခု၊ တည်ဆောက်မှုတစ်ခု ဖန်တီးတော့မယ် ဆိုရင် ကျနော်တို့တွေ မမေ့မလျော့ စဉ်းစားသင့်တဲ့ အချက်တစ်ခုဟာ ပတ်ဝန်းကျင်ထဲမှာ မိမိဒီဇိုင်းဟာ ဘယ်လို အနေအထားမျိုးနှင့် တည်ရှိနေမလဲဆိုတာ သေချာစဉ်းစားရင်း function and fit ဖြစ်အောင် ပြုလုပ်နိုင်စေကြောင်း။

MMO

မှတ်ချက် ။ ။ Mood images များရှာပေးတဲ့ MTZO ကြီး ကို ကျေးဇူးတင်ပါကြောင်း…..

ကွဲပြားခြားနားမှု (Contrast )

2010-12-26T16:29:00.005+08:00

အဖြူတွေကြားမှ အနက်တစ်စက်သည်လည်းကောင်း၊ အနက်တွေကြားမှ အဖြူတစ်စက်သည်လည်းကောင်း၊ သိုးဖြူအုပ်ကြားမှာ သိုးမည်းတစ်ကောင်ပါလာခြင်းသည်လည်းကောင်း၊ သိုးမည်းအုပ်ကြားမှသိုးဖြူ တစ်ကောင်သည်ပါလာခြင်းသည်လည်းကောင်း၊ အများနှင့်မတူ တမူထူးခြားနေခြင်း၏ ထင်ရှားသိသာစေသော၊ အမြင်အာရုံကိုဂရုပြုမိစေနိုင်သော Contrast ၏ ဥပမာ သဘောတရားများပင်ဖြစ်သည်။ ဗိသုကာပညာရပ်၌ Contrast (ကွဲပြားခြားနားမှု)ကို အထူးဂရုပြုစေလိုတဲ့ နေရာတွေမှာ တနည်းပြောရရင် အခြားအရာတွေထက် သိသာထင်ရှားစေလိုတဲ့ အခါမျိုးတွေမှာ အသုံးပြုတတ်ကြပါတယ်။ ဗိသုကာအများစုဟာ Contrast ရဲ့သဘောကို Entry (ဝင်ပေါက်)များ၊ Exit (ထွက်ပေါက်)များ ၊ သီးခြားအခန်းများ သို့မဟုတ် တစုံတရာ အရေးကြီးသော အရာတို့ကို သိသာထင်ရှားအောင် ပြသလိုသောအခါမှာ အသုံးပြုတတ်ကြပါတယ်။

ထင်ရှားတဲ့ ဗိသုကာပညာရှင်ကြီး Frank Lloyd Wright ကို California ပြည်နယ် San Francisco မြို့မှာရှိတဲ့ Morris Shop ငယ်လေးကို ဒီဇိုင်းပြုလုပ်ဖို့ အပ်နှံခြင်းခံရပါတယ်။ သူ့ကို Shop ငယ်လေးတည်ဆောက်မယ့် နေရာ Location ပြတယ်။ နောက် လမ်းအထက်ပိုင်းနှင့် အောက်ပိုင်းမှာရှိနေတဲ့ အခြားစတိုးဆိုင်ကြီးတွေနှင့် အခြားထူးခြားတဲ့ အရာတွေကို ထပ်ပြပေးပါတယ်။ အဲဒီမှာ Frank Lloyd Wright ပြဿနာက Morris Shop ငယ်လေးကို လူတွေ သတိထားမိစေဖို့ စဉ်းစားရမယ့်အချက်ပါ။ လမ်းဘေးဘယ်ညာ အထက်အောက်တွေမှာက နီယွန်မီးလုံးတွေ၊ ဆိုင်းဘုတ်အကြီးစားတွေနှင့် ပြိုးပြိုးပြက်ပြက်တွေက ဖြတ်သွားသမျှလူတွေကို လာပါကြည့်ပါလို့ အော်ဟစ်ဖိတ်ခေါ်နေတဲ့ ပုံမျိုးချည်းပါပဲ။ အဲဒီမှာ Wright စဉ်းစားဆုံးဖြတ်လိုက်တာက Contrast (ကွဲပြားခြားနားမှု) ကိုပဲဖြစ်ပါတယ်။ အဲဒီတော့ သူဟာ ဆူညံနေတဲ့ ဆိုင်တန်းတွေကြားထဲမှာ ငြိမ်သက်တိတ်ဆိတ်တဲ့ ဆိုင်လေးအဖြစ်ဖန်တီးပြစ်လိုက်တာပါပဲ။

အထက်ပါပုံတွေကိုကြည့်မယ်ဆိုရင် အခြားဆိုင်တွေနှင့် ဘာတွေ ကွာခြားသလဲ။ ကြီးမားတဲ့ ဝင်ပေါက်ကြီးကို သတိထားမိပါသလား။ ထင်ရှားကြီးမားတဲ့ Sign တွေမရှိ။ နောက် အရောင်းပစ္စည်းတွေ အပြည့်ပြထားတဲ့ ပြတင်းပေါက်တွေ မရှိ။ တစ်ခုတည်းသော စွဲဆောင်ရာအဖြစ် ရှေ့ကဝင်ပေါက်ကြီးသာ သိသာနေပါတယ်။ အဲဒီအချက်တွေဟာ Contrast (ကွဲပြားခြားနားခြင်း)ကို လက်တွေ့ အသုံးပြုထားမှုပါပဲ။အဲဒီလိုပြုလုပ်လိုက်ပြီး အခြားဆိုင်တွေထက် သိသာထင်ရှားစေချင်တဲ့ ပြဿနာကို ပြေလည်အောင် ဖြေရှင်းပေးခဲ့ပါတယ်။ အဲဒီအနားကို ရောက်လာတဲ့ လူတိုင်းဟာ အခြားဆူညံနေတဲ့ အဆောက်အအုံမြင်ကွင်းတွေကို သတိမပြုမိဘဲ ရိုးရှင်းပြီး ငြိမ်သက်တဲ့ အဲဒီဆိုင်လေးကို ပိုပြီး သတိပြုမိစေပါတယ်။ ဒါဟာ နာမည်ကျော် ဗိသုကာကြီးတစ်ယောက်ရဲ့ Contrast ကိုအသုံးပြုထားတဲ့ ဂန္တဝင် ဗိသုကာလက်ရာ တစ်ခုလို့ဆိုရင် မမှားနိုင်ပါဘူး။
ပန်းချီအနုပညာရှင်တွေဟာ အထူးဂရုပြုစေချင်တဲ့ ဧရိယာအကြောင်းပြောကြမယ်ဆိုရင် စိတ်ဝင်စားမှုရဲ့ ဗဟိုချက်တစ်ခု၊ သို့မဟုတ် ဆုံချက် တစ်ခု အကြောင်း လိုပဲ အရေးထားပြောကြပါတယ်။
ဗဟိုကျနေတဲ့နေရာတစ်ခုမှာ အများသတိပြုစေလိုတာမျိုး ဖန်တီးချင်တဲ့အခါမျိုးမှာ Contrast ကိုအသုံးပြုခြင်းဟာ အင်မတန်ကို အကျိုးသတ်ရောက်မှုရှိပါတယ်။
Contrast ကိုအသုံးပြုခြင်းမှာ အထူးသတိထားရမယ့်အချက်ရှိပါတယ်။ အဲဒါကတော့ Too much contrast may destory the harmony and unity. ပါတဲ့။
အမှန်တကယ်ဆိုရလျှင် ကျနော်တို့ ဖော်ပြလိုတဲ့ အရာဟာ တသားတည်းဖြစ်နေတဲ့ အရာတွေကြားမှာ တမူကွဲထွက်ပြီး ထီးထီးထင်းထင်းကြီး ပေါ်လွင်နေသည်မှာ Contrast ဟုပြောနိုင်ပါသော်လည်း ဒီဇိုင်နာတစ်ယောက် အနေဖြင့် ထင်ရှားသိသာကွဲပြားစေရုံသာမက လူအများကိုပါ ရသတစ်ခုခုဖြင့် စိတ်ဝယ်စားဖွယ်ဖြစ်အောင် ဆွဲဆောင်နေစေဖို့လည်း လိုအပ်ပါသည်။ သီအိုရီသည် သီအိုရီသာဖြစ်သည်။ တကယ်လုပ်ဆောင်ချိန်၌ ဒီဇိုင်နာ၏ အတွေး၊ အသိ၊ စိတ်ကူး ဝိဉာဉ်တို့ ကျက်စားဖြန့်ကျက်မှုဖြင့်သာ အခြေခံ သဘောတရားများဖြစ်သော alike and different, order, basic geometry shapes, edges, comparing, environment, repetition, unity, balance, pattern, rhythm, harmony, composition အစရှိတဲ့ အချက်တွေကို အလိုက်သင့် အလျားသင့် ညီညွတ်မျှတအောင် စီစဉ်နိုင်မှသာ အကောင်းဆုံး ဒီဇိုင်းများကို ဖန်တီးနိုင်မည်ဟု ထင်မြင်မိပါကြောင်း။ အချုပ်အားဖြင့် ကျနော်တို့၏ ပတ်ဝန်းကျင်မှ အရာဝတ္ထုများ၊ အဆောက်အအုံများ၊ သဘာဝအတိုင်း တည်ရှိနေသော တော၊ တောင်၊ ရေ၊ မြေ များမှ Contrast ဖြစ်နေသော အချက်များကို လေ့လာစူးစမ်းရင်း Contrast သဘောတရားကို ပိုမိုနားလည်နိုင်အောင် လေ့လာနိုင်ကြပါစေ။

လေးစားစွာဖြင့်
MMO

ဟန်ချက်ညီခြင်း… (Balance)

2010-12-25T21:22:00.008+08:00

အခုတလော ကျနော်စာမရေးဖြစ်တာ အတော်ကြာပါပီ…။ သိုင်းလောကထဲဝင်ပြီး စိန်ခေါ်သံနွှဲလိုက်၊ နဂါးနိုင်ဓားလုလိုက် လုပ်နေခဲ့တာပါ..။ နောက် မထူးပါဘူးဆိုပြီး မိုက်လက်စနဲ့ ဖေ့စဘွတ်က မာဖီးယားဂိုဏ်းထဲဝင်ပြီး Job တွေလုပ်၊ Robbing တွေလုပ်ရင်း မာဖီးယားဂိုဏ်းမှာလည်း အတော်အတန်နေရာ ရလာခဲ့ပါပြီ…။ အဲဒီလိုအလုပ်တွေများနေတော့ ဖိုရမ်လေးကို ပြန်မကြည့်ဘဲ ပစ်ထားခဲ့တာ အတော်ကြာနေပါပြီ…။ ကိုယ်တစ်ယောက်ပဲ ပစ်ထားသလားမှတ်တယ်….။ ညီအကိုမောင်နှစ်မတွေကလည်း စိတ်ချရတယ်ဗျာ…။ တစ်ပို့စ်မှ တတ်မလာကြဘူး…။ အင်း ဒီပုံအတိုင်းဆို တို့ဖိုရမ်လေးတော့ ဟန်ချက်ပျက်တော့မယ်တိုတာ တွေးမိတယ်..။ ဘာလိုလိုနှင့် ဖိုရမ်လည်း တစ်နှစ်ပြည့်ခါနီးလာပါပြီ…။ ကျနော် စလုံးရောက်တာ အခုဆို တစ်နှစ်ပြည့်ပြီးသွားပြီပေါ့…။

ကိုယ်တွေ အကြောင်းကိုလည်း တွေးမိသွားတယ်။ လုပ်စမှာတော့ အားလုံးတက်တက်ကြွကြွပဲ။ ပို့စ်တွေ သူတင်လိုက်၊ ငါတင်လိုက်… အမယ် လန်ထွက်နေအောင် စိတ်ဓာတ်တွေမြူးနေလိုက်ကြတာ။ အတွေးတွေ ပလူပျံနေလိုက်ကြတာ…။ စိတ်ဆိုတာလည်း ခက်သားလား အစမှာတော့ ဟုတ်သလိုလိုနဲ့နောက်တော့လည်း ကျနော်တို့ မြန်မာတွေရဲ့ ထုံးစံအတိုင်း ကောက်ရိုးမီးလိုဖြစ်သွားကြတာပါ…။ ကိုယ်အပါအဝင်ပါလေ..။ ကိုယ်တိုင်လည်း မြန်မာဆိုတော့ မြန်မာစိတ်ဓာတ်အပြည့်အဝရှိတာပေါ့…။ ကိစ္စတစ်ခုကို စတင်ဖို့ လွယ်ကူပေမယ့် အဲဒါကို တည်မြဲအောင် ထိန်းသိမ်းနိုင်ဖို့ဆိုတာ အင်မတန်ခက်ခဲပါတယ်…။ ပါဝင်တဲ့သူတွေ စိတ်ဓာတ်တွေ ညီညတ်မှသာဖြစ်နိုင်တာပါ…။ အထူးသဖြင့် အများနဲ့လုပ်တဲ့ အလုပ်တွေမှာပိုဆိုးပါတယ်…။ ကိုယ့်ကိုယ်ကို ပြန်ဆန်းစစ်တော့လည်း စိတ်ဓာတ်ပြည့်ဝမှု အတော်လိုအပ်နေသေးတာ တွေ့ပြန်ရော…။ ခေါင်းဆောင်နိုင်မှုဆို ဝေလာဝေးဖြစ်နေရော…။

စိတ်တွေ ရှုပ်ထွေးပြီး အတွေးတွေ ပွားနေမိတယ်….။ စိတ်ထဲမှာ မကောင်းတာတွေ၊ အပျက်ဘက်တွေပဲ တွေးနေမိတော့တယ်…။ ဒီမှာ စိတ်ထဲကပေါ်လာတာက Balance ဟန်ချက် ဆိုတာလေးပဲ။ Architectural Elementary တွေရေးဖြစ်နေတာ အတော်ကြာပါပြီ။ ခုဟန်ချက် Balance ဆိုတာလေးအကြောင်းရေးဖို့ ဟန်ပြင်ရင်း စိတ်ထဲပေါ်လာတဲ့ ကိုယ်တွေရဲ့ ဟန်ချက်ပျက်နေမှု။ နောက်ပြီး ကိုယ်တိုင်ရဲ့ စိတ်ထဲမှာ ပေါ်လာတဲ့ အဆိုးမြင် ဟန်ချက်တွေ အလေးသာနေမှုကို စိတ်ထဲမှာ တွေးဆလိုက်မိတယ်…။ ဘာဖြစ်ဖြစ် ဘယ်သူမရေးရေး၊ ဘယ်သူမလုပ်လုပ် အဓိက ငါလုပ်နေဖို့ပဲ လိုတာမဟုတ်လား ဆိုတဲ့အတွေးလည်းခေါင်းထဲမှာပေါ်လာတယ်…။ ကိုယ်ရဲ့ အလေလိုက်တဲ့ဘက် အလေးသာနေတဲ့ စိတ်ဓာတ်ဟန်ချက်တွေလည်း ဖိုရမ်မှာ ပြန်ပြီး ချိန်ညှို့ထည့်ပေးရအုနး်မှာပေါ့…။

ဟန်ချက်အကြောင်းပြောဖို့ စဉ်းစားမိတော့ ဆပ်ကပ်တွေက ကြိုးတန်းလျှောက်သမားတွေကို ပြေးမြင်မိတယ်…။ ကြိုးတန်းတစ်ခုပေါ်မှာ မယိမ်းယိုင်အောင် လျှောက်လှမ်းဖို့ လက်တွေဘယ်ညာယိမ်းပြီးထိန်းတာဖြစ်ဖြစ်၊ တုတ်တံတစ်ချောင်းကိုကိုင်ပြီး ဘယ်ညာညီအောင်၊ ဟန်ချက်မပျက်အောင် ထိန်းတာဖြစ်ဖြစ် လုပ်တတ်ကြတယ်..။ အဲလိုလုပ်နိုင်မှသာ ပြုတ်ကျမှုမဖြစ်နိုင်မှာပါ..။ စက်ဘီးစီးတာ လူတွေရဲ့ လမ်းလျှောက်တာ ပြောရရင် လောကကြီးတစ်ခုလုံးဟာ အရာရာတိုင်းမှာ ဟန်ချက် Balance တွေ ထိန်းညှိုထားတာမဟုတ်လား။ ဒါကြောင့် balance ဆိုတာ နေရာတိုင်းအတွက် အင်မတန်အရေးပါတဲ့ အရာပါ…။ ဗုဒ္ဒရဲ့ မစ္ဇျိမပဋိပဓာဆိုတာ ဘယ်အရာမှ အစွန်းမရောက်ဖို့ အရာရာ Balance ဖြစ်အောင်သတိနဲ့နေဖို့ သင်ကြားခြင်းပဲမဟုတ်ပါလား…။ ဒီတော့ Balance ရဲ့အရေးပါမှုဟာ ဘယ်လောက်အထိ နက်နဲသလဲ သိသင့်သလဲဆိုတာ ခန့်မှန်းနိုင်လောက်မှာပါ..။

ဗိသုကာပညာမှာလည်း Balance ရဲ့အရေးပါမှုဟာ အထူးပြောဖို့လိုမယ်မထင်ပါဘူး..။ အဆောက်အအုံတွေ၊ ဘလောတွေကို အခြားအရာတွေနှင့် Balance ဖြစ်အောင် ချိန်ညှိုပုံအမျိုးမျိုးနဲ့ အမြင်မှာ ဟန်ချက်ညီအောင် အစီအစဉ်ပြုလုပ်ပေးနိုင်ပါတယ်။ ဗိသုကာတွေဟာ သူတို့ဒီဇိုင်းတွေမှာရှိတဲ့ Balanceကို စဉ်းစားတဲ့အခါ အရင်ဆုံး Symmetric (ခေါက်ချိုးညီခြင်း) နှင့် Asymmetric (ခေါက်ချိုးမညီခြင်း) ဘယ်ဟာကိုသုံးမလဲ စဉ်းစားဆုံးဖြတ်ကြပါတယ်။ ကလေးတွေဟာ ငယ်စဉ်ပညာသင်ကြားချိန်မှာဖြစ်ဖြစ်၊ ကစားချိန်မှာဖြစ်ဖြစ် Symmetric နှင့် Asymmetric ကို အလိုလို ပြုလုပ်တတ်ပါတယ်။ နောက်မှသာ ပိုမိုအဆင့်မြင့်တဲ့ balance အကြောင်းတွေကို ရှင်းလင်းသေခြာ နားလည်နိုင်အောင် လေ့လာသင်ကြားကြရတာပါ။ အဲဒီတော့ ဗိသုကာတွေဟာ သဘာဝအားဖြင့် Symmetrical Design တွေကို သင်ယူပြီးဖြစ်နေတတ်ပါတယ်…။ Balance ကို ပန်းချီပညာရှင်တွေကတော့ Asymmetrical Balance ကို Informal လို့ခေါ်ဆိုကြပြီး Symmetrical Balance ကို Formal လို့ အမျိုးအစားခွဲ ခေါ်ဆိုတတ်ကြပါတယ်။

ဒီ Balance Concept ကို လက်တွေ့ရှင်းလင်း ပြောပြရာမှာ Balance Scale က အံ့သြဖွယ်ကောင်းအောင်နားလယ်လွယ် ပါတယ်။ ပုံမှာ ပြထားသလို သစ်သားချောင်းကလေးနှင့် တြီဂံတုံးလေးတစ်တုံး တို့ဖြင့် ပြသနိုင်ပါတယ်။ သစ်သားချောင်းအလယ်မှာ ပုံမှာပြထားသလို အချိုင့်ကလေး ပြုလုပ်ပေးထားပါ…။ သစ်သားချောင်းလေးအရွယ်အစားကို ၁၂ လက်မ ကနေ ၁၈ လက်မ အတွင်းလောက်ထားပြီး ပြုလုပ်မယ်ဆိုအဆင်ပြေ နိုင်ပါတယ်…။ အရွယ်အစားအမျိုးမျိုး၊ အလေးချိန် အမျိုးမျိုး သော သစ်တုံးကလေးတွေ၊ ပစ္စည်းကလေးတွေ ကို တဖက်တချက်စီမှာ ထားပြီး စမ်းသပ်လေ့လာနိုင်ပါပြီ။ အလေးချိန်တူ အရွယ်အစားတူတဲ့ တုံးလေးတွေကို ဘယ်ညာ အကွာညီညီထားခြင်းဟာ Symmetrical Balance သို့မဟုတ် Formal Balance ဆိုတာကို ပြသခြင်းပါ။ နောက်ဆုံးပုံမှာလို အရွယ်မညီ အကွာအဝေးမညီသော်လည်း တဖက်နှင့်တစ်ဖက် အလေးချိန်ညီမျှနေခြင်းဟာ Asymmetrical Balance သို့မဟုတ် Informal Balance ပါပဲ။
အဆောက် အအုံ ဒီဇိုင်းများမှာလည်း အခုလို Balance တွေကို ချိန်ဆ အသုံးပြုနိုင်ပါတယ်။

အခြား Balance နှင့်ပတ်သတ်ပြီး နားလည်အောင် လေ့လာနိုင်တာတွေ များစွာရှိပါတယ်။ ရေကူခြင်း၊ စက်ဘီးစီးခြင်း၊ လမ်းလျှောက်ခြင်း စတဲ့ လှုပ်ရှားမှုတွေ မှာလည်း Balance ရဲ့ အခြေခံတွေပါ။ နောက် ခြေတဖတ်တည်း မတ်တပ်ရပ်ခြင်းမှာ ခန္ဓာကိုယ်က မယိုင်မလဲ အောင် ဘယ်လိုတွေ Balance လုပ်ထားသလဲ။ ကိုယ်လက်လှုပ်ရှားမှုလေ့ကျင့်ခန်းတွေမှာ ခန္ဓာကိုယ်မှာဖြစ်နေတဲ့ Balance တွေ ဘယ်လိုလဲဆိုတာ လေ့လာနိုင်ပါတယ်။

အဲဒီနောက်မှာတော့ Balance ရဲ့ feeling ခံစားမှုကို ဗိသုကာလက်ရာတွေ၊ မဂ္ဂဇင်းတွေမှာပါလာတဲ့ ဓာတ်ပုံတွေ ပန်းချီကားတွေကနေ တဆင့် အကောင်းဆုံးခံစားလေ့ကျင့် လေ့လာနိုင်ပါတယ်…။
အခုဆိုရင် Balance အကြောင်းကို သဘောပေါက်နားလည်နိုင်လောက်ပြီ ထင်ပါတယ်။

Balance ဆိုတာကို အခြားနေရာတွေမှာပါ ဖြန့်ကျက်တွေးတော စဉ်းစားနိုင်ပါတယ်။ နိုင်ငံ တစ်နိုင်ငံရဲ့ နိုင်ငံရေးတွေ၊ လှုမှုရေးတွေ၊ စီးပွားရေးတွေမှာ Balance ဖြစ်ခြင်းမဖြစ်ခြင်း စသဖြင့်လည်းကောင်း၊ အိမ်တစ်အိမ်ရဲ့ ဝင်ငွေထွက်ငွေ Balance ၊ အားကစားပြိုင်ပွဲတစ်ခုမှာ ပြိုင်ဘက်အချင်းချင်းရဲ့ ယှဉ်ပြိုင်မှု Balance စသည်ဖြင့် လည်းကောင်း အမျိုးမျိုး ချိန်ဆမှန်းဆ၊ တွေးတောရင်းဖြင့် Balanceရဲ့အကြောင်းများများလေး အတွေးပွားနိုင်တယ်ဆိုတာ ပြောရင်း ကျနော်ကိုယ်တိုင်လည်း စိတ်နှင့် ကိုယ်ခန္ဓာ ကျန်းမာရေး အတွက် Balance ညီမျှအောင် ဂရုပြု နေထိုင်ဖို့ စဉ်းစားနေမိပါတော့တယ်ခင်ဗျာ…။

လေးစားစွာဖြင့်

MMO

မြန်မာပြာသာဒ်များကို တီးခေါက်ခြင်း(၂)

2010-10-02T18:23:00.005+08:00

မဲမှောင်နေသော ပတ်ဝန်းကျင်ကြောင့် စိတ်ထဲမှာ လွမ်းသလိုလို ဆွေးသလိုဖြစ်နေသည်။ ကျနော့ ပင်ကိုယ် စိတ်ကပင် အလွမ်းကို အားသန်သည်လားမသိပါ...။ တခုခုအကြောင်းရှာပြီး လွမ်းနေချင်တတ်တာ ဝါသနာပါနေသည်။ မိုးလေး အုံ့ရင်လွမ်းသည်။ လေပြေလေး တိုက်ရင်လွမ်းသည် သစ်ရွက်ကလေးတွေ လေအဝှေ့လွင့် ဝဲသွားတာ မြင်ရရင်လည်းလွမ်းတတ်သည်။ ကိုယ့်မွေးရပ်မြေကလည်း ကန်ရေသောက်၊ မြက်ခြောက်စားလို့ အပြောခံရအောင် ခိုးခိုးခေါင်ခေါင်ရှားပါးဒေသမဟုတ်လား။ ဒါပေမယ့် ဘယ်လိုဖြစ်ဖြစ် ကိုယ့်မွေးရပ်မြေကိုတော့ မမေ့နိုင်တာကတော့ အမှန်ပင်။
စိတ်ထဲမှာ အားရပါးရ လွမ်းနေတုန်း ဖုန်းမြည်သံကြောင့် အတွေးတွေပျောက်သွားပြီး ဖုန်းကိုကိုင်လိုက်တော့ ဘော်ဒါကြီး MTZO ပင်။
“အော်.... တတ်လာခဲ့ဗျာ... ငါးထပ်လေ... ကျနော် အပြင်ကထွက်စောင့်နေမယ်... အိုကေနော်...”
တံခါးသော့ယူလိုက်ပီး အခန်းထဲက ထွက်ကာ အိမ်တံခါးဖွင့်ပြီး MTZOကို စောင့်နေလိုက်သည်။
“ဘယ်ကလှည့်လာတာလဲဗျ...”
“ခင်ဗျားဆီပဲ တမင်ဝင်လာခဲ့တာဗျ...”
“အင်းထိုင်အုန်းဗျာ... ကျနော်... အခန်းလေးနည်းနည်းရှင်းလိုက်အုန်းမယ်...”
“မိုးလေးနည်းနည်းအုံ့တော့ စိတ်ထဲ လွမ်းချင်သလိုလိုပဲဗျာ...”
“အဟုတ်ပဲဗျာ.... ကျနော်လည်း အဲလိုဖြစ်နေတာ... ဘာကိုလွမ်းမှန်းမသိလွမ်းနေမိတာဗျ... အဲလိုလွမ်းမိရင် ရှေးကသီချင်းစာသားလေးတွေ စိတ်ထဲသတိရမိ တတ်တယ်ဗျ...”
“ဟုတ်လား လုပ်စမ်းပါအုန်း ဘယ်သီချင်းစာသားများလဲ...”
“အသက်ကလေးရယ် ရှည်စေလို... မြနန္ဒါနေညိုသန်းတယ်... မန်းတောင်ရိပ်ခိုဆိုတဲ့ သီချင်းပဲဗျာ... ကျနော်လည်း တပိုင်းတစပဲရတာဗျ...”
“အင်း... ကျနော်လည်း ကိုယ်မြို့ကိုယ့်ရွာ ကိုလွမ်းတာပဲဗျာ... အထူးသဖြင့် ကျနော်တို့ လင်မယား တပြည်တရွာ လာရှာနေချိိန် မိဘတွေနှင့် ကင်းကွာနေတဲ့ ကလေးအတွက်လည်း တခါတခါ စိတ်မအေးရဘူးဗျာ....”
“ဟုတ်တယ် ကိုသန့်ဇင်ရာ... တွေးရင်ဆွေးစရာတွေ အများကြီးပါဗျာ... တတ်နိုင်သမျှတော့ မဆွေးဖြစ် မလွမ်းဖြစ်အောင် နေရတာပဲ...။”
“ဒါနဲ့ ဒီနေ့ ဘယ်သွားစရာရှိသလဲဗျ...”
“အထူးတော့ မရှိဘူး”
“ဒါဆိုကျနော်တို့ ဖိုရမ်အတွက် တချို့စာ မပြတ်တာလေး တွေ လုပ်စမ်းပါအုန်းဗျာ...”
“အင်း ဟုတ်တယ်ဗျာ အတော်များများ တိုးလို့တန်းလန်းတွေ ဖြစ်နေတာ များတယ်... ဘယ်အကြောင်းဆက်ရင် အဆင်ပြေမလဲဗျ...”
“ကျနော်ပြန်ကြည့်ထားတာမှာ ဟိုတလောကပြောခဲ့ဖူးတဲ့ ပြာသာဒ်အကြောင်း သတိရမိတယ်ဗျာ... ပြာသာဒ်ရဲ့ အခေါ်အဝေါ် အစိတ်အပိုင်းတွေ အကြောင်းပြောမယ်ဆိုတာ အဲဒါ ဘာမှ ဆက်မလာတော့ တိုးလို့တန်းလန်းကြီး အတော်ဆိုးသဗျ....။”
“အင်း...ဟုတ်ပါပြီဗျာ...”
“ဒါဆိုပြာသာဒ်အစိတ်အပိုင်းတွေ ဘယ်နှစ်မျိုးရှိသလဲကစပြောဗျာ”
“ ပြာသာဒ်အစိတ်အပိုင်းကို အကြမ်း ၅ ပိုင်းခွဲပြီး ပြောလို့ရတယ်ဗျာ....”
“အင်း....ဆိုပါအုန်း ဘာတွေလဲဆိုတာ”
၁။ ထီး
၂။ ထုပိကာ
၃။ ကလပ်
၄။ ဘုံ အဆင့်များနှင့်
၅။ မုခ် ဆိုပြီး အကြမ်းဖျဉ်းခွဲ ထားတယ်ဗျ...”
“ဒါတင်ပဲလားဗျ... ကျနော်တွေ့တာတော့ ရှုပ်ရှပ်ခက်နေတာပဲဗျာ...”
“လာမယ်လေဗျာ လောရန်ကော ကိုယ့်လူရယ်...”
ဒီမှာ ဒီပုံလေးကိုကြည့်ဗျာ....

“အပိုင်း ၁ မှာပါတဲ့ ထီးတော် မှာ စိန်ဖူး၊ ငှက်မြတ်နား၊ နှင့် ထီးတော်ရဲ့ ဘုံအဆင်တွေပေါ့... အဲဒါ ထီးမှာ ပါတဲ့ အကြမ်းအစိတ်အပိုင်းတွေ။
အပိုင်း ၂ ထုပိကာ မှာ ငှက်ပျောဖူးပုံ ရှည်မျောမျော ထီးတော်အောက်ခြေကအပိုင်းပဲဗျ...။ ထုပိကာမှာ ကြက်သွန်ခေါင်း၊ ဇိလို့ခေါ်တဲ့ (လည်)၊စတာတွေနှင့် ငှက်ပျောဖူး အောက်ခြေနား ဖောင်းဖုသွားတဲ့ နေရာကို တင်းလို့ခေါ်တယ်...။
အပိုင်း ၃ ကလပ်မှာတော့ ကြာမှောက်၊ကြာလှန်၊ အပေါ်ခလုတ်၊ အောက်ခလုတ်၊ နောက် ရာမလက်ညှိုး ၊ နောက် ကလပ်ပန်းဆွဲ- မုံလာဖတ် စတဲ့ အစိတ်အပိုင်းတွေ ပါလာတယ်..။
အပိုင်း ၄ ဘုံအဆင့်တွေမှာ ဘုံအဆင့်အဆင့်တွေနှင့် သူနှင့်ဆိုင်တဲ့ ဒုရင်တွေ၊ ထောင့်ပန်းတွေ မုခ်ပန်းတွေပါတယ်ဗျ...။ ဘုံအဆင့်တွေမှာ ခေါင်မိုးတွေကို ရေဆင်းလို့ခေါ်တယ်...။ ခေါင်အုပ်လေးတွေ နေရာမှာ တချို့ ပြာသာဒ်တွေမှာ ကြက်မောက်တန်းလို့ခေါ်တဲ့ ခေါင်အုပ်ကို အလှဆင်ထားတဲ့ ပန်းလေးတွေ တွေ့နိုင်တယ်...။ မုခ်ပန်းမှာ ပါဝင်တဲ့ အစိတ်အပိုင်းတွေ၊ ဒေါင့်ပန်းတွေမှာ ပါတဲ့ အစိတ်အပိုင်းတွေ အဲဒါတွေကိုလည်း သူ့အစိတ်အပိုင်းအလိုက် အခေါ်တွေရှိသေးတယ်...။
အပိုင်း ၅ မုခ်မှာ အောက်ဆုံးအဆင့်ဆိုရင် မုခ်ထပ်၊ မုခ်ထွက်- ယွန်ဆက်လို့ ခေါ်တဲ့ မုခ်ပေါက်ကို တန်ဆာဆင်ထားတာတွေ အဆောင်အကူးမှာ တန်ဆာဆင်တာတွေ ရှိသေးတယ်...။
“အင်း အတော် စိတ်ဝင်စားစရာပဲဗျာ... ဒါနဲ့ ပြာသာဒ်လုပ်ရင် သတိထားရမယ့်အချက်လေးတွေလည်း သိချင်သေးသဗျ၊ နောက် သူ့ရဲ့ အချိုးနှင့် အရွယ်အစားတွေရော ဘယ်လိုပိုင်းသလဲ... အဲဒါတွေလည်း လုပ်စမ်းပါအုန်း...”
“ အင်း... ပြာသာဒ်ပုံစံထုတ်ရင် ပထမဘုံ အဲ Floor Plan ကနေအခြေတည်လာမယ့် ခန်းဖွင့်ကို အခြေခံထားပြီး စဉ်းစားတယ်ဗျ...။ အဲဒါပထမ အချက်။ နောက် ဒုတိယအနေနှင့် ဘုံဘယ်နှဆင့်လုပ်မလဲဆိုတဲ့ ဘုံဆင့်အရေအတွက်...။ အများအားဖြင့် ဘုံဆင့်တွေကို မြန်မာပြာသာဒ်တွေမှာ မဂဏန်းတွေပဲ ထားတာများတယ်...။ သုံးဘုံကိုအနည်းဆုံးထားပြီး...။ ၃ ၊ ၅ ၊ ၇ ၊ ၉ ၊ ၁၁ ၊ ၁၃ အစဉ်အတိုင်း ထားတတ်ကြတယ်။ ၁၃ ဘုံအထိတော့ အများဆုံးထားတာပဲဗျာ...။ ပြာသာဒ်ကို စုံဂဏန်းမတွေ့ရဘူးလို့ ပြောတယ်ဗျ...။ တတိယ အချက်ကတော့ အတော်လေးအရေးကြီးတယ်...”
“ အင်းဆိုစမ်းပါအုန်း...။”
“ပြာသာဒ် အတင်း၊ အပျော့ကိုရွေးတာပဲ ၊ အတင်းဆိုတာ အဖြောင့်ပြာသာဒ်ကိုဆိုချင်တာ၊ အပျော့ဆိုတာ ခပ်ကွေးကွေးပြာသာဒ်ပေါ့...။”
“ဘယ်လို... သိပ်မရှင်းဘူးဗျာ... ဘယ်နေရာ ကွေးပြီး ဘယ်နေရာ ဖြောင့်တာလဲ...။”
“ဒီလိုဗျာ ပြာသာဒ်ဘုံ အဆင့်တွေမှာရှိတဲ့ အမိုးစွန်း အချွန်လေးတွေရဲ့ ထိပ်တွေကို မျက်လုံးနှင့် မှန်းပြီး မျဉ်းလေးဆွဲလိုက်ရင် ဖြစ်လာတဲ့ မျဉ်းကြောင်းလေးရဲ့ အကွေး၊ အဖြောင့်ကို ဆိုချင်တာ...။ အဲဒီမျဉ်းလေး ကွေးတယ်ဆိုရင် အပျော့ ပြာသာဒ်၊ အဲဒီမျဉ်းလေး ဖြောင့်နေတယ်ဆိုရင် အတင်းပြာသာဒ်ပေါ့...။ ပုံလေးနှင့် ဆိုရှင်းသွားလိမ့်မယ် ဒီပုံလေးကြည့်လိုက်ဗျာ...။

“အင်း ဒီလိုဆိုတော့ ပိုရှင်းသွားတယ် MMO ရေ... ဒါနဲ့ ဘုံအဆင့်တွေကိုရော ဘယ်လိုပိုင်းသလဲ...”
“ဘုံပိုင်းတာကတော့ ခုနပြောထားတဲ့ Floor Plan ပထမဘုံမှာရှိတဲ့ အခန်းဖွင့် အခန်းအကျယ်... အဲ... တိုင်တွေရဲ့ အလယ်အတိုင်းအတာကို အခြေတည်ရတယ်...။
မြန်မာအခေါ် column တိုင်တွေကို ကွန်းတိုင်လို့ ခေါ်သဗျ...။ အဲဒီ ကွန်းတိုင်တွေနှင့် ခန်းဖွင့် တိုင်းပြီး Eave Line အမိုးစွန်းဘယ်လောက်ထွက်မလဲ ဆိုတာ တွက်ပြီး အဲဒီအမိုးစွန်း ဘယ်ညာနှစ်ဘက်ပါ ပေါင်းထားတဲ့ အလျားကို အခြေခံ အနေနဲ့သုံးတယ်...။ အဲဒီအနားကို L လို့ သတ်မှတ်မယ်ဆိုရင် ပြာသာဒ်ရဲ့ အမြင့်ကို ငါးမတ်ချိုး(၁ ၁/၄ ဆ) ၊ တစ်ပြန်ခွဲချိုး (၁ ၁/၂ဆ)၊ မတ်တင်းချိုး (၁ ၃/၄ )၊ နှစ်ပြန်ချိုး (၂ ဆ) ဆိုပြီး အချိုးတွေ သတ်မှတ်ထားကြတယ်...။ ကျနော်ပုံလေးနှင့် ပြလိုက်မယ် ဒီမှာ ကြည့်လိုက်ဗျာ....။”

“လေးမျိုးတောင် ရှိပါလား...။”
“ဟုတ်တယ် ကိုသန့်ဇင်”
“အချိုးအမျိုးမျိုးရှိတာတော့ ဟုတ်ပါပြီ အဲဒါတွေကို ဘယ်နေရာမှာ ဘယ်အချိုးသုံးသလဲ ဆိုတာပြောအုန်းဗျာ...။”
“ငါးမတ်ချိုးနှင့် တစ်ပြန်ခွဲချိုးတွေကို မြေပြင်ကနေ အမြင့်သိပ်မကွာတဲ့ အဆောက်အအုံတွေရဲ့ ထိပ်မှာ ပြာသာဒ်အဖြစ် ဆောက်တတ်ကြတယ်ဗျ...။ ဘုံအမြင့်တွေကတော့ ပြာသာဒ် ခန်းဖွင့်အလိုက် အကြီးအသေးကွာသွားတယ်...။ မြေပြင်ညီ တစ်ထပ် အဆောက်အအုံတွေမှာ အများအားဖြင့် ငါးမတ်ချိုးပဲ သုံးကြတယ်...။ အဲ...ခန်းဖွင့်အရမ်းကြီးလွန်းရင် တစ်ပြန်ခွဲ အချိုးပဲ ထားတတ်ကြတယ်...။ တစ်ပြန်ခွဲပဲထားမယ်ဆိုရင်တော့ ၁၀ပေ ကျော် ပတ်ဝန်းကျင်လောက် မြင့်တဲ့ ကုန်းမြင့်တွေပေါ်မှာ အဆောက်အအုံတည်ထားတာမျိုးဆိုရင် တစ်ပြန်ခွဲကိုပဲ လုပ်ပစ်လိုက်ကြတယ်...။”
“ဒါဆို မတ်တင်းနှင့် ၂ပြန်အချိုးတွေကို အရမ်းမြင့်တဲ့ အဆောက်အအုံတွေနှင့် တောင်ကုန်းတွေ၊ ကုန်းမြင့်တွေပေါ်မှာ ဆောက်ကြမှာပေါ့”
“ဟုတ်တယ်ဗျ... ကျနော့်အထင် အဲဒါက မျက်စိအမြင် vision အရ အချိုးကို ချိန်လိုက်တယ်ထင်တယ်ဗျာ...။ မန္တလေး နန်းတော်မှာရှိတဲ့ နန်းမြင့် မျှော်စင်လို အဆောက်အအုံတွေဆိုရင် အဲလို အချိုး များများထားပြီး ဆောက်တတ်ကြတယ်...။
“အင်းဗျာ...ရှေးက မြန်မာဗိသုကာကြီးတွေ အမြင်ကို ပသာဒဖြစ်အောင် ပြုရာမှာ အချိုးတွေ လိုသလိုကစားတတ်တဲ့ အသိက အတော်လေး စိတ်ဝင်စားဖို့ကောင်း သလို လေးစားဖို့လည်း ကောင်းတယ်နော်...။ ”
“ဒါပေါ့ ဗျာ... ဒီမှာ အောက်ကနမူနာ ပုံလေးကို ကြည့်လိုက်ဗျာ အဲလိုစီစဉ်တတ်ကြတယ်ဗျ....။”

“ဟုတ်ပါ့ဗျာ အချိုးဆိုတာလည်း သူ့နေရာ နှင့်သူထားတတ်မှဗျ... မဟုတ်ရင် မမြင့်မတင့်တာတွေ ဖြစ်နေတတ်တယ်...။”
“အေးဗျ... တချို့နားမလည်တဲ့သူတွေ ဆောက်ရင် မြေပြင်နိမ့်နိမ့်မှာ ၂ပြန်ချိုးပြာသာဒ်ကိုချိုးပြီး ဆောက်လိုက်လို့ကတော့ ပိန်ပိန်ချွန်ချွန်နှင့် အတော်အကြည့်ရဆိုးမယ်ဗျ... အရမ်းမြင့်တဲ့နေရာတွေမှာ ငါးမတ်ချိုးလောက်သာ ဆောက်ထားရင် ပုအိုက်အိုက်နှင့် အောက်ကနေကြည့်တဲ့သူ အတွက် ကသိကအောက်ဖြစ်နေမှာ သေချာတယ်ဗျ... ပြာသာဒ်ရဲ့ အလှကို အားပါးတရ ခံစားလို့ မရနိုင်တော့ သလိုဖြစ်သွားနိုင်တာကိုး...”
“ဒါတော့ ကျွမ်းကျင်ရာ လိမ္မာဆိုသလို ဆောက်လုပ်ဖူးတဲ့ ဗိသုကာတွေ အချိုးအစားနားလည်တတ်ကျွမ်းတဲ့ အာခီတတ်တွေ ဆောက်လုပ်ကြမယ်ဆို ကောင်းမွန်တဲ့ ပြာသာဒ်တစ်ဆောင ်ဖြစ်လာမှာပါဗျာ...”
“အေးဗျာ... ကျနော်တို့တွေလည်း တဖြည်းဖြည်းပဲ လေ့လာဆည်းပူးနေကြရတယ်... ကျနော့စိတ်ထဲ ခုထိဘာမှ ဟုတ်တိပတ်တိမတတ်သေးဘူးထင်နေတယ်ဗျာ... ထင်တာမဟုတ်ပါဘူးလေ... တကယ်လည်း မတတ်သေးတာပါ....”
“အဲလိုလည်း မဟုတ်သေးဘူးလေ... ခုကျနော့ကိုပြောပြတာတွေဟာ ခင်ဗျား အသိအတတ်တွေပဲပေါ့...”
“အော်ကျနော်ပြောတာလေးတွေက မြန်မာမှု ဗိသုကာပညာရဲ့ မစို့မပို့ အစိတ်အပိုင်းလေးလောက်ပါပဲ... ဆရာ့ဆရာကြီးတွေ ဆီမှာ နောင်များ ဆည်းပူးခွင့်ရမယ်ဆိုရင်တော့ ကျနော် ဝမ်းသာအားရ ဆည်းပူးချင်သေးတယ်ဗျာ...”
“အင်း အချိန်တန်လို့ ကျနော်တို့တွေ ပြည်တော် ပြန်ဖြစ်ကြမယ်ဆိုရင်ပေါ့ဗျာ...”
“ဟုတ်တယ်ဗျာ အဲဒီအချိန်ပဲ ဘယ်တော့ဖြစ်လာမလဲ ဆိုတာ တွေးနေမိတယ်... ကဲကျနော်တို့ တစ်ခုခုစားဖို့ အောက်ဆင်းကြရအောင်ဗျာ”
“ကောင်းပြီဗျာ အောက်နားက KFC ဆိုင်လေးပဲ ပြေးလိုက်ကြရအောင်ဗျိုုး..”
“အိုကေဗျာ”

လေးစားစွာဖြင့်
MMO

ပြာသာဒ်များကို တီးခေါက်ခြင်း

2010-10-02T18:18:00.006+08:00

မိုးလေး တစ်စိမ့်စိမ့်ရွာနေသည်မှာ လူကိုချမ်းစိမ့်စိမ့်ဖြစ်နေစေသည်…။ နံနက်စောစောကတည်းက ကိုယ်လက်မအီမသာဖြစ်နေသည်။ မထချင်သဖြင့် အိပ်ယာမှာပေအိပ်နေမိသည်..။ ထိုစဉ်ဖုန်းမှ Ring တုန်းမြည်သံက ကျယ်လောင်စွာထွက်လာသည်..။ စနေအလုပ်ဆင်းရသော မဟေသီဆီမှဖြစ်သည်။ လျှော်ထားသော အဝတ်တွေ မီးပူတိုက်ဖို့ အော်ဒါအောက်နေခြင်းဖြစ်သည်…။ ဟူးးး မထချင်ထချင်ဖြင့်ထရအုန်းမည်…။ ရေချိုးကာ နံနက်စာ မိုင်လိုဖျော်၍ ပေါင်မုန့်ချပ်လေးဖြင့် လွေးလိုက်တော့သည်..။ အဝတ်တွေကို မီးပူတိုက်ရင်း ဘော်ဒါကြီး MMO ကိုမျှော်နေမိသည်။
အိမ်ရှေ့မှ တံခါးခေါက်သကြားလိုက်သဖြင့် စိတ်ထဲ အတော်ရွှင်သွားသည်…။ မီးပူကိုထောင်ထားကာ အိမ်ရှေ့မှတံခါးသွားဖွင့်ပေးလိုက်သည်..။ မိုးရေစိုစွတ်လာသော MMO မှာ အပြေးအလွှား အိမ်ထဲဝင်လာသည်…။ အိမ်ထဲ ရောက်လျှင် အဝတ်ခြောက်များပေးပြီး အဝတ်လဲခိုင်းလိုက်သည်..။
“ဟားဟား ကိုယ့်လူက… မီးပူတွေ ကိုယ်တိုင် တိုက်လို့ပါလား…”ဟုပြုံစစဖြင့်မေးသဖြင့် မျက်နှာရှုံမဲ့ပြလိုက်မိသည်..။
“ဘယ်တတ်နိုင်မလဲ…ဗျာ.. သပ်သပ်ရပ်ရပ်လေး ဝတ်ချင်တော့ တိုက်ရတော့တာပေါ့… ကဲနားအုန်းဗျာ… ကျနော် လက်ကျန်အဝတ်လေးတွေ တိုက်လိုက်အုန်းမယ်…။”
…………
…………
“ဘယ်လိုလဲဗျ… မျက်မှောင်ကြီးကုတ်နေပါလား…”
“အင်းဗျာ… ပြဿနာဆိုတဲ့ အကြောင်းမီးပူတိုက်ရင်း စိတ်ထဲပေါ်လာလို့… ကိန်းဘရစ်အဘိဓာန်ထဲ မှာတော့
problem /”prQb.l@m/ /”prA:.bl@m/ noun [C]
1 a situation, person or thing that needs attention and needs to be dealt with or solved:
financial/health problems
2 a question in mathematics which needs an answer:
3 problem child/family, etc. a child, etc. whose behaviour is bad
.လို့ပြောထားတာပဲ…”
“အင်း ဟုတ်ပါပီဗျာ… ခင်းဗျာပြောမှ… ပြဿနာကို မြန်မာလို ဘယ်လိုရိုက်ရလဲလို့ ကျနော့ကို ခင်ဗျား မေးဖူးတာ ပြန်သတိရမိတယ်…”
“ဟား…ဟား…. လုပ်ပြီခင်ဗျားကတော့…”
“အင်း…ပြဿနာဘယ်လိုပေါင်းလဲ မေးတော့…. ခင်းဗျားမိန်းမအမည်ပေါင်းလိုက်ရင် ရတယ်ပြောလိုက်မိတာ… အဟီး… ကံကောင်းလို့ ၂ယောက်လုံး အဲဒီနေ့က ထမင်းအပြင်ထွက်မစားလိုက်ရတာ…”
“ဟုတ်ပါ့ဗျာ… ဒါနဲ့ ပြဿနာပြောလို့ ပြဿနာနှင့် ဆင်တဲ့ ပြာသာဒ်အကြောင်း သိချင်မိတယ်ဗျ… ခင်းဗျားက မန္တလေးမှာ လုပ်ဖူးတော့ ပြာသာဒ်အကြောင်းလေးတွေ တီးမိခေါက်မိမယ်ထင်တယ်…သိသလောက် ပြောစမ်းပါအုန်းဗျာ…..”
“ အင်း… ခင်ဗျားပြောမှ နန်းတွင်းထဲက ဗိသုကာရုံးမှာ ပုံဆွဲဘုတ်ပေါ်မှာ ဆွဲခဲ့ရတာတွေ ပြန်အမှတ်ရမိတယ်ဗျာ…. ပုံဆွဲရတာ ဇတ်ညောင်းရင် ရုံးနားအိမ်က ကောင်မလေးတွေ သွားငေးတတ်တာလည်း အမှတ်ရမိသွားတယ်… အဟဲ…”
“အမလေး… ကိုယ့်လူရယ် ပြာသာဒ်အကြောင်းမေးပါတယ်…. လွမ်းချင်းတွေများဖွဲ့မလို့လားဗျာ….”
“ကဲ… ဟုတ်ပါပြီဗျာ… ပြာသာဒ်အကြောင်းပြောမယ်ဆိုတော့ အရင်ဆုံး ပြာသာဒ်ဆိုတာ ဘာလဲက စပြောရမှာပေါ့….”
ဆရာ ဦးထွန်းမြင့် ပြုစုထားတဲ့ “ပါဠိသက်ဝေါဟာရများ အဘိဓာန်” မှာတော့ ပြာသာဒ်ကို - အမိုးဘုံအဆင့်ဆင့်ရှိသော အဆောက်အအုံ လို့ အဓိပ္ပါယ်ဖွင့်ထားတယ်ဗျ… နောက် မြန်မာစာအဖွဲ့ကထုတ်ထားတဲ့ အဘိဓာန်မှာလည်း - ဘုံ အဆင့်ဆင့်နှင့် ထုပိကာတင်ထားသော အဆောက်အအုံ လို့ ဖွင့်ထားသေးတယ်….”
“အင်း… ဟုတ်ပါပီဗျာ…. ဒါနဲ့ ပြာသာဒ်ဆိုတဲ့ စကားက ဘယ်ကနေဆင်းလာတာလဲ…. မြန်မာစကားစစ်စစ်ပဲလား..”
“အဲလိုမနောက်နဲ့လေ…. ခုနက ပါဠိသက်ဝေါဟာရ အဘိဓာန်လို့ပြောထားတဲ့ဟာ … ပါဠိကနေ ဆင်းလာတဲ့ ကိတ္တိမ မွေးစား စကားလုံးပေါ့…. ဒီလိုဗျ… အဲဒီပါဠိစကား ကလည်း “ပြသာဒ” ဆိုတဲ့ သက္ကတဘာသာကနေ “ပါသာဒ” ဆိုပီးတဆင့်ပြောင်းတယ်… အဲဒီကနေ “ပသာဒ” ဆိုတဲ့ ပါဠိစကားကိုပြောင်းလာခဲ့တော့တာလို့ ပညာရှိတွေဆိုကြသဗျ…. ပသာဒ ဆိုတာလည်း မြန်မာလို အကြည်ဓာတ်၊ ကြည့်၍ လှပပြေပြစ်ခြင်းလို့ အဓိပ္ပါယ်ရတယ်…။ အဲဒီ ပသာဒ ဆိုတဲ့ ပါဠိစကားကနေ ပြာသာဒ်ဆိုပြီးပြောင်းလာတာတဲ့… အဓိပ္ပါယ်ဖွင့်ရင်တော့ လှပတင့်တယ် ရှု့ချင်ဖွယ်ဖြစ်သည်။ ကြည့်ရှုဖွယ်ကောင်းသည်။ ဆိုတဲ့ အဓိပ္ပါယ်မျိုးဖွင့်ရမှာပေါ့ဗျာ…။
“အင်း…. ကိုယ့်လူက ပါဠိတွေ သက္ကတတွေနဲ့ ကိုင်ပေါက်တော့ ပြောသမျှ နားထောင်ရတော့မှာပေါ့ဗျာ… သိမှမသိပဲကိုးဗျ…။”
“အန်… သေသေချာချာ ဂဃ နဏ လည်း ပြောပြရသေးတယ်… မယုံသလိုလိုနဲ့… တင်းသွားပြီဗျာ…”
“ဟားဟား… စတာပါ ကိုယ့်လူရာ… ကဲ ဆက်ပြောပါအုန်း… ပြာသာဒ်အမျိုးအစားတွေရော ဘယ်နှစ်မျိုးရှိသလဲ…ဘယ်လိုပုံတွေလည်း ထပ်သိချင်သေးတယ်ဗျ…..”
“ အကြမ်းဖျင်းတော့ လေးမျိုးခွဲထားတယ်ဗျ…”
ပထမတစ်မျိုးက ထိပ်ဘုံတွေမှာ အဆင်တန်ဆာတွေဖြစ်တဲ့ ထုပိကာတွေ၊ မုခ်တွေ၊ ထောင့်တွေ မပါတဲ့ ပြာသာဒ်တွေပဲ… ပြောရရင် ပြာသာဒ် ကတုံးတွေလို့ ဆိုရင်ရမလားပဲဗျာ… အဟီး… အဲဒါတွေကို ပုဂံခေတ်မှာ အလုပ်များတယ်ဗျ…။
“အင်း နောက်ဒုတိယတစ်မျိုးကရော…”
“အဲဒါက ပထမ အင်းဝခေတ်မှာတွေ့ရတတ်တဲ့ ပြာသာဒ်တွေပဲဗျ… ထုပိကာပါလာတယ်…. နောက်ထောင့်ပန်းလေးတွေလည်းပါလာတယ်ဗျ…။ ဒါနဲ့… မြန်မာ့သမိုင်းမှာ အရေးပါတဲ့ ခေတ်တွေကိုရော သိလားဗျ….”
“အံမယ်…ဒါလေးလောက်တော့သိပါတယ်ဗျာ… ကျောင်းတုန်းက သမိုင်းမှာ ကဗျာတိုလေးနဲ့ သင်ထားလို့ ခုထိမှတ်မိနေသေးတယ်… ပု၊ပင်း၊ အင်း၊ တောင်၊ ညောင်ရမ်းနောင်၊ ကုန်းဘောင် နှစ်ခေတ်ခွဲတဲ့..ဟုတ်တယ်မဟုတ်လား…။”
“ဟုတ်ပါ့ဗျာ … ဒါနဲ့ တတိယတစ်မျိုးဆက်ပြောအုန်းမယ်… အဲဒါက ခိုနန်းချိုးပြာသာဒ်လို့ခေါ်တဲ့ ဒေါင့်ချိုးတွေပါလာတဲ့ ပြာသာဒ်တွေပဲ…။ အဲဒါတွေကိုတော့ ဟံသာ၀တီခေတ်နှင့် ဒုတိယအင်းဝခေတ်တွေမှာ အတွေ့များတယ်….။ စတုတ္ထကတော့ ကုန်းဘောင်ခေတ်ကနေ ခုထိဆောက်နေကြတဲ့ လေးထောင့်စက်စက်ပြာသာဒ်တွေပဲဗျ…။ အဲဒီ ပြာသာဒ်တွေမှာ ထုပိကာ၊ မုခ်တွေနှင့် ထောင့်တွေတိုင်းမှာ ထောင့်ပန်းတွေ မုခ်တွေမှာလည်း မုခ်ပန်းတွေ ပါလာတယ်… အဲဒါတွေကို ဘုံ အဆင့်တိုင်းမှာ တပ်ဆင်ထားတယ်ဗျ….”
“ ဒါနဲ့ ခိုနန်းချိုးဆိုတာ ဘယ်လိုဟာမျိုးလဲဗျ…”
“အော်… ခိုနန်းချိုးဆိုတာ ဒီလိုဗျာ… ပုံလေးနှင့်ကြည့်လိုက်ရင်ပိုရှင်းသွားမယ်…ဒီအောက်ကပုံကိုကြည့်ဗျာ…. ပုံမှာတွေ့သလို ထောင့်တွေကို အကွာအဝေးညီညီ အချိုးချိုးထားတာကို ခိုနန်းချိုးလို့ခေါ်တာပဲဗျ…ချိုးလိုက်တဲ့အနားတစ်ခုဖြစ်ဖြစ် နှစ်ခုဖြစ်ဖြစ် အနားညီညီချိုးထားရင် ခိုနန်းချိုးလို့ ခေါ်တယ်ဗျ… တကယ်လို့ အဖက်ကသေးတစ်ဖက်ကြီးပုံစံမျိုး ချိုးထားရင် “တင်း”လို့ခေါ်တယ်….။

“ အင်း ခုလိုဆိုတော့ ရှင်းသွားပါပြီဗျာ… ဒါနဲ့ ပြာသာဒ်တွေကို အဆင့်ဘယ်နှစ်မျိုးစီ ဆောက်တတ်ကြသလဲ…”
“များသော အားဖြင့်တော့… အနည်းဆုံး ၃ဘုံကနေ၊ ၅ဘုံ၊ ၇ဘုံ၊ ၉ဘုံ၊ ၁၁ဘုံ၊ ၁၃ဘုံ၊ ဆိုပြီး မ ဂဏာန်းဘုံတွေပဲ တည်ဆောက်ကြတယ်ဗျ…”
“အင်း… အတော်လေးတော့ တီးမိခေါက်မိသွားတယ်ဗျာ… ခင်ဗျားလည်း ဗိုက်ဆာနေလောက်ပြီ အပြင်သွားပြီး တစ်ခုခုစားကြရအောင်ဗျာ… အပြင်မှာမိုးလည်း တိတ်သွားပြီ…။”
“ကောင်းသားပဲဗျာ….”
“နောက်အပတ်လာရင်တော့ ပြာသာဒ်အစိတ်အပိုင်းတွေရဲ့ အခေါ်အဝေါ်တွေ ဆွဲသားပုံတွေ မေးအုန်းမယ်ဗျာ…”
“ဟုတ်ပါပြီဗျာ… ကျနော်လည်း သိတာလေးတွေ ပြောရတော့ ကျေနပ်မိသဗျာ…ကျနော်တို့ အသိပညာ ဖလှယ်ရတာ အတော်လေး အကျိုးများတယ်…၊ လူတစ်ယောက်ကမေးလို့ ဖြေရင်း ကိုယ်တိုင်လည်း ပိုအသိတိုးသွားသလို ကျနော်ကတော့ ခံစားရတတ်တယ်…”
“အင်းဟုတ်ပ… ကျနော်လည်း အဲလိုမျိုး စိတ်ထဲ ဖြစ်ရတာပဲ….”
“ ကျနော်တို့တွေလည်း နိုင်ငံရပ်ခြားမှာ နေထိုင်လုပ်ကိုင်ရင်း တဖက်တလမ်းကနေ အသိပညာတွေ တိုးအောင် ကြိုးစားနေရတယ်ဗျာ… ကျနော်တို့တွေ ပြန်ရက်ဘယ်တော့များမှ နီးမလဲမသိသေးဘူး MTZO ရာ…”
“ခု ချိန်ထိတော့ ဆရာမြသန်းတင့် ရဲ့ ဝတ္ထုကြီးလိုပဲ - ရွှေပြည်တော် မျှော်တိုင်းဝေး- ဖြစ်နေတုန်းပဲ တင်တယ်ဗျာ…၊ ပြောရင်း ကျနော့်စိတ်ထဲ အမိမြေကို လွမ်းမိသလို အမိမြေက စေတီပုထိုးကျောင်းကန်တွေက လှပခန့်ညားတဲ့ ပြာသာဒ် ဘုံအဆောင်တွေလည်း ယော်ရမ်းမိတယ် MMO ရာ…”
“အင်း… ငယ်ငယ်က ဗုံကြီးသံ ကဗျာလေးတောင် အမှတ်ရမိတယ်…”
“လုပ်စမ်းပါအုန်း…”
“ ရွှေဘုန်းတော် တိုးပါလို့ … ငွေမိုးတွေ…. ရွာ…..
နိုင်ငံတော် ပြည်အရေးက…. သာလှတယ်လေး…. ”
……..
ပြည်ရွှေဘို မြို့တော် မြောက်ဆီက ……..
ပြည်ရွှေဘို မြို့တော် မြောက်ဆီက …….
………………..
………………..
…………
သာလှတယ်လေး……..
…………….

အသံဝါကြီးနှင့် ဆွဲဆွဲငင်ငင် လေးလေးပင်ပင် ဆွေးဆွေးမြေ့မြေ့ သီဆိုနေသော MMO ကိုကြည့်ကာ ကျနော်စိတ်မောစွာ သက်ပြင်းအကြိမ်ကြိမ်ချနေမိသည်…။
MMO မှာ တဘက်သို့မျက်နှာလှည့်ကာ မျက်တောင်ပုတ်ခတ်ပုတ်ခတ် လုပ်နေပါတော့သည်…။
ကောင်ကင်တပြင်လုံးမှာတော့ ဖြူလွလွတိမ်စိုင်တို့ကား ပြေးလွှား လှုပ်ရှားရင်း… အာကာတစ်ခွင်လုံး ဖုံးလွှမ်းဖို့ရန် ကြံစည်နေသည်ထင်မိပါတော့သည်…။

လေးစားစွာဖြင့်

MMO&MTZO

ထပ်တလဲလဲ ပြုလုပ်ခြင်း

2010-03-24T11:03:00.005+08:00

ထပ်တလဲလဲ ပြုလုပ်ခြင်း (Repetition)

Repetition လုပ်ခြင်းကို ကျနော်တို့တွေ အတော်များများ တွေ့ဖူးကြမှာပါ...။ အဆောက်အအုံ planning တွေလုပ်ရာမှာလည်း ရံဖန်ရံခါပြုလုပ်တတ်ကြပါတယ်...။
အထပ်ထပ်ကြိမ်ဖန်လုပ်ခြင်း Repetition ဆိုတာ ကျနော်တို့တွေ တစ်စုံတစ်ခုကို ထပ်တလဲလဲ အသုံးပြုနေတာကို Repetition လို့ခေါ်တာပါ...။ Repetition ဟာ ဗိသုကာပညာမှာ အများဆုံးအသုံးပြုဖြစ်တဲ့ စည်းမျဉ်းတစ်ခုပါ..။ Repetition ပြုလုပ်ရာမှာ အရာဝတ္ထုပစ္စည်း အမျိုးမျိုးနှင့် ပုံစံအမျိုးမျိုး Repeate လုပ်နိုင်ပါတယ်...။

size, shape, space, colour, texture နှင့် value စတဲ့ အရာတွေကို တူညီသော အရေအတွက်၊ အရောင်အဆင်း၊ အရွယ်အစား၊ ပုံသဏ္ဍာန် စသည်ဖြင့် အကြိမ်ကြိမ် ထပ်တလဲလဲ အသုံးပြုပေးခြင်းဖြင့် Repetition ပြုလုပ်ပေးနိုင်ပါတယ်...။ ဗိသုကာတွေဟာ သူတို့တည်ဆောက်တဲ့ အဆောက်အအုံတွေမှာ တံခါးများ၊ ပြူတင်းပေါက်များ၊ ထုတ်တန်းများ၊ တိုင်းလုံးများ၊ ဖောင်းကြွများ၊ ဂုံးကျော်များ၊ ပေါင်းမိုးများ၊ မုခ်ဝများ စတဲ့ အစိတ်အပိုင်းတွေကို အကွာအဝေးညီညီထားခြင်း၊ အရွယ်အစားညီညီထားခြင်းဖြင့် Repetition ကိုပုံဖော်ကြပါတယ်...။

Repetition ကို ဂီတတွေမှာ ထင်ထင်ရှားရှားနားဆင်နိုင်ပါတယ်...။ အဲဒီလို သံစဉ်တစ်ခု၊ တီးကွက်တစ်ခုကို အဖန်ဖန် Repeate လုပ်တီးခတ်ခြင်းကို ရစ်သမ်(rhythm) ကျတယ်လို့ ဆိုပါတယ်...။ ရစ်သမ်ကျတဲ့ ဂီတတွေကို သေချာအာရုံစိုက်ပြီး နားထောင်ကြည့်နိုင်ပါတယ်ခင်ဗျာ...။
ဗိသုကာတွေကတော့ အရာဝတ္ထုတွေ အစီအစဉ်တကျ (Order) ဖြစ်အောင် Repetition အကြိမ်ကြိမ်ပြုလုပ်ပြီး အသုံးပြုကြပါတယ်...။ အဲဒီလိုပြုလုပ်နိုင်ခြင်းဟာ အမြင်ဆိုင်ရာ ရစ်သမ်မိခြင်း (visual rhythm) လို့ ဆိုနိုင်ပါတယ်...။ ပုံမှာရှိတဲ့ Paris မှာရှိတဲ့ Louvre ပြတိုက်ကြီးရဲ့ ပုံကိုလေ့လာကြည့်ပါခင်ဗျာ...။ ဘယ်အစိတ်အပိုင်းတွေက Repetition ဖြစ်နေသလဲဆိုတာ စမ်းစစ်ကြည့်ကြပါ...။

ဗိသုကာတွေဟာ တူညီတဲ့ ခန်းဖွင့်(Span) တွေ၊ Spaces တွေကို အထပ်ထပ်ပြုလုပ်ပြီး မော်ဂျူး (module) အဖြစ်ပြုလုပ်ဖန်းတီးတတ်ကြပါတယ်...။ အထူးသဖြင့် အဆောက်အအုံ ပန္နက်ပုံဆွဲရာမှာ များစွာ အသုံးပြုတတ်ကြပါတယ်...။

ဗိသုကာတွေဟာ ဘာကြောင့်များ Repetition ကို အကြိမ်ကြိမ်လုပ်တတ်ကြသလဲ။ အဓိကကတော့ အဆောက်အအုံ ဆောက်လုပ်ချိန်မှာ ကုန်ကျစာရိသက်သာလို့ပါပဲ။ ဘာကြောင့် သက်သာသလဲဆိုရင် အခန်းတစ်ခန်းပြုလုပ်ပြီးချိန်မှာ ကျန်တဲ့ အခန်းတွေလုပ်တော့ ပုံစံတူဖြစ်နေတာကြောင့် ကျွမ်းကျင်စွာလုပ်နိုင်လာလို့ပါ..။ အဲနောက် အဆောက်အအုံတွေအတူတူ ပြုလုပ်ခြင်း၊ ဘလော့တွေ ပုံစံတူပြုခြင်းဟာလည်း ထိုနည်းလည်းကောင်းပါပဲ..။

နောက်တစ်ချက်ကတော့ ဆောက်လုပ်ချိန် (Construction Time) မြန်မြန်ပြီးစီးအောင်လည်း ဗိသုကာတွေ Repetition ကိုသုံးကြတတ်ပါတယ်...။ ဆောက်လုပ်သူတွေ အနေနဲ့လည်း တစ်မျိုးတည်းကို အကြိမ်ကြိမ်လုပ်လာရတဲ့အတွက် လုပ်ငန်းကျွမ်းကျင်မှုနှင့် လွယ်ကူတဲ့နည်းစနစ်တွေကိုလည်း ပထမအတွေ့အကြုံတွေကနေ သိရှိလာနိုင်ပါတယ်...။
နောက်တစ်ချက်က အာခီတတ်တွေဟာ sence of order ဆိုတဲ့ အစီအစဉ်ကျနခြင်းအသိခံစားမှု ကိုပေးချင်တဲ့ အခါမျိုးတွေမှာလည်း Repetition ကိုသုံးတတ်ပြန်ပါတယ်....။
အောက်မှာပြထားတဲ့ ပုံလေးတွေကို ကြည့်ပါ...

ပထမဆုံးပုံ မှာဆိုရင် အကြီး- အသေး၊ အကြီး- အသေး၊ အကြီး -အသေး ဆိုပြီး Repeting လုပ်သွားပါတယ်...။ ကျနော်တို့ရဲ့ လက်နှစ်ဖက်ဖြင့် လက်ခုပ်သံထွက်အောင်တီးခြင်းဖြင့် အသံ Repetition လုပ်နိုင်ပါသေးတယ်..။ ခပ်ကျယ်တစ်ချက်တီးလိုက်- နောက်ခပ်တိုးတိုး တစ်ချက်တီးလိုက်၊ ခပ်ကျယ်ကျယ်၊ ခပ်တိုးတိုး စသည်ဖြင့် လက်ခုပ်အကြိမ်ကြိမ်တီးခတ်ခြင်းဖြင့် sound of Rhythm တွေပြုလုပ်ဖန်းတီးကြည့်လို့ ရနိုင်ပါတယ်..။
ပုံလေးတွေမှ နောက်ဆုံးပုံမှာ ဘယ်အရာက Repetition ဖြစ်နေသလဲ...။
ကျနော်တို့တွေ ကစားတဲ့ ပစ္စည်းတွေမှာရော Repetition ဖြစ်နေတာတွေ တွေ့နိုင်ပါတယ်...။
ကျားကွက်တွေ၊ စစ်တုရင်ကွက်တွေ၊ မိုနိုပိုလီကစားတဲ့ ခုံတွေ၊ စသည်ဖြင့် ကလေးကစားတဲပစ္စည်းတွေရော များစွာတွေ့နိုင်ပါတယ်..။
ကဲ ဒီလောက်ဆိုရင် Repetition ရဲ့ အရေးပါမှုကို သိနိုင်လောက်ပါပြီနော်...။

လေးစားစွာဖြင့်

MMO

Creative Space

ပတ်ဝန်းကျင်ကို တည်ဆောက်ခြင်း(Built Environment)

2010-03-22T22:10:00.003+08:00

ဗိသုကာဆိုင်ရာ အဆောက်အဦးများ အိမ်များဟာ ကျနော်တို့ အားလုံးအပေါ်မှာ အင်မတန်လွှမ်းမိုးမှုရှိပါတယ်...။ အဲလို
လွှမ်းမိုးအောင်လုပ်ဆောင်နိုင်ခြင်းကပဲ ကျနော်တို့ရဲ့ ပတ်ဝန်းကျင်တည်ဆောက်ခြင်း (Built Environment) ပင်ဖြစ်ပါတယ်...။
အဲဒီအကြောင်းကို အကျယ်မပြောခင်မှာ ကျနော်ပုံပြင်လေးနှစ်ပုဒ်ကို ရှေးဦးတင်ပြချင်ပါတယ်....။
ဗိသုကာအကြောင်းမပြောခင် ပုံပြင်လေးတွေ ပြောတော့ စိတ်ဝင်စားကြမယ်ထင်ပါတယ်...။ တချို့လည်းသိဖူး ကြားဖူး ဖြစ်ချင်ဖြစ်ပါမယ်...။
ပထမပုံပြင်လေးက "The Three Bears" ဆိုတဲ့ ပုံပြင်လေးပါ...။

တခါတုန်းက ဂိုဒီလော့ဆိုတဲ့ ကောင်မလေးတစ်ယောက်ရှိသတဲ့...။ တနေ့မှာ သူတောထဲကိုလမ်းလျှောက်ထွက်လာရင်း မကြာခင်မှာ အိမ်လေးတစ်လုံးကိုတွေ့ရတယ်...။ အဲဒီတော့ ဂိုဒီလော့လေးဟာ အသံပေးခေါ်ကြည့်၊ တံခါးခေါက်ကြည့်တာ ဘယ်သူမှမတွေရဘူး..။ ဒါနဲ့ အိမ်ထဲကိုဝင်လာခဲ့တယ်လေ...။
အိမ်ထဲရောက်တာနဲ့ မီးဖိုချောင်ထဲက စားပွဲပေါ်မှာ ဆန်ပြုတ်သုံးပန်းကန်ကိုတွေ့တာပေါ့...။ အဲဒီတော့ သူလည်းဆာဆာနှင့် စားမယ်ဆိုပြီး ပထမပန်းကန်လုံးကို မြည်းကြည့်လိုက်တယ်...။
“ အားလား...ပူလိုက်တာ” သူမအလန့်တကြားအော်လိုက်မိတယ်....။
နောက်တော့ ဒုတိယ ခွက်ကိုလှမ်းလိုက်တယ်....။
“ အာ... ဒီခွက်ကအေးစက်နေတာပဲ...”လို့သူမရေရွတ်ပြီး နောက်ဆုံးခွက်ကို ထပ်မြည်းလိုက်တော့တယ်...။
“အိုး... ဒါမျိုးမှ... ငါ့အကြိုက်ပဲ....” လို့ အော်ပြောလိုက်ပြီး ဝမ်းသာအားရ အကုန်သောက်ပစ်လိုက်တာပေါ့...။
အဲဒီလို ဝက်ဝံသုံးကောင်ရဲ့ မနက်စာကို စားပြီးသူမဗိုက်တင်းသွားတာနှင့် အနားယူဖို့ ဆုံးဖြတ်လိုက်တယ်...။ အိမ်ခန်းထဲကိုထပ်လျှောက်လာခဲ့လိုက်တယ်...။ ဧည့်ခန်းကိုရောက်တာနဲ့ ထိုင်ခုံသုံးလုံးကိုတွေ့ပါလေရော...။
ဒါနဲ့ ပထမထိုင်ခုံမှာ ခြေညောင်းလက်ဆန့်နားအုံးမယ်ဆိုပြီး ဝင်ထိုင်ပစ်လိုက်တာပေါ့...။
“ထိုင်ခုံကလည်း ကြီးလိုက်တာ...” ထိုင်ပြီးမှသူမအဆင်မပြေလို့ မြည်တွန်မိသွားပြန်တယ်...။
နောက်တစ်လုံးထိုင်မယ်ကြည့်လိုက်တော့ ... “အားပါး..ဒါက ပိုတောင်ကြီးသေး ...”ဆိုပြီး စူးစူးဝါးဝါးအော်ပစ်လိုက်မိတယ်...။
နောက်ဆုံးခုံလေးကိုကြည့်ပီးတော့ မှာ...။
“အလဲ့... ဒါလေးကမှ ငါ့အတွက်အကိုက်ပဲ...”တွေးပြီး အားပါးတရ ထိုင်ချပစ်လိုက်တယ်...။ဒါပေမယ့်သူမထိုင်ရုံ ရှိသေးတယ် ခုံလေးက တစ်စစီကျိုးပဲ့သွားတော့တာပါပဲ...။
အဲလိုဖြစ်သွားပြီး ဂိုးဒီလော့လေးအတော်ပင်ပန်းသွားရှာတယ်...။ တချိန်တည်းမှာပဲ သူမခြေလှမ်းတွေက အပေါ်ထပ်ကို လှမ်းနေပီပေါ့...။ အပေါ်ထပ်က အိပ်ခန်းတွေရောက်တာနဲ့... ပထမဆုံး အိပ်ယာမှာ ဝင်အိပ်ကြည့်လိုက်ပြန်တယ်..။ အဲဒီအိပ်ယာက အရမ်းမာနေတယ်...။ နောက်အိပ်ယာကို ဝင်ပြန်တော့လည်း အရမ်းနုညံ့နေပြန်ရော...။နောက်ဆုံး အိပ်ယာကိုတွေ့မှပဲ သူအကြိုက်အိပ်ယာဖြစ်တာနှင့် တခါတည်း ဝင်အိပ်နေလိုက်ပါလေရော...။
သူအဲလိုအိပ်ပျော်နေစဉ်မှာပဲ... အိမ်ပိုင်ရှင်ဖြစ်တဲ့ ဝက်ဝံသုံးကောင် ရောက်ချလာပါလေရော...။
ရောက်ရောက်ချင်းပဲ...ဖေဖေ ဝက်ဝံက ငါ့ဆန်ပြုတ်တစ်ယောက်ယောက်ယူသောက်လိုက်ပီ..
မေမေ ဝက်ဝံ ဆန်ပြုတ်လည်း ထိုနည်းလည်းကောင်း....။
သားသားဝက်ဝံလေးကတော့ သူ့ဆံပြုတ်အကုန်သောက်သွားတယ်ဆိုပီး ညည်းတွားမိတာပေ့ာ...။
နောက် ဧည့်ခန်းထဲရောက်တော့ ခုံတွေအကုန်ထိုင်ထားတာနှင့် ခုံတစ်လုံးကျိုးနေတာ တွေ့ပြန်ပါလေရော...။ ဒါနဲ့ အိမ်အပေါ်ထပ်ကို လိုက်ကြည့်ကြတော့ အိမ်ယာအကုန်လုံး ဖရိုဖရဲဖြစ်နေပြီး အိပ်ထားတာ တွေ့ရတော့တာပေါ့...။ နောက်ဆုံး သားသားဝတ်ဝံအိပ်ယာမှာ အိပ်နေတဲ့ ဂိုဒီလော့လေးကိုပါ တွေ့ပါလေရော...။
အဲဒီမှာ ဝက်ဝံသားသားလေးက “သားသား အိပ်ယာမှာ သူခိုး ဝင်အိပ်နေတယ်...”လို့အောင်ပြောလိုက်တာပေါ့...။
အဲဒီအချိန်မှာ ဂိုဒီလော့လေးလည်း အိပ်ယာက နိုးလို့ ဝက်ဝံသုံးကောင်ကိုလည်းတွေ့ရော ကြောက်လန့်ပြီး အိမ်ပြူတင်းက ခုန်ချပြီးပြေပါလေရောဗျာ....။
အဲဒီအချိန်ကစပြီး ဂိုဒီလော့လေးတစ်ယောက် တောထဲကို ဘယ်တော့မှာ မသွားတော့ဘူးတဲ့...။

ဒါကပထမပုံပြင်လေးပါ....။
ဆက်မယ်နော် ဒုတိယပုုံပြင်ကို...
အဲဒါတွေပြီးမှ (Built Environment) အကြောင်းသွားတာပေါ့....။

နောက်ဒုတိယပုံပြင်ကလေးကတော့ "The three little pigs" ဆိုတဲ့ပုံပြင်လေးပါ...။ ဒါလေးလည်း ကြားဖူးချင် ကြားဖူးနိုင်ပါတယ်...။ သိုသော်လည်း မကြားဖူးသေးတဲ့သူတွေအတွကပေါ့ဗျာ....။
တခါတုန်းက ဝက်ကလေးသုံးကောင်ရှိသတဲ့...။ သူတို့သုံးကောင်ဟာ အချိန်တန်အရွယ်ရောက် ဝက်လားမြောက်လာတော့... ရေကြည်ရာ... မြက်နုရာ တိုးတတ်ကြီးပွားအောင် ရှာကြံဖို့ အိမ်ကနေထွက်ကြမယ်ပေါ့...။ အဲလိုထွက်ခါနီးမှာ မိခင်ဖြစ်သူ ဝက်မကြီးက သားသုံးယောက်ကို ခရီးမထွက်ခင် သြဝါဒစကား မြွတ်ကြားသတဲ့....။ “သားတို့ရေ မင်းတို့တွေ ဘာပဲလုပ်လုပ် ၊မင်းတို့ အကောင်းဆုံးဖြစ်အောင်လုပ်ကြပါ...။ ဘာကြောင့်ဆိုရင် မင်းတို့ကောင်းအောင်လုပ်ရင် လောကကြီးကလည်းမင်းတို့ကိုကောင်းကျိုးပြန်ပေးတတ်လို့ပဲကွ...” ဆိုပြီးမှာလိုက်ပါသတဲ့...။

အဲဒီလိုနဲ့ ဝက်လေးသုံးကောင်ထွက်လာခဲ့တာမှာ သူ့နေရာသူ ကိုယ်စီနေကြရင်း ပထမဆုံးဝက်ကလေးကတော့ သူနေထိုင်ဖို့နေရာကို ကောက်ရိုးတွေနှင့် ပြုလုပ်ထားသတဲ့...။ ဒုတိယ ဝက်ကလေးကတော့ သူနေဖို့ကို သစ်ချောင်းလေးတွေနဲ့ပြုလုပ်ထားပြန်သတဲ့....။
အဲ နောက်ဆုံးတတိယ ဝက်ကလေးကတော့ အုတ်တွေနှင့်သူ့နေရာကို အခိုင်အမာလုပ်ထားတာပေါ့...။
အဲဒီလို အသီးသီးနေကြတာ တနေ့မှာတော့ တောထဲက ဝံပုလွေတစ်ကောင်ဟာ အစာရှာထွက်လာရာမှာ ဝက်ကလေးတွေနေတဲ့နေရာရောက်တော့ ပထမဝက်ကလေး နေတဲ့ကောက်ရိုးတဲကိုတွေ့ပါလေရော...။ အဲဒီမှာ ဝက်ငယ်လေးတစ်ကောင်တည်းနေတာ သိတော့ စားဖို့အကြံနဲ့ “ ငါ့ကို အထဲကို ဝင်ခွင့်ပေးပါ... မပေးရင်မင့်တဲကို ဖြိုပြီး ငါဝင်လာမယ်...။” လို့ခြိမ်းခြောက်ပြီးပြောတယ်...။

အဲဒီမှာ ဝက်ကလေးက... အပြင်က ဝံပုလွေကိုကြည့်ပြီး “ငါနှင့်အသွေးအမွှေးမတူ မင်းလိုလူ ဝင်ခွင့်မပြုလို့ ပြန်ပြောလိုက်တော့...။ ”
ဝံပုလွေက စိတ်ဆိုးပြီး ကောက်ရိုးအိမ်ကိုဖြိုဖြတ်ပြစ်လိုက်တယ်...။ ပြီးတော့... ဝက်ကလေးကို စားပစ်လိုက်တယ်...။
နောက်တစ်ရက်မှာလည်း အဲဒီဝံပလွေဟာ ဒုတိယ ဝက်ကလေးတွေနေတဲ့နေရာရောက်လာပြန်တယ်....။ အဲဒီမှာ ဝက်ငယ်လေးတစ်ကောင်တည်းနေတာ သိတော့ စားဖို့အကြံနဲ့ “ ငါ့ကို အထဲကို ဝင်ခွင့်ပေးပါ... မပေးရင်မင့်တဲကို ဖြိုပြီး ငါဝင်လာမယ်...။” လို့ခြိမ်းခြောက်ပြီးပြောပြန်တယ်...။
အဲဒီမှာ ဝက်ကလေးက... အပြင်က ဝံပလွေကိုကြည့်ပြီး “ငါနှင့်အသွေးအမွှေးမတူ မင်းလိုလူ ဝင်ခွင့်မပြုလို့...” ပြန်ပြောလိုက်ပြန်တာပေါ့...။
အဲဒီမှာ ဝံပုလွေက အရင်လိုပဲစိတ်ဆိုးပြီး သစ်ချောင်းအိမ်ကိုဖြိုဖြတ်ပြစ်လိုက်တယ်..။ နောက်တော့ ဝက်ကလေးကို စားပစ်လိုက်တယ်...။
နောက်တစ်ရက်မှာလည်း တတိယ ဝက်ကလေးရဲ့ အိမ်ကိုလာပြန်တယ်..။ အရင်လိုပြောပြီး ဖြိုဖို့လုပ်တော့တာပေါ့...။ ဒါပေမယ့် တတိယဝက်ကလေးက အခိုင်အခံဆောက်ထားတော့ ဝံပလွေ ဖြိုလို့မရနိုင်ခဲ့ဘူး...။ နောက်ဆုံးဝံပုလွေကြီး အကြံထပ်ထုတ်တယ်..။ အိမ်ကိုဖြိုမရတော့ ဘေးမှာရှိတဲ့ နေရာကို ရှာကြံပြီး အိမ်ခေါင်မိုးပေါ်တတ်ဖို့ ကြံစည်တာပေ့ာ....။

အဲဒီလိုနဲ့ အိမ်ခေါင်ပေါ်ရောက်အောင်တွယ်တတလာပြီး အထဲ ဝင်ဖို့ အပေါက်ရှာရာ မှာ မီးခိုးခေါင်းတိုင်တွေ့တာ နှင့်အဲဒီထဲကနေ အောက်ကို ဆင်းလိုက်တယ်...။ ဝံပုလွေအဲလိုလုပ်နေတာတွေကို အထဲက ဝက်ကလေးက ဂရုတစို်က်နေတော့ သိနေတာပေါ့..။ အဲဒီတော့ မီးခိုးခေါင်းတိုင်ထဲ ဝင်တာနဲ့ မီးဖိုထဲ မီးဇာထဲပြီး မီးရှို့ပစ်လိုက်တာ ဝံပုလွေလည်း အကင်ဖြစ်သွားတော့တာပေါ့...။
အဲနောက်နေ့မှာ အဲဒီဝက်ငယ်လေးဟာ မိခင်ကိုအိမ်အလည်ခေါ်ပြီး ဝံပုလွေ အကြောင်းပြောတာပေါ့...။ အဲဒီမှာ မိခင် ဝက်မကြီးက .. ကဲ အမေမပြောလားသာရေ... လောကမှာ ကိုယ်တတ်နိုင်သလောက် အကောင်းဆုံးလုပ်တဲ့သူကို လောကကြီးက ကောင်ကျိုးပြန်ပြုပါတယ်ဆိုတာ... ခုလက်တွေ့မဟုတ်လားသားရဲ့...။ဆုံးမစကားပြောသတဲ့...။
ဒီလိုနဲ့ ဝက်ကလေးလည်း ပျော်ရွှင်စွာ ဝက်သတ်သမားလက်မရောက်ခင်အထိနေထိုင်သွားသတဲ့ကွယ်....။ ပုံပြင်ကလေးတွေကတော့ ဒါပါပဲ...။ ဘာသာပြန်ပုံပြင်လေးတွေပါ...။ မူရင်းတွေဖတ်ချင်ယင်တော့ အွန်လိုင်းမှာ ရှာကြည့်ကြပါ..။ မချောမွေ့ရင်ပဲ ဖြစ်ဖြစ် အဓိပ္ပါယ်လွဲရင်ပဲ ဖြစ်ဖြစ် ကျနော့ရဲ့ ညံဖျင်းမှုကြောင့်ပါခင်ဗျာ...။။
အင်း အတော်လည်းပေရှည်သွားပါပီ...
ခုမှလိုရင်းပြောပါတော့မယ်...

ပုံပြင်လေးနှစ်ပုဒ်ကိုသေခြာဖတ်ဖြစ်ကြပါသလား...။ ပုံပြင်လေးတွေမှာ ဗိသုကာနှင့်ပတ်သတ်ပြီး ဘာထူးခြားတာတွေ ပါလာသလဲဆိုတာ စဉ်းစားမိကြပါသလား...။ ပထမပုံပြင် ဝက်ဝံသုံးကောင်ကို ဗိသုကာတစ်ယောက် အနေနဲ့ မြင်ကြည့်ရင် ပုံပြင်ထဲမှာ တံခါးတွေ၊ ပြူတင်းတွေ ပရိဘောဂတွေ အစုံပါလာပါတယ်...။ အိမ်တစ်လုံးအတွက်ရှိသင့်တဲ့ အချက်တွေ ပတ်ဝန်းကျင်တွေ ပါလာတယ်...။ နောက် ဝက်ကလေးသုံးကောင် ပုံပြင်မှာတော့ အာခီဗျူးအနေနဲ့ ဘာမှမှတ်သားဖွယ်မတွေ့ရဘူးဗျ...။ သူ့ရဲ့ အဓိကပေးချင်တာက အာခီအမြင်ထက် ဝက်ကလေးတွေရဲ့ အမူအကျင့် အလုပ်အကိုင်ကို အဓိကဖော်ပြချင်တာမျိုးပါ...။ အထူးသဖြင့် ကိုယ်ကျင့်ဆိုင်ရာ အတုယူလေ့လာဖို့သာ အဓိကထားတာပါ့....။ အဲဒီတော့ ဗိသုကာပိုင်းဆိုင်ရာ လွှမ်းမိုးမှုဘာမှမပါတဲ့ ပုံပြင်လေးတစ်ခုပေ့ာ...။
အဲဒီပုံပြင်နှစ်ပုဒ်ကနေ ကျနော်တို့ လူသားတွေအတွက် အဓိကအခြေခံလိုအပ်ချက်တွေကို ထုတ်နှုတ်နိုင်ပါတယ်...။
ဘာတွေလဲဆိုတော...
၁ ။ အစားသောက် (စားရေး)
၂ ။ ခိုအောင်းနေထိုင်ရာ (နေရေး)
၃။ အဝတ်အထည် (ဝတ်ရေး)
၄။ အန္တရာယ်ကင်းရှင်းမှု (လုံခြုံရေး) စတာတွေဟာ အဓိက အခြေခံလိုအပ်ချက်တွေဆိုတာ လေ့လာနိုင်ပါတယ်...။

အဲဒီအခြေခံ အချက်တွေကိုမှ အလှဆင်မှုဘက်ကနေ အစားအစာတွေ အမျိုးမျိုးပြုလုပ်ပြသခြင်းများ၊ စားချင့်စဖွယ်ဖြစ်အောင် ပြုပြင်ဖန်တီးခြင်းများ၊ နေထိုင်စရာများကိုလည်း အမျိုးမျိုးလှပအောင်ပြုလုပ်ခြင်းများ၊ ကာကွယ်ရေး လက်နက်ကိရိယာများကိုလည်း(ဥပမာ... ဆောင်ဓားများ) အလှချိပ်ခြင်း၊ ကိုင်ဆောင်ခြင်းများကို ကျနော်တို့လူသားတွေ လုပ်ဆောင်တတ်ကြပြန်ပါတယ်။
အဲဒီလိုလုပ်တတ်ကြတာကို သတိပြုမိကြမယ်ထင်ပါတယ်...။ အဲဒီတော့ စဉ်းစားကြည့်မယ်ဆိုရင် အဲဒီလို အနုပညာဆန်စွာ ပြုလုပ်ဖန်တီးတတ်ခြင်းများဟာ အခြေခံလိုအပ်ချက်တွေပြီးရင် နောက်ကလိုက်လာတဲ့ အရေးပါတဲ့ အချက်တစ်ခုအဖြစ် တွေ့ရမှာပါ....။ ဥပမာ အားဖြင့် အဝတ်အစားဆိုရင်လည်း ကျနော်တို့တွေ ကောင်းကောင်း အလှဆုံးဖြစ်အောင် ဒီဇိုင်းဖန်တီးလို့ ရနိုင်ပါတယ်..။ အဲလိုလုပ်လို့ရနိုင်ခြင်းဟာ ဗိသုကာပညာပါပဲ...တနည်းပြောရာ ရင် အာခီတတ်ချာပဲပေါ့နော်...။ အခြေခံ လိုအပ်ချက်တွေကို လူတွေနှင့် အဆင်ပြေအောင် ပိုမိုလှပအောင် အသုံးဝင်အောင် ဆွဲဆောင်မှုရှိအောင် ဖန်တီးမှုတွေကို အာခီတတ်ချာ လို့ဆိုနိုင်မယ်...။ အခြားနေရာများ ဥပမာတွေ ခြောက်ကမ်းပါးကြီးတွေ မြစ်ကြီးတွေကို ဖြတ်ကျော်ပြီး ထိုးထားတဲ့ တံတားကြီးတွေမှာ ဗိသုကာဖန်တီးမှုပညာတွေ...။ ပန်းခြံကြီးတွေမှာ ဖန်တီးမှုတွေ...။ မြို့ကြီးတွေတည်ဆောက်ရာမှာ ပြုလုပ်တဲ့ မြို့ကွက်ဖော်ဆောင်မှုတွေဟာ အထူးအရေးပါတဲ့ ကျနော်တို့ ပတ်ဝန်းကျင်ကို တည်ဆောက်ထားခြင်းတွေပါပဲ...။

Build enviironment နှင့်ပတ်သတ်ပြီး Elementry စာအုပ်ရဲ့ မိတ်ဆက်မှာ ရေးထားတဲ့ မူရင်းစာလေးတွေ ကျနော်ဖော်ပြချင်ပါတယ်...။ ဖတ်ရှုပြီး ပိုမိုနားလည်နိုင်မယ်လို့လည်းမျှော်လင့်မိပါတယ်...
"One of the basic maturities of education is " enviromental". The root words of environment declare it to mean the sum total of influences which modify and determine the developement of life or character. In all of the earth's history, no culture_ no time _ has been more in need , been more concerened with environment. We want to preserve rare species, to have clean air and pure water, to enjoy rich forests and wilderness areas. The build environment is one of the major environmental concerns of the twentieth and twenty-first centuries.
အင်း ဒါဆို....ပိုမိုနားလည်ကြမယ်ထင်ပါတယ်...။
Build environment ကို အဓိက ထိခိုက်စေတာကတော့ သမိုင်းဆိုင်ရာထိန်းသိမ်းမှု နှင့် အလှအပဖြစ်အောင်ပြုလုပ်မှုတွေပါပဲ...။ historical နှင့် aesthetic လို့ ဆိုထားပါတယ်...။ ဘာကြောင့်လည်းဆိုတော့ ကြီးကျယ်ထင်ရှားပြီး အင်မတန် ကောင်းမွန်လှတဲ့ အဖိုးတန်ရှားပါး အဆောက်အအုံအတော်များများကို ကျနော်တို့ ကာကွယ်ထိန်းသိမ်းဖို့လိုအပ်နေပါတယ်...။ အဲဒီအခါမှာ ကျနော်တို့ရဲ့ Build environment ကိုထိခိုက်နိုင်စေတာမျိုးဖြစ်နိုင်ပါတယ်...။ ဘယ်လိုဖြစ်ဖြစ်ပါ ကျနော်တို့တွေရဲ့ မျိုးဆက်တိုင်းမှာ လက်ရှိပတ်ဝန်းကျင်ကို တိုးတတ်အောင်ထိန်းသိမ်းရင်း အနာဂတ်ပတ်ဝန်းကျင်ကို အကောင်းဆုံးဖြစ်အောင် စောင့်ရှောက်ရမယ့် တာဝန်ရှိနေပါတယ်...။ ဒါကြောင့် ကျနော်တို့ အနေနဲ့ ကျနော်တို့တွေရဲ့ ပတ်ဝန်းကျင်ထိန်းသိမ်းခြင်း Build environment ကို အချက်နှစ်ချက်နှင့် အဓိကထားစောင့်ရှောက်သင့်ပါတယ်...။ ပထမအချက်က မူလအခြေအနေကို ထိန်းသိမ်းထားနိုင်ဖို့ပါ...။ ဒုတိယအချက်ကတော့ ပတ်ဝန်းကျင်အသစ်ကိုလည်း လှပတဲ့ ပတ်ဝန်းကျင်ဖြစ်အောင် ဖန်တီးတည်ဆောက်နိုင်ဖို့ပါပဲ....။ အဲဒီအချက် နှစ်ချက်ဟာ အများပြည်သူနှင့်သက်ဆိုင်တဲ့ ဒီဇိုင်းတွေ ပြုလုပ်ရာမှာ အထူးအရေးထား ထိန်းသိမ်းရမယ့် အချက်တွေ ဖြစ်ပါတယ်...။ ဘာကြောင့်ဆိုရင် ကျနော်တို့ တွေရဲ့ ဗိသုကာဆိုင်ရာ အမွေအနှစ်တွေကို တန်ဖိုးမဲ့တဲ့ အဖြစ်မျိုး မဖြစ်စေအောင် အထူးဂရုပြုသင့်လို့ပါပဲ ခင်ဗျား...။

အင်း ကျနော်ခုပြောတဲ့ အချက်တွေမှာ Build environment ကိုကောင်းကောင်းနားလည် နိုင်လောက်မှာပါ...။
ဒါနဲ့ နောက်ဆုံး Build environment နှင့်ပတ်သတ်ပြီး သတိထား လေ့လာမှုလေးတွေ လုပ်နိုင်အောင် အတွေးလေးတွေ ပေးချင်ပါတယ်....။
ကျနော်တို့တွေ ကြားဖူးတဲ့ ဖတ်ဖူးတဲ့ ပုံပြင်လေးတွေ ဝတ္ထုလေးတွေမှာ အဆောင်အအုံဆိုင်ရာ အသိအမြင်တွေ ပါလာတတ်ပါတယ် ...။ အဲဒါလေးတွေကို ဂရုပြုမှတ်သားစေချင်ပါတယ်...။ ဥပမာ ... ( Hansel and Gretel, Snow white, Cinderella, Rapunzel အစရှိတဲ့ ပုံပြင်လေးတွေပေါ့)...
ကျနော်တို့ မြန်မာဆိုရင်ရော ငယ်စဉ်ကကြားဖူးတဲ့ ကလေးကဗျာလေးတွေမှာ အဲလိုအကြောင်းလေးတွေပါတာလေးတွေရှိပါတယ်....။
“ဟိုဘက်ကမ်းက မီးထိန်ထိန်၊
ဒီဘက်ကမ်းက မီးထိန်ထိန်၊
ဆီမီးထိန်ထိန်လင်းပါလို့
မနှင်းတို့အိမ်...။”
“ဝါဝါထိန်ထိန်၊
ကြက်သွန်မိတ်တို့ အိမ်၊
ဝါးတစ်လုံးနှင့် ဆောက်တဲ့ အိမ်
ကိုကိုကြီးတို့ အိမ်...။ စသဖြင့်ပေါ့လေ...။
နောက် ဦးပုညရေးထားတဲ့ လေးမောင့်စံကျောင်းကဗျာလေးဆိုရင်ရော...
“မုလေးရုံ တော အစ၊ ဒေါနလမ်းမြေညီ
လျှောကျစမ်းရေ သင်းကြည်တယ်...။
ရွှေနှင်းဆီ ကန်ချောင်း...။
လွမ်းမတတ်စကားဝါ အငူမှာ
နံသာဖြူ လေးမောင့်စံကျောင်း” ဆိုတဲ့ ကဗျာလေး အကုန်တော့ မရတော့ဘူး...။ အဲဒီထဲမှာရော ပတ်ဝန်းကျင်နဲ့ပတ်သတ်တဲ့ မြေခင်းအလှအကြောင်းလေးတွေ သရုပ်ဖော်ထားသလို စဉ်းစားစရာလေးတွေပေ့ာ...။

အင်း ကျနော်တို့တွေ Build environment အကြောင်းပြောရင်း ကိုယ့်ပတ်ဝန်းကျင်တွေကို လေ့လာ စူးစမ်း ပြီး .... ကိုယ့်မြို့ ကိုယ့်ရွာရဲ့ အခြေအနေတွေ၊ အိမ်ယာ အဆေက်အအုံတွေရဲ့ တည်ဆောက်ထားမှုတွေ...။ နောက် အဲဒီမှာ တည်ဆောက်ထားမှုတွေမှာ ဘာတွေ ပြုပြင်သင့်သလဲ..။ ဘာတွေကောင်းမွန်သလဲ... ဘယ်လိုလုပ်လိုက်ရင် လှပသွားမလဲ... ဘာတွေလုပ်လိုက်ရင် ဖြင့် လူတွေ နှစ်သက်ဖွယ်ဖြစ်သွားလိမ့်မလဲဆိုတာတွေ... တွေးတောကြံစည်စဉ်းစားရင်း တောတောင် ရေမြေတွေရဲ့ သဘာဝတွေ၊ အားလုံးကို ခြုံငုံလေ့လာမယ် ဆိုရင်ဖြင့် အကောင်းဆုံးသော Build environment ကိုထိန်းသိမ်းနိုင်တဲ့သူတွေ ဖြစ်လာနိုင်မယ်လို့ မျှော်လင့်မိကြောင်း...။

လေးစားစွာဖြင့်

MMO

Creative Space

ဖိုရမ် အဆောက်အအုံ

2010-03-21T21:47:00.003+08:00

ဒီနေ့ ရုံးပိတ်ရက် ဆိုတော့ ကျနော် အေးအေးဆေးဆေးနားရင်း စာအုပ်တွေ ထိုင်ဖတ်လို်က်... ဝပ်ဆိုက်တွေ ဝင်ကြည့်လိုက်... ဒီဇိုင်းအကြောင်းလေးတွေ စဉ်းစားလိုက်လုပ်ရင်းအားလပ်ချိန်ကို အပြည့် အဝ အသုံးချနေမိပါတယ်...။ ကျနော့သူငယ်ချင်း MMO ကို ရုံးပိတ်ရက် အလည်ခေါ်ထားတော့ သူ့ကိုစောင့်ရင်း ဟိုတွေးဒီတွေးပေါ့..။ ရာသီဥတုလေးကလည်းကောင်းတော့ ဘာညာသရကာလေး မှီဝဲရမလားလည်း ကြံစည်နေမိသဗျ....။ ကိုယ့်လူကလည်း စိန်ခေါ်ရင် ဘွာမခက်သူဆိုတော့ အတော်ညှိုနေရမယ်ဆိုတာ တွေးနေမိတယ်...။ Smiley
စာဖတ်နေရင်း တယ်လီဖုန်းက ဆဲဗင်းဒေးသီချင်းသံထွက်လာတော့ ... ဘော်ဒါကြီးလာပြီဆိုတာ အတတ်သိလိုက်ပြီ...။
ခဏနေတော့ အိမ်ရှေ့က တံခါးခေါက်သံ ကြားတာနဲ့ စာအုပ်ကို စားပွဲပေါ်ပစ်တင်လိုက်ပြီး တံခါးသွားဖွင့်ပေးလိုက်တယ်...။ ဟူးခနဲ သက်ပြင်းချသံနှင့် ကျောပိုးအိပ်ကို ဆွဲရင်အိမ်ထဲရောက်မဆိုက် MMO ပြောလိုက်တာက....

MMO : ကိိုသန့်ဇင်ရေ... ကျနော်တို့တွေလည်း ဖိုရမ်မှာ စာမရေးဖြစ်တာအတော်ကြာပြီနော်...။

MTZO: အေးဟုတ်တယ်... ဒါနဲ့ ကျနော်ဖတ်ထားမိတာလေး တစ်ခုရှိတယ်ဗျ...။

MMO : အင်း ဟုတ်လား... ဘာများလဲ... ကောင်းရင်တင်ရအောင်လေ....။

MTZO: ကျနော်ဖိုရမ်ကို တနေ့က ဝင်မွှေတော့ Amazing Building မှာ ကျနော်တို့ ဘာမှရေးမထားရသေးဘူးဗျ...။ ကိုထွန်းအောင်ကျော်၊ ဂျွန်မိုးအိမ်နှင့် ဂျာကြီးတို့တော့
ဓာတ်ပုံတွေနဲ့ တင်ထားတာတွေ့တယ်....။

MMO : အင်း....ကျနော်လည်း စဉ်းစားထားတာတွေ တော့ရှိတယ် မရေးနိုင်သေးဘူးဖြစ်နေတာ....။

MTZO: ခု ...ကျေနော်ဖတ်ထားတဲ့ ဖိုရမ်အဆောက်အအုံက တမျိုးစိတ်ဝင်စားဖို့ ကောင်းတယ်ဗျ...။

MMO : အန် .... ဘယ်နဲ့ ဖိုရမ် အဆောက် အအုံလဲ.... ခင်ဗျားကလည်း ကျနော် ဖိုရမ်အကြောင်းပြောခါမှ.... ဒါနဲ့ အဲဒီ ဖိုရမ်ဆိုတဲ့ အဆောက်အအုံ ဆိုတာတကယ်ရှိနေသလား.... ဒါဆိုရင် ကျနော့ကိုပြောပြဗျာ....။

MTZO: ဒီမယ်ဗျာ.... ဒီပုံလေးတွေကို ကြည့်....။ အဲဒါ.... ဖိုရမ်အဆောက်အအုံတဲ့...။ အင်္ဂလိပ်လို Forum Building ဆိုတော့ ဖိုရမ်အဆောက်အအုံလို့ပဲ ဘာသာပြန်လိုက်တာလေ... ဟဲဟဲ မမိုက်ဘူးလား...။

MMO : အင်း.... အတော်လှတာပဲ...။ အဝင်၀ပုံစံက စိတ်ထဲတစ်မျိုးပဲ.....။ အဝင်၀က cantilever ကြီး အောက်ကို ရောက်သွားရင် အဆောက်အအုံကြီး ပြိုကျလာမလား ထင်စရာကြီးဗျာ....။ ပုံကြည့်တာတင် အဝင်ဝမှာ အဖိစီးခံလိုက်ရသလားပဲ... ထားပါတော့...ကျနော်ခံစားလိုက်ရတာလေးပြောကြည့်တာ... ဒါနဲ့... အဲဒါဘယ်မှာရှိတာလဲဗျ...။

MTZO: စပိန်နိုင်ငံ ဘာစီလိုးနားမြို့တော်မှာရှိတယ်ဗျ...။ စပိန်နိုင်ငံဆိုတော့ နွားရိုင်းသတ်ပွဲတွေ ကျင်းပတဲ့ နိုင်ငံထင်တယ်ဗျ...။ အဲဒါတော့ ထားပါဗျာ...။

MMO : အော်... ၁၉၉၂ ခုနှစ်မှာတုန်းက အိုလံပစ်ပွဲတော်ကို အိမ်ရှင်လုပ်ခဲ့သေးတယ်နော်...။ အဲဒီပွဲပြီးတာနဲ့ ဘာစီလိုးနားလည်း အတော်လေး ထင်ရှားပြီးဥရောပရဲ့
အချက်အချာနေရာတစ်ခု ဖြစ်သွားတာပေါ့...။ ဒါနဲ့ အဲဒီအဆောက်အအုံအကြောင်းဆက်ပါအုန်း...။ ဘယ်သူဆောက်ခဲ့တာလဲ...။ ဗိသုကာပညာရှင်ကရော ဘယ်သူများလဲဗျ...။
မသေချာရင် စာအုပ်ထဲပြန်ကြည့်ဗျာ...။

MTZO: ဒီမှာဗျာ.... ဗိသုကာတွေက ဆွစ်လူမျိုး အာခီတတ်နှစ်ယောက်ဗျ...။ Jaques Herzog နှင့် Pierre de Meuron ဆိုတဲ့နှစ်ယောက်ပဲ...။ သူတို့နှစ်ယောက်ပေါင်းပြီး
ဆွစ်ဇာလန်နိုင်ငံ (Switzerland) ဘက်ဆဲလ်(Basel) မြို့မှာ ၁၉၇၈ခုနှစ်က Herzog & de Meuron Architekten, BSA/SIA/ETH (HdeM) ဆိုတဲ့ ဆွစ်အာခီတတ်အဖွဲ့တစ်ခု တည်ထောင်ခဲ့ကြတယ်ဗျ...။ သူတို့နှစ်ယောက်လုံးက ဇူးရစ်(Zürich) မှာရှိတဲ့ Swiss Federal Institute of Technology (ETH) ETH Zurich (German: Eidgenössische Technische Hochschule Zürich) မှာ ကျောင်းအတူတက်ခဲ့ကြတယ်ဗျ..။

MMO : အင်း...ဟုတ်ပါပြီ... သူတို့အကြောင်းတော့ဒီလောက်ပဲထားပါတော့ဗျာ...။ အဆောက်အအုံအကြောင်းဆက်ပါအုန်း...။

MTZO: အိုကေဗျာ.... အဆောက်အအုံပုံစံက တြိဂံထုပုံစံရှိတယ်...။ သူ့ကို ဧကလေးဆယ်ကျော်ကျယ်ဝန်းတဲ့ မြေကွက်ထဲမှာ ဆောက်ထားတာပေါ့...။ သူ့ရဲ့ အဓိကထင်ရှားစေတဲ့
အချက်က ၂၀၀၄ခုနှစ် ယဉ်ကျေးမှုဆိုင်ရ နှီးနှောဖလှယ်ပွဲရဲ့ ဗိသုကာမှတ်တိုင်လို့ ဆိုကြတာပဲ...။ တချို့ကလည်း ဘာစီလိုးနားရဲ့ အကောင်းဆုံး အဆောက်အအုံလို့လည်း
ဆိုကြပြန်တယ်.....။

MMO : အေးဗျာ.... ဒါဆို ဆွစ်လူမျိုးတွေရဲ့ဂုဏ်ယူစရာအဆောက်အအုံတစ်ခုလို့ ဆိုနိုင်တာပေါ့...။ ဒါနဲ့ အဆောက်အအုံရဲ့ အကြမ်းဖျဉ်းအတိုင်းအတာတွေရော သိလားဗျ...။

MTZO: အနားတစ်ဘက်ကို ၅၂၅ပေ စီရှိတယ်... အမြင့်ကတော့ ၈၅ပေ အထိပဲဗျ...။ သူ့ရဲ့တည်နေရာက Diagonal Avenue ရယ် Rambla de Prim ရယ်၊ the Ronda Litoral
ရယ်ဆိုတဲ့ ဘလောက်သုံးခုဆုံရာ နေရာမှာ တည်ရှိုတယ်...။ အဲဒီနေရာဟာ ပင်လယ်နဲ့ကုန်းမြေဆုံရာလို့လည်းဆိုတယ်...။ အဲဒီတော့ အဆောက်အအုံ ဒီဇိုင်းလုပ်တော့ သူတည်ရှိမယ့် နေရာလမ်းကျယ်ရဲ့ ဂျီသြမေတြီအပေါ် အခြေခံပြီး မြို့ရဲ့ ထောင့်မှန်ကွက် ပန္နက်ကို ကန့်လန့်ဖြတ် ပြီး ဆောက်ထားတာကြောင့် ကမ်းခြေရဲ့ သဘာဝအသွင်ကို ထင်ဟပ်စေတယ်ဗျ...။

MMO : အင်း... ဒါနဲ့သူ့ရဲ့ အသွင်နဲ့ အရောင်အဆင်းလေးတွေလည်းပြောပြစမ်းပါအုန်း....။

MTZO: တြိဂံပုံ အဆောက်အအုံ ကြီးပဲဗျ...။ အဲသူ့ရဲ့ တြိဂံထုမျက်နှာပြင်ကို ပင်လယ်ပြင်မျက်နှာမူထားပြီး တြိဂံဦးချွန်ကို မြို့ဘက်ဦးတည်ပေးထားလိုက်တယ်...။ သူ့ရဲ့ Concept က မြေပြင်ကနေမြှင့်ထားတဲ့ ကွန်ကရစ်ထုအပြင်အကျယ်ကြီးက ပင်လယ်ပြင်ကြီးကို ကိုယ်စားပြုတည်ဆောက်ထားတယ်တဲ့...။ ကျန်တဲ့ သံမဏိ တြိဂံပြင်အချပ်ပေါင်း ၂၈၀၀၀ နဲ့ ဖွဲ့စည်းထားတဲ့ ပုံစံမတူတဲ့ မှန်ဖောင်းကြွ မျက်နှာပြင်တွေကတော့ ကောင်းကင်ကြီးကို ကိုယ်စားပြုထားပါတယ်တဲ့...။

MMO : အေးဗျာ.... အတွေးနှင့်လုပ်ထားတာတွေက အံ့သြလောက်တယ်နော်... ကျနော်တို့တွေ စဉ်းစားလို့ မလွယ်နိုင်တဲ့ အတွေးတွေပဲဗျာ...။ ထက်မြက်တဲ့ ဗိသုကာတွေရဲ့လက်မှာ သဘာဝကနေ ဆင့်ပွားယူလိုက်တဲ့ အတွေးတွေက သမိုင်းတင်အောင် လုပ်ဆောင်နိုင်တာပဲဗျ.... ။ ဒါနဲ့ အတွင်းပိုင်းမှာရော ဘာတွေပါပြီး ဘယ်လိုတွေ စီမံထားသေးလဲ...။

MTZO: တြိဂံထုကြီးအောက်ခြေမှာ မြို့ပြဆိုင်ရာ အင်္ဂါရပ်တွေနဲ့လျှော်ညီအောင် စီမံခင်းကျင်းထားတဲ့ ဟင်းလင်းပြင်ကျယ်ကြီးပြုလုပ်ထားတယ်...။ မြှင့်ထားတဲ့ အဆောက်အအုံထဲမှာတော့ courtyard တွေကအမိုးအောက်မှာရှိတဲ့ ကွပ်လပ်တွေနှင့် အဆောက်အအုံအထပ်ထပ်ကို အပြန်အလှန် ဆက်စပ်ယှက်နွယ်နေစေပါတယ်...။ ဒါအပြင် အဲဒီဆက်နွယ်မှုတွေကတဆင့် သစ်လွင်တဲ့ မြင်ကွင်းတွေ... ထွေပြားဆန်းသစ်တဲ့ အလင်းပြုလုပ်ချက်တွေရစေတယ်...။ နောက် အဆောက်အအုံရဲ့ အဘက်ဘက်မှာဖောက်ထားတဲ့ အကွက်တွေမှာ လူတွေဖြတ်သန်းသွားလာလို့ ရနိုင်တယ်...။ အဲဒီလိုဖြတ်သန်းသွားလာရင်း အဆောက်အအုံကြီးရဲ့ အံ့မခန်းဗိသုကာလက်ရာတွေ အောက်အနိမ့်ပိုင်းကနေ ကြည့်ရှုခံစားနိုင်တယ်...။ အဒါတွေအပြင် အဲဒီနေရာတွေကနေ အဆောက်အအုံ အပေါ်ထပ်တွေနှင့် မြေအောက်ထပ်တွေမှာရှိတဲ့ ၇၀၀၀ စတုရန်းပေရှိတဲ့ ပြခန်း၊ ထိုင်ခုံ ၃၂၀၀ ဆန့်တဲ့ ဟောပြောပွဲခန်းမ၊ ကွန်ဖရင့်ခန်းတွေ၊ စားသောက်ဆိုင်ခန်းတွေနှင့် အခြားနေရာတွေကို သွားလာနိုင်အောင်စီမံထားပါတယ်။

MMO : အဟား... အတော်လေး ကောင်းပါလားဗျာ.... ဒါနဲ့ ဒီကောင်ကြီး ဆောက်လိုက်တဲ့ အတွက် ဘာများထူးခြားသွားသေးသလဲ...။

MTZO: အဲ...မြို့ပြစီမံကိန်းရှုထောင့်က ကြည့်ရင်တော့ အဲဒီအဆောက်အအုံဟာ မြို့တော်ရဲ့ ခမ်းနားတဲ့သမှိုိင်းဝင် လမ်းမကျယ်တစ်ခုရဲ့ အထင်ကရ အဆောက်အအုံအဖြစ် ဘာစီလိုးနားကမ်းခြေ အနားသတ်လိုင်းမှာ landmark တစ်ခုအဖြစ် ရှိနေတာပေါ့ဗျာ...။

MMO : အင်း... ကိုသန့်ဇင်ရေ.... အတော်လေး စုံစုံလင်လင်သိလိုက်ရလို့ ကျေးဇူးပဲဗျာ... နောက်လည်း ကျနော်တို့တွေ တခြားအဆောက်အအုံတွေ အကြောင်းဆွေးနွေးကြသေးတာပေါ့....။ ကဲ တာ့တာဗျာ... ကျနော်အိမ်ပြန်လိုက်အုန်းမယ်...။

မှတ်ချက်...။ကျနော်နှင့် MMO နှစ်ယောက်ပေါင်းပြီး လေ့လာရင်း ဒီအဆာက်အအုံကို ပထမဆုံးဖော်ပြဖို့ ကြိုးစားဖြစ်ခဲ့ပါတယ်...။ နောက်လည်း အဆင်ပြေပြီး လေ့လာသင့်၊ လေ့လာဖြစ်တဲ့ အဆောက်အအုံတွေ အကြောင်းတင်ပြပါ့မယ်....။
အခုကျနော်တို့ စလေ့လာဖြစ်တဲ့ အဆောက်အအုံကတော့ စပိန်နိုင်ငံမှာရှိတဲ့ ဖိုရမ်အဆောက်အအုံဖြစ်ပါတယ်...။
ခုဒီပိုစ့်မှာ ကျနော်နှင့် MMO စာတွေချည်းရေးရင် အဆင်မပြေလောက်ဘူးထင်လို့ အခုလို စကားပြောဟန်နှင့် စီစဉ်ကြည့်လိုက်ပါတယ်ခင်ဗျာ....

လေးစားစွာဖြင့်

MTZO&MMO

နှိုင်းယှဉ်ခြင်း(Comparing)

2010-03-20T20:24:00.004+08:00

နှိုင်းယှဉ်ခြင်း(Comparing)

အရာဝတ္ထုများရဲ့ အရွယ်အစား(The Size of Things) ကိုခန့်မှန်းသိရှိနိုင်ခြင်းကလည်း ဗိသုကာ ဒီဇိုင်းနာ တစ်ယောက်အတွက် အင်မတန်အရေးကြီးတဲ့ အချက်တစ်ခုပါ။ ကျနော်တို့အနေနဲ့ အရာဝတ္ထုတစ်ခုရဲ့ အတိုင်းအတာကို အခြားအတိုင်းအတာသိတဲ့ အရာဝတ္ထုတစ်ခုနှင့် နှိုင်းယှဉ်ဖြင့် အဲဒီအရာဝတ္ထုရဲ့အတိုင်းအတာကို အကြမ်းခန့်မှန်း သိရှိနိုင်ပါတယ်...။ ဗိသုကာတွေဟာ အရာဝတ္ထုတွေကို နှိုင်းယှဉ်ပြီး တစ်ခုနှင့်တစ်ခု Size များရဲ့ ဆက်သွယ်ချက်တွေကို Adjust လုပ်ခန့်မှန်းနိုင်ရပါမယ်။ ဒါမှသာ အရာဝတ္ထုတွေရဲ့ အလေးချိန် weight ကိုပါနားလည် မှန်းဆနိုင်မှာပါ။ အဲလိုနားလည်မှသာ ဘယ်လိုလေးလံတဲ့ အရာဝတ္ထုဟာ ဘယ်လိုပုံစံမျိုးဖြစ်လာမလဲ ၊ နောက် ခံနိုင်အား Strengh နှင့် အချိုးအဆ Scales စသည်ဖြင့် မှန်းဆနိုင်ပါ့မယ်။ အဆောက်အဦးတစ်ခု သို့မဟုတ် မြို့ကြီးတစ်မြို့ရဲ့ အစိတ်အပိုင်း နေရာအနှံမှာရှိတဲ့ ပစ္စည်းတွေရဲ့ အရွယ်အစားတွေကို သူတို့ပတ်ဝန်းကျင်မှာရှိတဲ့ အခြားအရာဝတ္ထုတွေနှင့် နှိုင်းယှဉ်လေ့လာတဲ့ အလေ့အကျင့်လေးကို ကျနော်တို့တစ်တွေ ပြုလုပ်သင့်ပါတယ်။ အရာအဝတ္ထုတစ်ခုဟာ ဘယ်လောက်ကြီးတယ်၊ ငယ်တယ်ဆိုတာကို အခြားအရာ ဝတ္ထုတစ်ခုနဲ့နှိုင်းယှဉ်ရင် အလွယ်တကူ သိရှိနိုင်ပါတယ်။

ရှေးခေတ် ဂရိလူမျိုးအာခီတတ်တွေဟာ အဲလို အရာဝတ္ထုတွေ နှိုင်းယှဉ်ခြင်းကို ကောင်းစွာလေ့လာ သင်ယူနိုင်ခဲ့ကြပါတယ်။ အဆောက်အဦးတွေရဲ့ ရှေ့မှာ ရုပ်ထုတစ်ခု ထားမယ်ဆိုရင် သူတို့တွေ စဉ်းစားကြတာက အဲဒီရုပ်ထုတွေကို သာမန်သက်ရှိလူသားတွေထက် အရွယ်အစားကြီးပြီး ထုလုပ်လေ့ရှိကြပါတယ်။ ဘာကြောင့် အဲလိုမျိုးထုလုပ်ခဲ့ကြတာလဲ.... ?

ကျနော်တို့မျက်လုံးမြင်ကွင်းအနေနဲ့ ရှင်းလင်းစွာတွေ့မြင်ဖို့ လိုအပ်နေလို့ပါပဲ...။ ကျနော်တို့တွေ အဲဒီရုပ်တုတွေကို ကြည့်ရှုချိန်မှာ မြေပြင်ကနေ အပေါ်အမြင့်ကိုမော့ ကြည့်ကြရတာပါ...။ ကျနော်တို့ မျက်လုံးတွေရဲ့ အမြင်ဟာ အရာဝတ္ထုတွေနဲ့ဝေးလေ သေးကွေးတယ်လို့ထင်ရလေပါ....။ အဲဒီတော့ အဲဒီရုပ်ထုတွေရဲ့ အရွယ်အစားဟာ သာမန်သက်ရှိတွေထက်ကြီးနေရတော့တာပေါ့...။

ပုံမှာပြထားတဲ့ ဥပမာလေးကို လေ့လာကြည့်ပါ...။ လူနှင့် တဲ(Tent)လေးတွေကို နှိုင်းယှဉ်ပြထားခြင်းပါ...။ ဘယ် တဲ (Tent) ကကြီးသလဲ ဘယ်တဲကငယ်သလဲဆိုတာကို အလွယ်တကူ ခန့်မှန်းနိုင်ကြမှာပါ...။ ဘာကြောင့်ဆိုတော့ ကျနော်တို့တွေ လူတွေရဲ့ အချိုးအဆနှင့် နှိုင်းယှဉ်လိုက်လို့ပါပဲ...။ ကျနော်တို့တွေရဲ့ ဦးနှောက်က လူရဲ့အရွယ်အစားနှင့် တဲလေးတွေရဲ့ အရွယ်အစားကို နှိုင်းယှဉ်ရာမှာ အလွယ်တကူ အဖြေထုတ်ပေးလိုက်နိုင်ပါတယ်။

အတွေးလေးတွေပွားကြည့်ရ အောင်ဗျာ....
ကြီးမားတဲ့ ဘယ်လိုပစ္စည်းတွေများတွေ့ဖူးကြပါသလဲ....။
အလွန့်အလွန်ကြီးတဲ့ အရာတွေရော စဉ်းစားမိပါသလား....။
နောက် အင်မတန်သေးငယ်တယ်လို့ ထင်ရတဲ့ ပစ္စည်းလေးတွေရော ဘယ်လောက်များ စဉ်းစားမိပါသလဲ....။
ဖြစ်နိုင်ရင် စာရင်းလေးတွေ လုပ်ကြည့်ပါလား....။

နောက် စဉ်းစားကြည့်ဖို့ ပြောပြပါအုန်းမယ်....။ ကြွက်ငယ်လေး တစ်ကောင်ကို ကြီးတယ်ထင်သလား...။ ငယ်တယ်ထင်သလား....။
အကယ်၍ အဲဒီကြွက်ကလေးကို ပုရွတ်ဆိတ်တစ်ကောင်နှင့် နှိုင်းယှဉ်လိုက်မယ်ဆို ကြွက်ကလေးဟာ ဘယ်လိုနေမလဲ....။ အဲလိုမှမဟုတ်ပဲ ဆင်တစ်ကောင်နှင့် နှိုင်းယှဉ်လိုက်မယ်ဆိုရင်ရော....။
အတွေးလေးတွေ ပွားကြည့်ကြပါခင်ဗျာ....။

ဒါနဲ့ ကားတွေကို ထုတ်လုပ်ထားတာမှာ ကလေးလေးတွေနှင့် အသုံးပြုဖို့ သင့်တော်တဲ့ အရွယ်အစားလို့ထင်မိပါသလား...။ တံခါး သော့ခလောက်(Door Lock)တွေကိုလည်း သုံးနှစ်သားအောက် ကလေးငယ်လေးတွေဖွင့်လို့ရဖို့ စီစဉ်ထားကြပါသလား...။ ရေသောက်ဖို့ ရေပန်းတိုင်တွေကိုရော....။ ဘက်စကတ်ဘောကစားဖို့ ကစားစရာ စင်တာတွေရော....။ စဉ်းစားမိသလောက်လေးတွေ တွေးကြည့်ကြပေါ့ဗျာ...။

ခုနကမေးခွန်းတွေကို ပြန်စဉ်းစားကြည့်မယ်ဆိုရင်...
တံခါးသော့ခလောက်(Door Lock) ဆိုရင် ကလေးတစ်ယောက်အတွက် အရမ်းမြင့်နေပါတယ်၊ သောက်ရေဘုံတိုင်(Drinking fountain)လည်း အရမ်းမြင့်နေတာပဲ...။ အခြားလှေကားထစ်တွေဆိုရင်လည်း ကလေးတစ်ယေက်အတွက် ကြီးနေပြန်ရော.....။ မျက်နှာကျက်တွေ၊ ထိုင်ခုံတွေ၊ ရေချိုးခန်း ကြွေဇလုံတွေ....။ မီးခလုတ်စတာတွေဟာ ကလေးတွေနှင့် အဆင်မပြေကြတာတွေ့ဖူးကြမှာပါ...။
နောက်ဆုံးအနေနဲ့ အချိန်လေးများရကြမယ်ဆိုရင် ကလေးတွေနှင့် အဆင်မပြေဖြစ်နေတဲ့ Out of scale ဖြစ်နေတဲ့ အရာတွေကို စာရင်းလေးတွေ စုစည်းပြီး ဘယ်ဟာမျိုးကဖြင့် ကလေးလေးတွေအတွက် အဆင်ပြေအောင်စီစဉ်နိုင်မယ်.... ဘယ်လိုအရွယ်အစား ဒီဇိုင်းလေးတွေ လုပ်သင့်တယ်..... အထားအသိုလေးတွေ ဘယ်လိုထားသင့်တယ်.... အသုံးဝင်အောင် ဘယ်လိုမျိုးလေးတွေပြုလုပ်သင့်တယ်..... ဆိုတာမျိုးလေးတွေ ဝိုင်းဝန်းစဉ်းစားတွေးတော အဖြေရှာကြမယ်ဆိုရင်ဖြင့်..... ကျနော်တို့တွေ အတွေးလေးတွေ ပွားရင်း အရွယ်အစား နှိုင်းယှဉ်ခြင်း(Comparing) ဆိုတာကို နားလည်သွားမယ်လို့ မျှော်လင့်မိပါတယ်ခင်ဗျာ...။

MMO

Creative Space

အခြေခံ Geometric Shapes လေးမျိုး

2010-03-20T20:04:00.003+08:00

အခြေခံ Geometric Shapes လေးမျိုး

ဗိသုကာတွေဟာ စတုရန်း(Squares), စက်ဝိုင်း(Circles), အစက်(Points) နှင့် တြိဂံ (Triangle) စတဲ့ အခြေခံ ဂျီသြမေတြီ ပုံစံလေးမျိုးကနေ ဖြစ်ပေါ်လာတဲ့ ပုံစံ(Forms) အမျိုးမျိုး၊ ပုံသဏ္ဍာန်(Shapes) အမျိုးမျိုးကို အသုံးပြုပြီး သူတို့ရဲ့ ဒီဇိုင်းတွေကို ပုံဖော်တည်ဆောက်ကြပါတယ်။ ဒီဇိုင်နာအားလုံးဟာ အဲဒီအခြေခံ ပုံစံလေးမျိုးရဲ့ အသုံးဝင်မှုကို ကောင်းစွာနားလည်သဘောပေါက်ကြပါတယ်။
- အခြေခံ စတုရန်း(Squares) ပြင်ညီ plain တစ်ခုကို အညီအညာ စုပုံထပ်လိုက်မယ်ဆိုရင် ကုဗတုံး(cube) သို့မဟုတ် ၊ သေတ္တာ (box) တစ်ခုအဖြစ်ရရှိမှာပါ။
- အခြေခံ စက်ဝိုင်း(Circles) ပြင်ညီ plain တစ်ခုကို အညီအညာ စုပုံထပ်လိုက်မယ်ဆိုရင် ထုလုံးရှည်(Cylinder) တစ်ခုအဖြစ် တွေ့မြင်ရမှာပါ။
- စက်ဝိုင်း(Circles) အကြီးတစ်ခုမှ အစဉ်လိုက် သေးငယ်သွားသော စက်ဝိုင်းလေးတွေ စုပုံထပ်လိုက်ပြီး အဆုံးမှာ Point တစ်ခုအဖြစ်ထားလိုက်မယ်ဆိုရင် ထုလုံးချွန် (Cone) တစ်ခုအဖြစ်ရရှိပါမယ်။

- ထို့အတူ စတုရန်း(Squares) အကြီးတစ်ခုကို နောက်ဆုံး point လေးတစ်ခုအဖြစ်ထိ စုပုံထပ်လိုက်မယ်ဆိုရင် ပိရမစ် (Pyramid) တစ်ခုအဖြစ်ရရှိအုန်းမှာပါပဲ...။
- နောက် တစ်မျိုးက စက်ဝိုင်း(Circle) အပြားတစ်ခုကို ထောင်ပြီး လည်အောင်လှည့်လိုက်မယ်ဆိုရင် စက်လုံး(Sphere) သို့မဟုတ် ဘော်လုံးတစ်လုံး(ball) အဖြစ်မြင်တွေ့ရတော့မှာပါ...။

- တြိဂ (Triangles) တွေကို အခြေအနားအောက်မှာ ထောင်ထားပြီး ဘေးတိုက်အစဉ်အတိုင်း စဉ်ပြီးထားလိုက်မယ်ဆိုရင် အိမ်တစ်အိမ်ရဲ့ အမိုး(Roof) သို့မဟုတ် တဲ(Tent) ပုံသဏ္ဍာန်တွေ ဖြစ်လာနိုင်ပါတယ်...။နောက်ထပ်စဉ်းစားနိုင်တာတွေကတော့ အဲဒီအခြေခံ Geometric Shapes တွေထဲက တစ်ခုခုကို အခြားတစ်ခုခုနှင့် ပေါင်းထည့်ခြင်း ဖျက်ထုတ်ခြင်းပြုလုပ်လိုက်မယ်ဆိုရင်လည်း အခြား သီးခြား ဆန်းသစ်တဲ့ Geometric Shapes တွေဖြစ်လာပါလိမ့်မယ်...။

အခြေခံ Geometric ပုံစံရှိတဲ့ ပစ္စည်းလေးတွေကို ကျနော်တို့ ပတ်ဝန်းကျင်မှာ စဉ်းစားကြည့်မယ်ဆို များစွာ တွေ့နိုင်ပါတယ်...။
- Doughnuts မုန့်လေးတွေဟာ Circles လေးများလိုပါပဲ...။
- Crackers မုန့်လေးတွေဟာ Square လေးများလိုပါပဲ...။
စသည်ဖြင့်ပေါ့ဗျာ... ကျနော်တို့ ပတ်ဝန်းကျင်မှာ ရှိတဲ့ အရာဝတ္ထုလေးတွေရဲ့ ပုံဏ္ဍာန် အမျိုးမျိုးဟာ ဘယ်လို Geometric Shapes လေးတွေနဲ့ ဖွဲ့စည်းထားသလဲဆိုတာ လေ့လာရင်း သူတို့တွေနှင့် ဖွဲ့စည်းတည်ဆောက်မယ့် ကျနော်တို့တွေရဲ့ ဒီဇိုင်းတွေကို အမျိုးမျိုး ကွန့်မြူးနိုင်မယ် ဆိုတာ အသေအချာပဲဗျာ....။

MMO

Creative Space

EDGES ( အစွန်းအနားသတ်များ )

2010-02-08T23:51:00.003+08:00

ပုံသဏ္ဍာန် (shapes) တွေနှင့် ပြင်ညီ (planes) တွေရဲ့ အပြင်အနားသတ်တွေကို အစွန်းအနားသတ် (edges) လို့ခေါ်ကြပါတယ်..။ Edges လို့ ပြောတာက ပိုအဆင်ပြေမယ်ထင်ပါတယ်။ အရာဝတ္ထုများစွာရဲ့ ဆက်နွယ်မှုတွေ နားလည်နိုင်ခြင်းကို edges များက အဆုံးအဖြတ် ပေးပါတယ်...။ ကျွမ်းကျင်တဲ့ ဒီဇိုင်နာကောင်းတွေမှသာ အမြင်ဆိုင်ရာ အကျိုးသက်ရောက်မှုမှာ edges များရဲ့ အရေးပါမှုကို နားလည်နိုင်ပါတယ်.။

Edges ... အမျိုးအစားများစွာရှိပါတယ်...
lines,
contours,
value contrast,
texture,
colour and harmory....

စတာတွေရဲ့ ဆက်သွယ်ချက်တွေကို ဆုံးဖြတ်ရာမှာ edges ကိုနားလည်နိုင်ခြင်းက များစွာ အရေးပါပါတယ်...။
အစွန်းသတ်(edges) နှစ်ခု(သို့မဟုတ်) နှစ်ခုထက်ပိုပြီးတွေ့ဆုံမယ်ဆိုရင် အဲဒီတွေ့ဆုံတဲ့နေရာကို ဖော်ပြဖို့ မျဉ်းတစ်ကြောင်းအနေနဲ့ ပြရပါတယ်..။ အမှန်တကယ် အဲဒီ ဆုံတဲ့နေရာမှာ မျဉ်းအဖြစ် ရှိမနေရင်တောင်မှ အဲဒီလို ဖော်ပြတတ်ပါတယ်။ ပြင်ညီတစ်ခုဟာ ထောင့် (corner) အဖြစ် ချိုးသွားရင်ဖြစ်စေ၊ colour , value သို့မဟုတ် texture ပြောင်းသွားရင်ဖြစ်စေ၊ အခြား ပြင်ညီတစ်ခုနဲ့ တွေ့ဆုံရင်ပဲ ဖြစ်စေ အဲဒီလို edges တွေ ဖြစ်ပေါ်တတ်ပါတယ်။ အဖောင်းအခုံး များရဲ့ edges တွေကို ထင်ထင်ရှားရှားတွေ့ဖို့တော့ ခဲယဉ်းပါတယ်..။ edges တွေကို နမူနာအနေနဲ့ စဉ်းစားမယ်ဆိုရင် blackboard နှင့် wall တွေ့ဆုံတဲ့နေရာတွေ၊ နောက် ကျောင်းဝန်းနှင့် ခြံစည်းရိုး ၊ စတာတွေပေါ့...။အဲဒီတွေ့ဆုံတဲ့နေရာတွေဟာ မျဉ်းကြောင်း(lines) တွေအဖြစ်တကယ်ရှိနေပါသလား။ ကျောင်းဝန်းရဲ့ ခြံစည်းရိုးဟာလည်း ကစားကွင်းရဲ့အဆုံးဖြစ်နေသလား။ မြက်ခင်းတစ်ခုကို စဉ်းစားကြည့်စမ်းပါအုုံး။ အဲဒါရဲ့ edges ဟာ ဘာတွေများဖြစ်နေမလဲ။ လူသွားလမ်းလေးတစ်ခုလား။ နံရံတစ်ခုလား။ အမည်းရောင်ကတ္တရာလမ်းတစ်ခုများဖြစ်နေမလား....။ စသည်စသည်ပေါ့လေ....။ အများကြီးတွေးယူ ဖြစ်နိုင်တယ်မဟုတ်လား။ ဒါနဲ့ ပင်လယ်ပြင်ကြီးရဲ့ ရေပြင်တွေ အဆုံးကိုရော ဘယ်လိုများခေါ်ကြပါလိမ့်...။ရှေးတုန်းက လူတွေဟာ ကမ္ဘာကြီးကို အပြားကြီးလို့ ယူဆခဲ့ချိန်မှာ လူတွေမေးခဲ့ကြတယ် ကမ္ဘာကြီးရဲ့ အဆုံးကိုရောက်သွားရင် ဘာဖြစ်မလဲပေါ့...။ အဖြေကတော့ ရိုးရိုးရှင်းရှင်းလေးပါ အာကာသထဲကို လိမ့်ကျသွားမှာပေါ့တဲ့....။ ဒါပေမယ်... ဘောလုံးလို အလုံး (sphere) ပစ္စည်းတွေမှာ edges ကိုရှာဖွေဖို့ အင်မတန်ခက်ခဲပါတယ်...။ ဘာကြောင့်ဆိုတော့ ကုဗတုံးတစ်ခုလို ချွန်ထက်တဲ့ ထောင့်ချိုးရှိမနေလို့ပါပဲ...။ ပုံသဏ္ဍာန် (shapes) တွေဟာ အရာဝတ္ထုတစ်ခုအတွက် edges
ဖြစ်မလား contour ဖြစ်မလားဆိုတာ ဖော်ပြပေးပါတယ်။

နိုင်ငံတစ်နိုင်ငံရဲ့ edges ကတော့ နယ်စပ်၊ နယ်ခြား (boundaries) တွေပဲဖြစ်ပါတယ်။ အေရီရယ် ဖိုတိုဂရပ် တွေနှင့် မြေပုံတွေမှာ boundaris တွေကို ပုံသဏ္ဍာန်တွေ ရှိနေတယ်ဆိုတာ တွေ့နိုင်ပါတယ်။ တခါတရံ တောင်ကုန်းတောင်တန်းတွေ အဖြစ်၊ တခါတရံ ဖြစ်တွေ၊ ပင်လယ်တွေ၊ ချောင်းတွေ၊ ရေကန်တွေအဖြစ်တွေ့ကြရပါတယ်။ မေးခွန်းလေးတွေမေးရမယ်ဆိုရင် ခင်းဗျားတို့ ကျနော်တို့တစ်တွေရဲ့ အခန်းတွေမှာ ရော boundaries တွေရှိနေသလား။ အဆောင်အဦးတစ်ခုရဲ့ boundaries တွေကရော ဘယ်နေရာမှာရှိနေလဲ....။ စတာတွေပေါ့.... တွေးကြည့်၊ ဖြေကြည့်ကြပါအုနး်...။

ဒါနဲ့ edges ဆိုတာ အင်မတန် အန္တရာယ်များတဲ့ နေရာ တစ်ခု။ တစ်ခါတုံးက စွန့်စားချင်တဲ့ လူငယ်နှစ်ယောက်ဟာ တောင်အတတ်အဆင်း ပစ္စည်း တင်ချလုပ်ရတဲ့ ကားမောင်းလုပ်ငန်းမှာ ဝင်လျှောက်ကြပါတယ်။ အင်တာဗျူးတဲ့အခါ လူငယ်တစ်ယောက်က သူကားမောင်း ဘယ်လောက်ကျွမ်းကျင်တယ်ဆိုတာ အလုပ်ရှင်ကို ပြောချင်တဲ့ အတွက် “ ကျနော် ကြွတ်တစ်ကောင် အခန်းမဟုတ်တဲ့နေရာမှာ ပြေးလွှားသလို လမ်းရဲ့ အစပ် (edges of road) တွေမှာကို ကပ်ပီးမောင်းနိုင်ပါတယ်” လို့ပြောလိုက်တယ်။ နောက်လူငယ်တစ်ယောက်ကတော့ edges ရဲ့ သဘောတရားကို နားလည်တဲ့သူတစ်ယောက်ဖြစ်တော့ “ ကျနော်ကတော့ ကားမောင်းရင် တောင်နံရံနဲ့ ကပ်ပြီးမောင်းပါတယ်။ ဖြစ်နိုင်သမျှ လမ်းအစပ်(edges of road) နဲ့ ဝေးအောင်ဂရုစိုက်ပါတယ်” လို့ပြောလိုက်ပါတယ်...။ အလုပ်ရှင်ဟာ ဒုတိယလူငယ်ကို ရွေးပြီးခန့်လိုက်ပါတယ်တဲ့....။
ကဲဗျာ ဒီလောက်ဆိုရင် edges အကြောင်း တီးမိခေါက်မိလောက်ပြီ ထင်ပါတယ်နော်....။

MMO

Creative Space

အရောင်နှိုင်းယှဉ်ခြင်းဆိုတာ ဘာလဲ?

2010-01-17T11:22:00.003+08:00

နှိုင်းယှဉ်ခြင်းဆိုသည့် စကားလုံးကို ရှုထောင့်အမြင်မျိုးစုံ မှ အဓိပါ္ပယ်ဖွင့်ဆိုထားကြပါတယ်။ အဘိဓာန်တွေထဲမှာ အရောင်နှိုင်းယှဉ်ခြင်း ကို မတူညီသော အရာ၀ထ္ထုများ၊ အရောင်များကို ကပ်ညှိထားခြင်း ( အရောင်၊ အသံ၊ ခံစားမှုအနုပညာ၊ ပန်းချီကားတစ်ချပ် ဓာတ်ပုံ ရုပ်မြင်သံကြား တို့ဧ။် အလင်းဆုံးနှင့် အမှောင်ဆုံး အပိုင်းများအကြား ကွာခြားမှု Degree) လို့ ဖွင့်ဆိုထားပါတယ်။ အရာ၀ထ္ထု နှစ်ခု ကိုကွဲပြားစွာ နှိုင်းယှဉ်ရန်အတွက် လူ သို့မဟုတ် အရာ၀ထ္ထု တို့ဧ။် မတူညီသော အရည်အသွေးများကို နေရာချင်းနှိုင်းယှဉ်ခြင်းပဲ ဖြစ်ပါတယ်။

ဒီပုံမှာ လူအုပ်ရဲ့ အရောင်ဟာ မီးခိုးရောင် အခဲ အပြင်လို ဖြစ်နေတာကြောင့် ဒီအဖြူ ၊ အမဲ ဓာတ်ပုံဟာ အသေးစိတ်ဖတ်နိုင်ဖို့ ခက်ခဲတာကို တွေ့ရပါတယ်။ ကျွန်တော်တို့တွေ မြင်တွေ့ရတဲ့ နောက်ဆုံးရလဒ်ကတော့ အဖြူ၊ မီးခိုးရင့်ရောင် နဲ့ ရုပ်လုံးမကြွ တဲ့ စိတ်ဝင်စားစရာ မကောင်းသော ပုံတစ်ပုံ ပါပဲ။

နောက်တစ်ပုံ ကိုကြည့်မယ်ဆိုရင်တော့ ဖန်တီးရှင်က ဒီမီးဖိုချောင်ထဲက ရှုပ်ထွေးတဲ့ ဒီဇိုင်းနဲ့ ပုံဖော်ထားတဲ့ ဘီဒိုတွေကို ပေါ်လွင်စေဖို့ နံရံ နဲ့ ကြမ်းခင်းအတွက် မီးသွေးရင့်ရောင် ကိုသုံးထားပြီး ဘီဒိုတွေကိုတော့ နို့နှစ်ရောင် ခြယ်ပြီး မီးဖိုချောင်ရဲ့ ဖွဲ့စည်းမှုကို ထင်ရှားပေါ်လွင်စေတာ တွေ့ရပါတယ်။ ပြန်ကြည့်မယ်ဆိုရင် ကောင်းမွန်မှန်ကန်တဲ့ အဖြူ၊ အနက် ပုံဟာ အရောင်နှိုင်းယှဉ်ထားတာကို အသိမှတ်ပြုစေတဲ့ ပြည့်စုံတဲ့ နည်းလမ်းပါ။ မှန်ကန်တဲ့ မှင်အရောင်တွေက ပုံရဲ့ အသေးစိတ်ကိုနှိုင်းယှဉ်ညှိနှိုင်း ရေးဆွဲပေးသွားခြင်း ဖြစ်ပါတယ်။

အရောင်နှိုင်းယှဉ်ခြင်း

စားကျက်စိမ်းကို နောက်ခံထားတဲ့ သိုးဖြူတစ်ကောင်၊ စိမ်းပြာရောင် ပင်လယ်ပြင်ပေါ် မှာ မြှုပ်ချည်ပေါ်ချည် ကစားနေသော တောက်ပတဲ့ လိမော်ရောင် အချက်ပြ ဘော်လုံးများ၊ ဆီးနှင်းတွေ ဖုံးအုပ်နေတဲ့ တောင်ကုန်းအောက်က ပေါ်ထွက်နေတဲ့ အနက်ရောင် ကျောက်ဆောင် အငူအစွန်းတွေ စသဖြင့် သဘာဝက နှိုင်းယှဉ်ပေးထားတဲ့ အရောင်တွေ ကို ကျွန်တော်တို့ရဲ့ ပတ်ဝန်းကျင်မှာ နေ့စဉ် မြင်တွေ့ နေရပါတယ်။ ဒါတွေဟာ ကျွန်တော်တို့တွေ သင်ယူခဲ့ဖူးတဲ့ အရောင် နှင့် အရိပ် (အသံ) နှစ်ခု နှိုင်းယှဉ်ခြင်း ဖြစ်သလို အရာ၀ထ္ထု တစ်ခုရဲ့ ပုံစံ နဲ့ အသွင်အပြင်ကို နှိုင်းယှဉ်ခြင်း ဖြစ်ပါတယ်။

အနက်ရောင် ကျောက်တုံးများ နှင့် အဖြူရောင် ဆီးနှင်းများ အကြား မညီညာသော နှိုင်းယှဉ်မှု။

အကယ်လို့ အရာ၀ထ္ထု နှစ်ခုဟာ ပုံစံတူတဲ့ သွင်ပြင်သဏ္ဍန် ရှိပြီး တစ်ခုနဲ့တစ်ခု သိပ်နီးကပ် နေမယ်ဆိုရင် ပုံထွက် အရောင်ဟာ ပတ်ဝန်းကျင် က အရောင်တွေနဲ့ ရောစပ်သွားပြီး တခုကို တခု ခွဲခြား သိမြင်နိုင်ဖို့ အလွန်ကို ခက်ခဲပါတယ်။ ဒါဟာ နှိုင်းယှဥြ်ခင်း မဟုတ်ပါဘူး။ ဒါဟာ အိမ်တွင်းအလှဆင်မှု အပိုင်းမှာ ကျွန်တော်တို့ သဘောမတွေ့တဲ့ နေရာတွေကို ပုံဖျက်ဖို့အတွက်တော့ အလွန် အသုံးဝင်တာ တွေ့ရပါတယ်။

ကွန်ကရစ်ဖုံးလမ်း နှင့် အစိမ်းရောင်မြက်ခင်းပြင် နှစ်ခုကို နှိုင်းယှဉ်A သီးခြား ထိုင်ခုံနေရာ ဖန်တီးခြင်း။

ဥပမာ ။ ။ ခုန်တန်းလျားပေါ်မှ အညိုရောင် သစ်သားကြောင်အိမ် တံခါးရွက်ပုံ ပေါ်အောင် ဆေးသုပ်ထားခြင်း နဲ့ အရောင်ဖျော့ နံရံတွေ ဟာ အမြင်မှာ ကြီးမားတဲ့ ထားသိုစရာနေရာများ မှ နံရံ အတွင်း သို့ ဝင်ရောက်သွား သည်ဟု ထင်ယောင်ထင်မှား ဖြစ်စေပြီး နှိုင်းယှဉ်ခြင်း လမ်းကြောင်းများကို ဖယ်ရှားထားပါတယ်။ ဒါကြောင့် အရောင်နှိုင်းယှဉ်ခြင်း ဟာ ဒီဇိုင်း နဲ့ တစ်စုံတစ်ရာ ကို ဖမ်းဆုပ် ပုံဖော်ညွှန်းဖို့ အတွက် အလွန် အသုံးဝင်သော ကိရိယာတန်ဆာပလာ တစ်ခု ဖြစ်ပါတယ်။

CHOICE, ARRANGEMENT, HEART SHOW

2009-12-23T22:53:00.003+08:00

Space တစ်ခုအတွင်း ထည့်သွင်းထားတဲ့ element တွေရဲ့ ပုံပန်းသဏ္ဌာန်၊ အရွယ်အစား၊ အရောင်အသွေး၊ အနုအရွ၊ အကြမ်းအထည်၊ အပျော့အမာ ကွာခြားမှုတွေဟာ design တစ်ခု၏ function အပေါ်မှာ မည်ရွေ့မည်မျှ အကျိုးသက်ရောက်မှု ရှိနေသည်၊ တစ်ချိန်ထဲမှာပင် ထို element များသည် အမြင်အာရုံတွင် aesthetic desires ဟု ဆိုနိုင်သော အနုသုခုမ ပြေပြစ်ညီညွတ်မှုအပေါ်တွင်လည်း မည်ရွေ့မည်မျှ အကျိုးသက်ရောက်မှု ရှိနေသည်ကို ဆက်လက် လေ့လာမိသောအခါ-

Element တစ်ခုချင်းစီမှာ shape, form, size, color and texture လို့ ဆိုနိုင်တဲ့ သီးခြား ဝိသေသ လက္ခဏာတွေ ရှိမှာပါ။ သို့ပေမယ့် ထို element များကို ဖွဲ့တည် design လုပ်ယူတဲ့အခါမှာ သူတို့ရဲ့ location and orientation အပေါ်မှာနဲ့ visual weight အပေါ်မှာ မူတည်ပြီး အဆိုပါ element များဟာ space တစ်ခုရဲ့ pattern များကို ပြောင်းလဲစေနိုင်သလို design တစ်ခုရဲ့ ဆွဲဆောင်မှု ရှိခြင်း မရှိခြင်း၊ လက်ခံနိုင်ခြင်း၊ မလက်ခံနိုင်ခြင်းကိုလည်း သတ်မှတ်ပေးနိုင်ပါတယ်...။

Figure & Ground Relationship
အထက်ပါ ပုံကို ကြည့်ရင် ကျွန်တော်တို့မြင်ရတာကို နောက်ခံ အဖြူရောင် background ပေါ်ကနေ အနက်ရောက် မျက်နှာ နှစ်ခုလေလား....။ နောက်ခံ အနက်ပေါ်မှာ ရုပ်လုံးပေါ်လာမယ့် အဖြူရောင် boundary တစ်ခုလေလား...။ သေချာတာကတော့ figure တစ်ခုဟာ background တစ်ခုရဲ့ ရှေ့ဖက်မှာ ဖြစ်တည်ပြီးမှ တည်ရှိနေမှာဖြစ်ပြီး ground တစ်ခုဟာလည်း figure တစ်ခုရဲ့ နောက်ကွယ်မှာ တည်ရှိနေမှာ ဖြစ်ပါတယ်..။ သို့ပေမယ့် figure တစ်ခုအတွက် boundary တစ်ခုရဲ့ function ဟာ နောက်ခံ background အပေါ်မူတည်ပြီး ဘယ်လို ပြောင်းလဲသွားနိုင်လဲဆိုတာကိုတော့ ဆန်းစစ်ဖို့လိုပါလိမ့်မယ်...။

Black & White Relationship
အထက်ပါ ပုံမှာဆိုရင်လည်း white circle တစ်ခုက black square တစ်ခုရဲ့ ရှေ့မှာရှိတာလား..။ black square တစ်ခုမှာ white circle ပုံ အပေါက်တစ်ခုဖြစ်နေတာလား... ဆန်းစစ်ကြည့်ရမှာပါ...။ အထူးသဖြင့် element တွေကို ရှေ့တိုး နောက်ဆုတ် ပြုလုပ်တဲ့အခါမှာ ဖြစ်လာနိုင်တဲ့ effect တွေကို စောကြောဆင်ခြင်နိုင်ပါတယ်...

Reversable Effect
အထက်ပါပုံမှာတော့ အနက်ရောင်ဖက်နဲ့ အဖြူရောင်ဖက်ဟာ ဟိုဖက် ဒီဖက် mirror ပြုလုပ်ထားသလို ဖြစ်နေတာကို တွေ့ရမှာပါ...။ တစ်ခုနဲ့ တစ်ခု ကွဲပြားခြားနားတယ်ဆိုပေမယ့် မတူညီတာနှစ်ခုကို ပေါင်းစပ် ဖွဲ့တည်မှုမှာ အကွာအဝေး အနီး အဝေးကို ဖြစ်စေနိုင်တာလို့ နားလည်မိပါတယ်...။

Unity
Space တစ်ခုအတွင်းမှာ ထည့်သွင်းမယ့် element လေးတွေရဲ့ location တည်ရှိမှုဟာလည်း ကြည့်သူရင်မှာ ပဒသ ဖြစ်ဖို့လိုသလို နေရာချမှုဟာ စနစ်ကျ မှန်ကန်ဖို့ လိုနေမှာပါ...။ အထက်ပါ ပုံမှာကြည့်မယ်ဆိုရင် element ၃ မျိုးချင်း အတူတူ ဆိုပေမယ့် နေရာ ထားရှိမှု ကွာခြားချက်ကြောင့် အပြောင်းအလဲတွေ အများကြီး ဖြစ်တည်နေတာကို တွေ့မြင်ရမှာပါ..။ ထို့အတူပဲ သီးခြားစီ တစ်ကွဲတစ်ပြား တည်ရှိမှုနဲ့ သက်ဆိုင်ရာ တူညီမှုတွေကို စုစည်းမှုဟာ ဒီဇိုင်း တစ်ခုကို အများကြီး ပြောင်းလဲသွားစေပါတယ်...။

“Harmony”

ကျွန်တော်တို့ ပြောပြောနေကြတဲ့ စကား တစ်ခွန်းရှိပါတယ်...။ တစ်စုံ တစ်ခုကိုမြင်လို့ အဲ့ဒါဟာ မျက်စိထဲမှာ မလိုက်ဖက်ဖူးဆိုရင် ဟာမိုနီမဖြစ်ဖူး.. design out တယ်လို့ ဆိုကြတယ်ပေါ့..။ Harmony ဆိုသည်ကလည်း ပေါင်းစပ် ဖွဲ့စည်းထားတဲ့ element လေးတွေဟာ တစ်ခုနဲ့ တစ်ခု လိုက်ဖက် ညီညွတ်ပြေပြစ်ပြီး ကြည့်သူရင်မှာ ပဒသ ဖြစ်စေသည် အချက်ပင် ဖြစ်သည် မဟုတ်ပါလား။

JohnMoeEain

Creative Space

http://www.johnmoeeain.blogspot.com/

“Melody, Feeling & Thinking of LINE"

2009-12-23T22:23:00.003+08:00

Space တစ်ခုကို design လုပ်ဖို့ စဉ်းစားသောအခါ-
1) Dot ဆိုတဲ့ အစက်ကလေးများနှင့် လည်းကောင်း
2) Line ဆိုတော့ မျဉ်းအမျိုးမျိုးများနှင့် လည်းကောင်း
3) Shape & Form ဆိုတဲ့ ဖွဲ့စည်းပုံ အမျိုးမျိုးနဲ့လည်းကောင်း Space တစ်ခုကို Design လုပ်လေ့ရှိတယ်လို့ ဆိုကြပါတယ်... ကဲ.. ကျွန်တော်တို့အနေနဲ့ Space တစ်ခုကို design မလုပ်ခင်မျာ ဒီ Dot, Line, Shape & Form တွေရဲ့ သဘောသဘာဝကို လေ့လာကြည့်ရအောင်နော်...။

"DOT ဆိုတဲ့ အစက်ကလေးတွေ ဘယ်လိုများ လုပ်ဆောင်ပေးပါသလဲ....."

Size of Dot &Thick and Thin Line

ဒီပုံလေးကို ကြည့်ရင် Dot လေးတွေရဲ့ ဖွဲ့စည်းပုံအလိုက်၊ သူ့ရဲ့ အထူ အပါး အလိုက်၊ ထားရှိမယ့်နေရာ နေရာ ချမှုအလိုက် design တစ်ခုကို ပြောင်းလဲ ဖြစ်တည်စေနိုင်တာကို တွေ့နိုင်ပါတယ်.. ထို့အတူပဲ ကျွန်တော်တို့ design လုပ်မယ့် space အတွင်းမှာ ကျွန်တော်တို့ ထည့်သွင်းမယ့် element လေးတွေရဲ့ size အလိုက် ပြောင်းလဲ ဖြစ်တည်လာမယ့်အခြေအနေကို ထည့်သွင်းစဉ်းစားပေးရမှာ ဖြစ်ပါတယ်...။

Sence of Direction
ဒီ ပုံလေးမှာ အစက်ကလေးတွေက ဘာကို ပြဆိုပါသလဲ.... သူရဲ့ size ဆိုတဲ့ အရွယ်အစားအထက် သူတို့တွေရဲ့ စုဖွဲ့မှုဟာ direction ဆိုတဲ့ လမ်းကြောင်း တစ်ခုကို ဦးတည်နေကြောင်း တွေ့ရှိနိုင်မှာ ဖြစ်ပါတယ်။

"Line ဆိုတဲ့ မျဉ်းကလေးတွေ ဘယ်လိုများ လုပ်ဆောင်ပေးပါသလဲ....."
ဒီနေရာမှာ ကျွန်တော့်အနေနဲ့ ကျွန်တော်တို့ရဲ့ အစ်ကိုကြီး ကိုသန့်ဇင် ရဲ့ "စကားပြောသော မျဉ်းကြောင်းကလေးများ" ကိုပဲ ရည်ညွန်းချင်ပါတော့တယ်...ကျွန်တော်တို့အနေနဲ့ မျဉ်းကြောင်းကလေးများက ပြောတဲ့စကားကို နားလည်ဖို့ကြိုးစားသင့်သလို မျဉ်းကြောင်းကလေးများကပေးတဲ့ design concept ကိုလည်း လေ့လာကြည့်ရအောင်နော်....

Vertical Line
မျဉ်းမတ် လေးတွေနဲ့ ဖွဲ့စည်းထားတဲ့ ဝန်းကျင်တစ်ခုထဲ ရောက်ရှိသွားရင် ကျွန်တော်တို့ရဲ့ ရင်မှာ ဘယ်လို ခံစားမိမှာလဲဆိုတာကို တွေးကြည့်ပါလားနော်... သေချာတာကတော့ Space တစ်ခုအတွင်းမှာ တည်ရှိနေမယ့် မျဉ်းမတ်ပုံ element လေးတွေက ကြည့်သူရင်မှာ strong & stable ဆိုတဲ့ ခိုင်မြဲမှုနဲ့ ကြံ့ခိုင်မှုကို ခံစားစေမှာပါ..။

Horizontal Line
မျဉ်းဖြောင့်လေးတွေနဲ့ ဖွဲ့စည်းထားတဲ့ ပတ်ဝန်းကျင်ဆိုရင်ကော??? အဝေးကို ကြည့်လိုက်တိုင်း မိမိနဲ့ ပြင်ညီပုံ လှိုင်းတွေနဲ့ ပြေးလွှားနေနိုင်တဲ့ မျဉ်းလေးတွေက ကျွန်တော်တို့ကို Peaceful ဆိုတဲ့ ငြိမ်းချမ်းတည်ငြိမ်မှုနဲ့ Lifeless ဆိုတဲ့ အဆုံးမဲ့မှုကို ခံစားဖို့ ပေးနေပါလိမ့်မယ်...။

Inclined Line
မျဉ်းစောင်းလေးတွေနဲ့ ဖွဲ့စည်းထားတဲ့ space တစ်ခုထဲရောက်သွားရင်တော့ ကျွန်တော်တို့ အနေနဲ့ ထိုမျဉ်းလေးတွေရဲ့ ခိုင်မြဲနိုင်မှာလားဆိုတဲ့ မရေရာ မသေချာမှု၊ မတည်ငြိမ်သယောင် ထင်ရတဲ့ မျဉ်းစောင်းလေးတွေရဲ့ ရွှေ့လျားတော့မယ့်ဟန်ပန်ကို ခံစားနိုင်ပါသတဲ့..။ Movement, Action & Distrubing ဆိုတဲ့ effect တွေပေါ့နော်...။

Curve Line
မျဉ်းကွေးလေးတွေနဲ့ ဖြစ်တည်နေမယ့် space ထဲမှာ ဝင်ရောက်ခံစားကြည့်ရင်တော့ ကျွန်တော်တို့အနေနဲ့ မျဉ်းကွေးလေးတွေရဲ့ ကကြိုးမှာ မျှောပါရင်း တငြိမ့်ငြိမ့် စီးဆင်းနိုင်သလို တစ်ဖက်မှာ ဆန့်ကျင်ဖက်အနေနဲ့ အာရုံတွေ ထွေပြား မှောက်မှားနိုင်မှုတွေလည်း ခံစားနိုင်ပါတယ်..။ အဆုံးရှိသလား အဆုံးမဲ့လား... ဝေခွဲလို့လည်း ရမှာ မဟုတ်ပါဖူး။ ဘာပဲဖြစ်ဖြစ် ဒီ မျဉ်းကွေးလေးတွေက ခံစားသူရင်မှာ rythum တော့ မိနေဖို့ လိုပါလိမ့်မယ်နော်...။

Sence of Distance
မျဉ်းလေးတွေကပေးတဲ့ အဓိပ္ပါယ်မှာ သူတို့ရဲ့ အကွာအဝေး အနေအထားကလည်း တစ်မူထူးခြားအောင် ဆွဲဆောင်နေပါတယ်...။ မျဉ်းလေးတွေဟာ ဘယ်ပုံ ဘယ်လိုပဲဖြစ်တည်ပါစေ... distance လေး တစ်ခု ကွာခြားမှုမှာ သူတို့ရဲ့ အဓိပ္ပါယ် တွေ ပြောင်းလဲသွားနိုင်သလို view တစ်ခု ကွာခြားမှုမှာလည်း ခံစားမှုတွေကို ပြောင်းလဲစေနိုင်မှာပါ။

မျဉ်းလေးတွေက စကားပြောတတ်သလို တေးသွားတစ်ပုဒ် ကိုလည်း သီကျူးနေပါတယ်.. ဒီ မျဉ်းလေးတွေကို ဘယ်လို ဘယ်ပုံ အသုံးချပြီး ဖွဲ့တည်မှာလဲဆိုတာကတော့ designer တွေရဲ့စိတ်ကူးမှာပဲ မူတည်နေမှာ ဖြစ်ပါတယ်..။

JohnMoeEain

Creative Space

http://www.johnmoeeain.blogspot.com/

ကကြီး ခခွေး(သို့)ဗိသုကာ အခြေခံနည်းစနစ်-2

2009-12-05T01:06:00.003+08:00

Level 1/ Activity 2

အစီအစဉ်ပြုလုပ်ခြင်း( Order )

အရာဝတ္ထုတွေကို ပုံဏ္ဍာန်အားဖြင့်ဖြစ်စေ၊ အရွယ်အစားအားဖြင့်ဖြစ်စေ၊ အရောင်အားဖြင့် ဖြစ်စေ အစုအဖွဲ ့ တစ်စုတစ်စည်းတည်းအဖြစ် မျဉ်းတစ်ဖြောင့်တည်းအဖြစ်လည်းကောင်း (သို့) စက်ဝိုင်းကဲ့သို့လည်းကောင်း အစီအစဉ်တကျ ထားရှိခြင်းကို (Order) အစီအစဉ်ကျခြင်းလို့ခေါ်ပါတယ်။
1,2,3,4,5,.... အစရှိတဲ့ နံပါတ်တွေကို အစဉ်လိုက် ရေတွက်ခြင်းကို ကျနော်တို့ အစီအစဉ်ကျတယ်၊ Order ဖြစ်တယ်လို့ပြောနိုင်ပါတယ်။ 1,2,5,3 စသဖြင့် ပြောင်းလဲ ရေတွက်ပါက အစီအစဉ်မကျတော့ပါဘူး။

ပုံကိုလေ့လာကြည့်လိုက်ပါ။ ဘယ်ပုံဟာ နောက်ဖြစ်လိုနိုင်မယ့် အစီအစဉ်ဖြစ်ပါသလဲ...။

ဒီပုံလေးနှင့် အထက်ပါ ရှင်းလင်းချက်ကနေ (Order) အစီအစဉ်ဆိုတာကို သိနိုင်မယ်လို့ ထင်ပါတယ်။ ဗိသုကာအမြင်မှာ Order အစီ အစဉ် လှပခြင်းဟာ မရှိမဖြစ်အရေးပါ လိုအပ်လှပါတယ်။
ကျနော်တို့ တစ်ယောက်တည်း Order စနစ်ကျအောင်လေ့ကျင့်ချင်တယ်ဆိုရင် ကိုယ်ထိုင်နေတဲ့ စားပွဲပေါ်မှာ ရှိတဲ့ ပစ္စည်းလေးတွေကို စိတ်ကူးအမျိုးမျိုးနှင့် အစီအစဉ်တကျ Order ဖြစ်အောင် ပြုလုပ်လေ့ကျင့်ပေးခြင်းပါပဲ။ အဖန်ဖန်ပြုလုပ်ခြင်းဖြင့် ဆန်းသစ်လှပတဲ့ Order အစီအစဉ်တွေကို အတွေးအမြင် အိုင်ဒီယာတွေ ဖန်တီးတီထွင်လာနိုင်မှာပါ။ ဥပမာပြုလုပ်သင့်တာတွေက မျဉ်းတစ်ဖြောင့်တည်း ထားရှိခြင်း၊ စက်ဝိုင်းကဲ့သို့ ပြုလုပ်ဝိုင်းပတ်ထားရှိခြင်း အစရှိသဖြင့် လေ့ကျင့်ပေးနိုင်ပါတယ်။ နောက် အရွယ် အစားကိုလိုက်ပြီးလည်းကောင်း၊ အရောင်အသွေးကိုလိုက်ပြီးလည်း ကောင်း၊ အစုအဖွဲ့ပြုလုပ်ပေးကာ အစီအစဉ်တွေ အမျိုးမျိုးလုပ်နိုင်ပါတယ်။
အဲဒီနောက်မှ ပိုမိုကျယ်ပြန့်တဲ့ မိမိအိပ်ခန်းအတွင်းမှာရှိတဲ့ ပစ္စည်းတွေ (ဥပမာ စာအုပ်တွေ၊ စောင်၊ အိပ်ယာ၊ ကုတင်၊ စာကြည့်စားပွဲ၊ စာအုပ်စင်၊ စာရွက်စာတမ်းများ၊ အဆုံး အဝတ်အစားများ တင်ထားခြင်းအထိ) အစီအစဉ်ကျနမှုရှိမရှိ၊ လေ့လာလေ့ကျင့်သင့်ပါတယ်။ အဲလိုသာ စဉ်းစားလေ့ကျင့်မယ်ဆိုရင်ဖြင့် order အစီအစဉ်တကျပြုလုပ်တတ်ခြင်းကို ပိုင်နိုင်ကျွမ်းကျင်နိုင်ပါလိမ့်မယ်။
အစီအစဉ်ချခြင်းမှာ ကျားကွက်ပုံစံကဲ့သို့ အလွန်ပဲ အစီအစဉ်ကျနေခြင်းကို monotonous ဟုခေါ်နိုင်ပါတယ်။ အဲဒီလိုအစီအစဉ်ကတော့ ထပ်တူညီနေသဖြင့် ငြီးငွေ့ဖွယ်ခံစားရတတ်ပါတယ်။
ကျနော်တို့တွေစီးနေတဲ့ ရှုးဖိနပ်များကိုလေ့လာကြည့်မယ်ဆိုရင် သူ့မှာလည်း အစီအစဉ်တကျဖြစ်နေတာတွေ မြင်နိုင်ပါတယ်။ ဖိနပ်ကြိုးနှင့် ဖိနပ်ကြိုးတပ်တဲ့ အပေါက်တွေဟာ ဘယ်ဘက်နှင့်ညာဘက် အတိအကျ အစီအစဉ်တကျဖြစ်နေပါတယ်။ အကယ်လို့ အဲလို ဖိနပ်ကြိုးပေါက်ကလေးတွေ အညီအညာ အစီအစဉ်တကျမရှိရင် ဖိနပ်ကြိုးတပ်ရာမှာ တွန့်လိပ်ကာ မညီမညာ မလှမပဖြစ်နေမှာပါ။
အခြား ကျနော်တို့ပတ်ဝန်းကျင်မှာရှိတဲ့ အစီအစဉ်ကျသည့်ပစ္စည်းတွေကိုလည်း များစွာလေ့လာပေးသင့်ပါတယ်။ ဥပမာအားဖြင့် ကြယ်သီးပေါက်နှင့်ကြယ်သီးများ၊ စက်ဘီး၏ စပုတ်တံများနှင့် ဘီး၌ရှိသော အပေါက်ကလေးမှား စသည်ဖြင့် လေ့လာနိုင်သည်။
ဗိသုကာများ အဆောင်အအုံ Plan ပုံဆွဲသားရာတွင် Order ခေါ်အစီအစဉ်ကျနမှုကို ထည့်သွင်းစဉ်းစားပေးရမည်။
အထက်ပါ လှေကားထစ်ပုံကို လေ့လာကြည့်လျှင် အစီအစဉ် ကျ မကျကို တွေ့နိုင်ပါသည်။ လှေကား တဘက်နှင့် တဘက်ကွာခြားချက်ကို လေ့လာနိုင်ပါသည်။ လှေကားတစ်စင်း အကျော်အနင်း မညီညာပါက အတတ်အဆင်းပြုလုပ်သောသူများ လှေကားပေါ်မှာ လိမ့်ကျနိုင်ပါတယ်။ ဒါကြောင့် လှေကားဒီဇိုင်းပြုလုပ်ရာမှာ အကျော်အနင်း ပုံသေဖြစ်စေရန်စီမံပေးရပါတယ်။ လှေကားကဲ့သို့ပင် တချို့သော အရာများကို အစီအစဉ်ပြုလုပ်ကြရပါတယ်။

The stap pyramids in Mexico,

The earliest stap pyramids in Egypt

အစီအစဉ်ကျခြင်းသည် ကျနော်တို့ ပတ်ဝန်းကျင်၌ များစွာလေ့လာနိုင်ပေသည်။ အမြင် သာမက၊ အကြားအာရုံတွင်လည်း ဂီတသံစဉ်ကဲ့သို့ အစီအစဉ်ကျနမှုများကို်လေ့လာနိုင်သည်။ စမ်းရေစီးသံများ၊ အင်ဂျင်စက်လည်ပတ်သံများ၊ စသည်တို့ အပြင် ကျနော်တို့ရဲ့ အသက်ရှုသံ သည်ပင် အစီအစဉ်ကျနခြင်း၌ ပါဝင်ပါသည်။
ယခု အခန်းတွင် အစီအစဉ် အကြောင်းကို သဘောပေါက်မည်ဟု ယူဆမိပါသည်။

MMO

Creative Space

ကကြီး ခခွေး(သို့)ဗိသုကာ အခြေခံနည်းစနစ်

2009-12-05T00:55:00.003+08:00

ကျနော်ငယ်ငယ်က ဗိသုကာဆိုတဲ့ စကားလုံးကို အတော်လေး နှစ်သက်သဘောကျခဲ့ပါတယ်။ ဘာမှန်းသေချာမသိပဲ သဘောကျခဲ့တာပါ။ သို့သော်လည်း အကြောင်းမလှတော့ ဗိသုကာဘွဲ့ ကိုတတ်ခွင့်မရခဲ့ပါ။ ကျနော် စိတ်ဝင်စားမှုတွေ ပျောက်သွားတယ် ထင်ခဲ့ပေမဲ့ လုပ်ငန်းခွင်ထဲမှာ အသိတွေရဲ့ ဗိသုကာအမြင်အတွေးတွေက ကျနော့ကိုအားကျ လာစေပါတယ်။ အဲဒီတော့ သူငယ်ချင်းတွေနဲ့ စာအုပ်ဆိုင်တွေ သွားဖြစ်ရင် ဗိသုကာစာအုပ်တွေကို ဝယ်ဖြစ်တတ်တယ်။ နောက်ပိုင်း မဖတ်ဖြစ်တာတောင် အဲဒီစာအုပ်လေးတွေ ကြည့်ပြီး တစ်နေ့နေ့တော့ ဖတ်မှတ်လေ့လာဖြစ်မယ် ဆိုတဲ့ စိတ်ကူးလေးတော့ ရင်ထဲမှာ ကိန်းအောင်းထားပါတယ်။ ကျနော်ခုနောက်ပိုင်း ဖတ်ဖြစ်တော့ ပိုစိတ်ဝင်စားဖို့ကောင်းလာလို့ ပိုလေ့လာဖြစ်ပါတော့တယ်။ ကျနော့အနေဖြင့် စနစ်တကျ သင်ကြားခွင့်ရတာ မဟုတ်တော့ ခုလိုရေးသားရင်း ကိုယ်တိုင်လည်း ပြန်လည်လေ့လာနေခြင်းပါ။ အကယ်၍အမှား အယွင်းပါရှိခဲ့ရင် ပြုပြင်ဆွေးနွေး အကြံပေးကြပါခင်ဗျာ။
အခု ဒီခေါင်းစဉ်လေးအောက်မှာ Architectural is Elementary ဆိုတဲ့စာအုပ်ထဲက ဗိသုကာဆိုင်ရာ အခြေခံ အယူအဆလေးတွေ စိတ်ဝင်စားသူတွေ လေ့လာနိုင်အောင် ဖော်ပြချင်ပါတယ်ခင်ဗျာ။ စာအုပ်ကို Nathan B.Winters ရေးထားပါတယ်။ ဒီစာအုပ်မှာ ဗိသုကာ အတွေး အမြင်ဆိုင်ရာ အခြေခံအချက်တွေကို Level (7) အထိထားပြီး လေ့ကျင့်ခန်း ၅၁ ခုနှင့် ရှင်းလင်းထားပါတယ်။
ကျနော်တတ်နိုင်သမျှ တစ်ခန်းခြင်း ဖော်ပြပေးပါမယ်ခင်ဗျာ။
Level 1/ Activity 1

တူညီခြင်းနှင့် ကွဲပြားခြင်း(သို့) ခြားနားခြင်း (alike or different)
ကျနော်တို့တွေ အရာဝတ္ထုတွေကို တွေ့မြင်ရတဲ့ အခါတူညီတဲ့ အသွင်သဏ္ဍာန်ရှိတယ်လို့ ခံစားရတဲ့ အခါ အတော်တူတာပဲ၊ ချွတ်စွတ်ပဲ ၊ တစ်ပုံစံထဲပဲ ဆိုတဲ့ စကားပြောတတ်ကြပါတယ်။ တချို့ အရာဝတ္ထုတွေမှာတော့ လုံး၀မတူညီတာတွေ မြင်ရတဲ့အခါ ကွဲပြားတယ်၊ ခြားနားတယ် မတူဘူးဆိုတာ ပြောဆိုတတ်ကြပါတယ်။

ပုံမှာပြထားတဲ့ စက်ဝိုင်း၃ခုမှာပုံသဏ္ဍာန်တူညီပြီး အရွယ်အစား ကွဲပြားနေတာကို တွေ့နိုင်ပါတယ်။ ကျနော်တို့ ပတ်ဝန်းကျင်မှာ အဲဒီစက်ဝိုင်းလို့ ပုံစံတူ အရွယ်အစားမတူတဲ့ အရာဝတ္ထုတွေ အများကြီးတွေ့နိုင်ပါတယ်။ ကတ်ကြေးတွေ၊ စာအုပ်တွေ၊ ဘောလုံးတွေ စတဲ့ အရာဝတ္ထုတွေ နှင့် သူတို့ သဏ္ဍာန်တူတာတွေ ကွဲပြားတာတွေ ကိုလေ့လာကြည့်ရင် ကွဲပြားစွာတွေ့နိုင်ပါတယ်။ ကျနော်တို့ပတ်ဝန်းကျင် အဆောက် အဦးတွေမှာရော ဘယ်အရာတွေ တူညီသလဲ ဘယ်အရာတွေကွဲပြားသလဲ လေ့လာကြည့်ရှု့ ပြီး သိမြင်နိုင်ပါတယ်။ ကျနော်တို့ လူတွေရဲ့ ပုံသဏ္ဍာန်တွေမှာ တစ်ယောက်နှင့်တစ်ယောက် တူညီချက်တွေ၊ ကွဲပြားချက်တွေ ရှိနိုင်ပါတယ်။ ဥပမာဆိုရရင် ပန်းသီးတစ်လုံးနှင့် သစ်တော်သီးတစ်လုံးမှာ အသွင်သဏ္ဍာန်တူသလား....။ ဘယ်နေရာတွေ ကွာခြားသလဲ....။ ဘာတွေ ကွာခြားသလဲ...။ စတဲ့ အချက်တွေနှင့် လေ့လာသင့်ပါတယ်။
England_London_St_Pauls_Cathedral

ှSt-peters-basilica

ပုံနှစ်ပုံဟာ လန်ဒန်နှင့် ရောမမှာရှိတဲ့ ဘုရားကျောင်းနှစ်ခုရဲ့ပုံတွေပါ။ ၎င်းတို့နှစ်ခုတူညီကြပါသလား။ ဘယ်နေရာတွေ ကွာခြားပါသလဲ။ ယူနိုက်တတ်စတေ့မှာ ရှိတဲ့ များလှတဲ့ အဆောက်အုံ တွေဟာ ဒီထင်ရှားတဲ့ အဆောက်အုံ(၂)ခုနောက်ပို်င်းမှ တည်ဆောက်ခဲ့ပါတယ်။
ဒီအခန်းမှာ တူညီခြင်းနှင့်ကွဲပြားတဲ့ အချက်တွေကို ဂရုတစို်က်လေ့လာ တတ်စေဖို့ပါခင်ဗျား။

MMO

Creative Space

စကားပြောသော မျဉ်းကြောင်းလေးများ

2009-12-03T22:41:00.003+08:00

စကားပြောသော မျဉ်းကြောင်းလေးများ

ကျွန်တော့ဆရာတယောက်ကစကားတခွန်းပြောဖူးပါတယ် "သန့်ဇင် ကိုယ်ဆွဲလိုက်တဲ့ မျဉ်းတကြောင်းဟာ တည်ဆောက်တဲ့နေရာမှာ ခက်ခဲနိုင်သလို အဲဒီမျဉ်းတကြောင်းခြင်းစီမှာ အဓိပ္ပါယ်တမျိုးစီရှိတယ်။ အဲဒီမျဉ်းတကြောင်း စီမှာရှိတဲ့ နေရာအသီးသီးဟာ လူ့ရဲ့ ခံစားမှုအာရုံကြောင့် သရုပ်လက္ခဏာ တနည်းအားဖြင့် ခံစားမှု ဖြစ်ပေါ်လာတယ်" တဲ့။ ကျွန်တော်တို့ မျဉ်းတကြောင်းစီရဲ့ အဓိပ္ပါယ််တခုချင်းကို မစဉ်းစားခင် မျဉ်းဆိုတာကို အရင်စဉ်းစားကြည့်ရအောင်လားဗျာ။

မျဉ်းဆိုတာက ဟင်းလင်းပြင်မှာရှိတဲ့ အမှတ်နှစ်ခုကို ဆက်သွယ်ထားတဲ့ လမ်းကြောင်းတခုပါပဲ။ အဲဒီမျဉ်းတွေဟာ အကြမ်းအားဖြင့် တည်နေပုံ လေးမျိုးရှိကြတယ်။

၁/ အလျားလိုက်တည်နေခြင်း (Horizontal Direction)
၂/ ဒေါင်လိုက်တည်နေခြင်း (Vertical Direction)
၃/ ဝဲဖက်သို့ ယိုင်၍ တည်နေခြင်း (Left Oblique) နဲ့
၄/ယာဖက်သို့ ယိုင်၍ တည်နေခြင်း (Right Oblique) တို့ပဲ ဖြစ်ပါတယ်။

အဲဒီလေးမျိုးမှာမှ အခြေခံအားဖြင့် မျဉ်းနှစ်မျိုး ထပ်ပြီးခွဲနိုင်တယ်။
၁/ မျဉ်းဖြောင့် (Straight Line) နဲ့
၂/ မျဉ်းကောက် (Curve Line) တို့ပဲ ဖြစ်ပါတယ်။

မျဉ်းကြောင်းတွေဟာ အလွန်ရှင်းလင်းတိကျတဲ့ အကျိုးသက်ရောက်မှုတွေရှိကြတယ်။ တိကျတဲ့ အဓိပ္ပါယ်် တနည်းအားဖြင့် ထင်မြင်ချက်မပါပဲ အဲဒီမျဉ်းတကြောင်းကို စာရွက်ပေါ်မှာ ရေးဆွဲလို့ မရပါဘူး။
ကဲ ဒါဆို အဲဒီမျဉ်းတကြောင်းစီရဲ့ အဓိပ္ပါယ်တွေကို လေ့လာကြည့် ကြရအောင်နော်။

မျဉ်းဖြောင့် (Straight Line)

လျင်မြန် သွက်လက် အားရှိ ခိုင်မာတတ်တဲ့ သဘောကိ ုဆောင်ပါတယ်တဲ့။

မျဉ်းမတ် (Vertical Line)

ဖြောင့်မတ် တည်ကြည်ခန့်ငြား ထည်ဝါခြင်း မြင့်မြတ်ခြင်း သက်ဝင်တည်ငြိမ်တဲ့သဘောတို့ ကို ဆောင်ပါတယ်တဲ့။

မျဉ်းစောင်း (ယိုင်) (Oblique Line)

လှုပ်ရှားဆွဲငင် တွန်းကန်ပေါက်ကွဲတတ်တဲ့သဘော ကျဆင်းလှုပ်ရှားခြင်း ခုန်ပြန်လှုပ်ရှားခြင်း ခုန်ခြင်းသဘော တို့ ကို ဆောင်ပါတယ်တဲ့။

မျဉ်းကောက် (Curve Line)

ငြိမ့်ညောင်းသာယာ ပျင်းရိ ငြီးငွေ့ လေးကန်နှေးကွေး ထိုင်းမှိုင်းတတ်တဲ့သဘော ပြင်းထန်တဲ့ လှုပ်ရှားမှုကို ဖော်ကျူးတဲ့ လေတိုက်ခံရတဲ့ သစ်ပင် တိမ်များ ကမ်းခြေကိုတိုက်ခတ်လာတဲ့ လှိုင်းများလို ပြင်းထန်လာမှု သဘောတို့ကို ဆောင်ပါတယ်တဲ့။

မျဉ်းခုံး (Concave Line)

အမြင့်သဘောဆောင် ငြိမ်သက်ငြိမ့်ညောင်းတဲ့သဘော တို့ ကို ဆောင်ပါတယ်တဲ့။

မျဉ်းခွက် (Convex Line)

အနက်သဘောဆောင် လှုပ်ရှားသွက်လက်မှုသဘောရှိ မှုတို့ ကို ဆောင်ပါတယ်တဲ့။
အဲဒီ မျဉ်းခုံးနဲ့ မျဉ်းခွက် နှစ်ခုကိုပေါင်းစပ်လိုက်မယ်ဆိုရင် တည်ငြိမ်ခန့်ငြား ဂုဏ််သရေရှိ စွမ်းအားပါပြီး အလှအပဖွဲ့ ပန်းချီဆန်သော (Hogarth's line of beauty) မျဉ်းကို ရရှိပါတယ်တဲ့။

စက်ဝိုင်း (Circle)

ဆုံးစမရှိ လည်ပတ်သောသဘော ကြီးမား ကျယ်ဝန်း ညီမျှချင်းသဘော တို့ ကို ဆောင်ပါတယ်တဲ့။

ပတ်ရစ်၍တက်သောမျဉ်း (Spiral)

ဆုံးစမရှိ ကွေ့ဝှိုက်၍တက်သွားသည်။

ဖြာထွက်သောမျဉ်း (Radiation Line)

သွက်လက်လှုပ်ရှားပြောင်းလဲမှု စုစည်းခြင်းသဘောဆောင် စမ်းရေပန်း(Fountain) ကြီးထွားပေါက်ရောက်မှု(Grow) နေရောင်ခြည် (Sunlight) ဘီးထောက်တံများ (Spokes of a wheel) အာရုံစူးစိုက်မှု (Concentration of a given spot)

မျဉ်းပြိုင် (Parallel Line)

မျဉ်းပြိုင်များဟာ တကြောင်းနဲ့တကြောင်းမဖြတ် ဖြတ်စရာနေရာမရှိ။

မြှားချွန်သဏ္ဍာန်ပါသောမျဉ်း (Pointed Arrow Line)

၎င်းမျဉ်းသည် အမြန်ဆုံးနှင့် အမြန်ဆုံးသဘာဝကိုပြဆိုသည်။

ထောင့်ဖြတ်မျဉ်းကျိုး(Broken Diagonal)

လျင်မြန်စွာလုပ်ဆောင်မှုသဘောဆောင် ထောင့်ဖြတ်မျဉ်းတစ်ကြောင်းကို အခြားမျဉ်းတစ်ကြောင်းကဖြတ်သွားပြီး ထောင့်ဖြတ်မျဉ်းကျိုး ဖြစ်ပေါ်သည်။ လျှပ်စီးလက်ကြောင်း LIGHTING

စုစည်းစုဆုံသောမျဉ်း(Converging line)

၎င်းမျဉ်းများသည် စက္ခုအာရုံ အဆုံးတိုင်ရောက်အောင်(ခရီးလမ်းဆုံး) သယ်ဆောင်သွားနိုင်သည်။ ထိုးထွက်လာသောမျဉ်းများသည်အဆုံးအထိ တွန်းပို ့ကာလက်စတုံးရက်စဲသည်။

ဆန် ့ကျင်ဘက်မျဉ်းများ (opposite line)

၎င်းမျဉ်းများသည်တည်မြဲမှုရှိသည်။

ခုန်သောမျဉ်းများ (Jump Line)

၎င်းမျဉ်းများသည် အသိအာရုံရှုပ်ထွေးကာ လှုပ်ရှားပြောင်းလဲမှု ဖြစ်ပေါ်စေသည်။

ဒါတင်မကသေးပါဘူး။ မျဉ်းတွေမှာ ဝိသေသလက္ခဏာ (The Meaning Of Line) (၇) ရပ် ရှိပါသေးတယ်။

၁/ မျဉ်းကြောင်းတို့သည် ၎င်းတို၏ သဘောသဘာဝ အနက်အဓိပ္ပါယ် တို့ကိုဖော်ဆောင်သည်။

၂/ ဧရိယာ အကျယ်အဝန်း ကွက်လပ် အရွယ်အစားတိုကို ပိုင်းခြား သတ်မှတ်သည်။

3/ မိမိဖော်ပြလိုသော စိတ်ကူး အကြံအစည်နှင့် အကြောင်းအရာအချက်အလက်များကို အမှတ်သကေတများဖြင့် ပုံဖော်နိုင်သည်။

၄/ သတ်မှတ်ထားသော အစွန်းအနားမျဉ်းကြောင်းများဖြင့် ပုံသဒန်များ ထုထည်များကို သတ်မှတ်ပုံဖော်နိုင်သည်။

၅/ မိမိဖော်ပြလိုသောနေရာသို စိတ်အာရုံစူးရောက်စေရန် မျဉ်းကြောင်းများဖြင့် ဖော်ဆောင်နိုင်စွမ်းရှိသည်။

၆/ ဒီဇိုင်းပုံစံလှပမှုများကို မျဉ်းကြောင်းများဖြင့်စီစဉ်ချမှတ်၍ အလှဆင်ဖန်တီးတီထွင်နိုင်သည်။

၇/ အသွေးနုရင့်အဆင့်ဆင့် (Tone) ကို မျဉ်းကြောင်းများဖြင့် ဖော်ပြဆောင်ရွက်နိုင်သည်။

အခုလောက်ဆို မျဉ်း -----အကွေ့ အဝိုက် အဖြောင့် အကောက် အယိုင် အနွဲ့ အဝန်းအဝှိုက် သူ့ သဏ္ဍန် သူ့ဟန်အသီးသီးရဲ့ညွှန်းဆိုဖော်ပြမှု အတွင်းသဘောကို အတော်အသင့် တော့လေးကျက်မိကြလောက်ပါပြီ...
ကိုယ်တိုင်ဟာ..ဘယ်မျဉ်းလို အဓိပါယ်နဲ့ ဘယ်လိုလျှို့ဝှက်နေသလဲ ဆန်းစစ်ကြည့်ပြန်တော့ စိတ်ဝင်စားစရာကောင်းလွန်းနေပါတယ်..
သင်ရော.......
ဘယ်လို မျဉ်းတစ်ကြောင်းလဲ....... ? ? ?
ကျွန်တော်ရော...................... ? ? ?
ဘယ်လိုမျဉ်းများလဲ................. ? ? ?
ဘာပဲပြောပြော...ဘယ်လိုမျဉ်းပဲဖြစ်ဖြစ် ဥိးတည်ရာကတော့ဖြင့် ရှိနေခဲ့ကြပါတယ်လေ...။

လေ့လာမိသလောက် ပြန်လည်ဝေမျှတာပါ။ အသေးစိတ် လေ့လာမယ်ဆိုရင် အောက်က Links များမှာသွားရောက်လေ့လာနိုင်ပါတယ်။

References :1: Wikipedia
2: အခြေခံပန်းချီပညာ (ဦးကျော်သူရိန်)
ပန်းချီပန်းပုကျောင်း၊ရန်ကုန်
3: ပန်းချီးရေးရာနှင့်ပုံဆွဲအခြေခံများ
(အောင်မြတ်ဌေး)
4: http://ardictionary.com/Line/3381
5: http://desktoppub.about.com/cs/designelements/a/linesintro.htm
6: http://www.linearchitecture.com/blog
7: http://raggedclothcafe.com/2008/02/21/hogarths-line-of-beauty/

ရွက်လွှင့်သူများ

2009-11-07T23:50:00.003+08:00

ကျနော် ငယ်ငယ်က ဇော်ဝင်းထွဋ်ဆိုထားတဲ့ “ရွက်လွှင့်ခြင်း” ဆိုတဲ့ သီချင်းကို အရမ်းသဘောကျခဲ့ပါတယ်။
ဘာကြောင့်မှန်းတော့ သေချာမသိပါ။ ရွက်လွှင့်ခြင်းဆိုတဲ့ စကားကို စွဲစွဲမြဲမြဲနှစ်သက်နေခဲတာတော့ အမှန်ပါ။

ဘာအကြောင်းကြောင့် ဖြစ်ဖြစ်ကျနော်ခုအချိန်မှာ ရွက်လွှင့်နေခဲ့ပါတယ်။ ဘယ်အချိန်ဘယ်သောင်ကပ်မည် မသိပေမဲ့ အမိမြေကမ်းခြေကို အမြဲလွမ်းတတ်တဲ့ စိတ်ကတော့ အစဉ်လို ကိန်းအောင်းနေခဲ့ပါတယ်။

အခုဆို ကျနော့်လိုရွက်လွှင့်နေကြတဲ့ ညီအကိုမောင်နှမတွေပေါင်းဆုံထားတဲ့ ဒီဖန်းတီးမှုရပ်ဝန်းလေးမှာ ပူးပေါင်းတွေ့ဆုံခွင့်ရ နေပါတယ်။ အားလုံးရဲ့ စိတ်တွေမှာ အသိဖလှယ်ချင်တာတွေနဲ့ တတ်ကြွနေတာတွေ့တော့ ကျနော့ရဲ့ လျော့ရိလျော့ရဲ စိတ်ကလေးတွေ ပြန်တင်းလာမိသလိုပါ။

အကုန်လုံးမှာ အသိတွေများစွာနဲ့ ဝင်းလက်နေတဲ့ မျက်ဝန်းတွေ ပိုင်ဆိုင်ထားကြတယ်လေ။ ကျနော့ရဲ့ မှုန်းဝါးဝါး မျက်ဝန်းတွေတောင် သူတို့တွေရဲ့ ရောင်ပြန်ကြောင့် ကြည်လင်လာသလို ခံစားရပါတယ်။
ကျနော့ အသိတွေ ပွင့်လန်းလာမယ်ဆိုတာကိုလည်း တဖြည်းဖြည်း ပိုမိုယုံကြည်လာမိတယ်။

“မိမိကိုယ်ကိုသာ ကိုးကွယ်အားထားရာ” ဆိုပေမဲ့ “ မိတ်ဆွေကောင်း ပတ်ဝန်းကျင်ကောင်းဆိုတာ မရှိမဖြစ်လိုအပ်တယ်” ဆိုတာကို လက်တွေ့သိခွင့်ရသလိုပါ။

ဆရာ ဦးအောင်သင်း ဟောပြောပွဲတစ်ခုမှာ ပြောဖူးတဲ့ စကားလေးတစ်ခွန်းအမှတ်ရမိပါတယ်။

“မင်းတို့တွေ လူတစ်ယောက်ဆိုးတယ်ကောင်းတယ်ဆိုတာ သူ့ရဲ့ ဗီဇမပါရင် ပြင်ဖို့ခက်တယ်ကွ။ ကလေးတစ်ယောက် နဂိုကောင်းနေတာကနေ အပေါင်းအသင်းတွေ ကြောင့်ပျက်သွားတယ်” လို့ ပြောတတ်ကြတယ်။ အဲဒီစကားတော့ လက်မခံချင်ဘူး။ မြန်မာစကားမှာ “ချိုကုတ်ရှိရာ၊ ချိုထောင်မလာ” ဆိုတဲ့ စကားရှိတယ်။ အဲဒါနဲ့တွက်ရင် အဲဒီကလေးလည်း နဂိုကတည်းက ချိုလေးနည်းနည်းတော့ ကုတ်နေလို့ကွ” တဲ့။”

အခုကျနော် လည်း ချိုကုတ်တွေနဲ့ပေါင်းမိသလား ချိုထောင်တွေနဲ့ပေါင်းမိသလား တော့မသိဘူး။ အကယ်၍ အကုတ်တွေပဲဆိုရင် ကျနော်လည်းနည်းနည်းကုတ်နေလို့ပေါ့။ အဲ ချိုထောင်တွေချည့်ပဲ ဆိုရင်တော့ ကျနော်ကိုယ်တိုင်ချိုထောင်လေး ဖြစ်နေသလားမသိပါဘူး။

အသို့ဆိုစေ ကျနော်ခုအချိန်မှာ ဖန်တီးမှုရပ်ဝန်းလေးမှာ မန်ဘာတစ်ယောက်အဖြစ် တနည်း ရွက်လွင့်သူများ ပူးပေါင်းဖြစ်တဲ့ အထဲမှာ ရောယောင်ပါဝင်နေပါပြီ။

သူများယောင်လို့ ယောင်အမောင်တောင်မှန်းမြောက်မှန်းမသိပေမဲ့လည်း ကျနော်ကိုင်မိတဲ့ ရွက်ကြိုးလေးတစ်စကိုတော့ မြဲမြဲကိုင်ထားဖို့ ကြိုးစားနေပါ့မယ်ခင်ဗျာ။

MMO
Creative Space

အခြေခံကောင်းမှ သည် အနာဂါတ်လမ်းဆီသို့

2009-11-07T19:53:00.003+08:00

'သမုဒ္ဒရာ ၊ ဝမ်းတထွာ' တဲ့ ဆိုရိုးစကား ကြားဖူးကြမှာပါ။ ပညာအရည်အချင်း နိမ့်မြင့် မဟူ လူတန်းစားအလွှာ အသီးသီးက မိမိတို့ စား၊ ဝတ်၊ နေ ရေး အတွက် မိမိတို့ နဲ့ အပ်စပ်သည့် အလုပ်အကိုင်၊ တတ်ကျွမ်း သည့် ပညာရပ်များပေါ် အခြေခံကာ ကျရာအပိုင်းလိုက် ဘဝဇတ်ခုံပေါ် လှုပ်ရှားပါဝင် ကပြနေကြရပါတယ်။ အဲဒီထဲမှာ nml လဲ တယောက် အပါအဝင်ပေါ့။
အထူးသဖြင့် အင်ဂျင်နီယာ အပိုင်း လေးကို တဆိတ်လောက် ဆွေးနွေးချင်ပါတယ်။ ဆရာဝန် တယောက် ဟာသူ့ရဲ့ လူနာကို ရောဂါနဲ့ မအပ်စပ်တဲ့ဆေး မှားပေးမိရင် ထိုလူနာရဲ့ အသက်အန္တရာယ်ကို ထိခိုက်စေမှာ ဖြစ်ပါတယ်။ သို့ကလို ပဲ အင်ဂျင်နှီယာ တစ်ယောက် ဟာ မိမိနဲ့ ပါတ်သက် တဲ့ အလုပ်ပေါ်စိတ်ဝင်တစားနဲ့ စေ့စပ်သေချာစွာ စဉ်းစား လုပ်ကိုင်ရမှာ ဖြစ်ပါတယ်။ ဥပမာ အနေနဲ့ ပြောရရင် မြို့ပြ အင်ဂျင်နီယာတယောက် ကသူ လက်ခံ ထားတဲ့ အဆောက် အဦး ကို soil testing လုပ်ပြီးမှ အောက်ခြေ foundation ကို စတည်ရမှာ ဖြစ်ပါတယ်။ သို့မဟုတ်လျှင် အထပ်မြင့်အဆောက်အဦ တွေ အတွက် စိုးရိမ်ဖွယ်ရာ ဖြစ်ပြီး လူတဦးတယောက် ထက် မက နစ်နာ ဆုံးရှုံး မှု တွေကြုံ ကြ ရမှာ ဖြစ်ပါတယ်။ အရည်အချင်း ပြည့်၀တဲ့ အင်ဂျင်နီယာ ကောင်းတယောက် ဖြစ်ပေါ်လာဖို့ အတွက် မူရင်း အခြေခံ မှ စပြီး မြင်သာအောင် အသိပညာတွေ ၊ အတတ်ပညာတွေ ကို မညည်းမညူနဲ့ သူတို့မှာ ရှိသလောက် ဖြန့် ဝေ သင်ကြားပေးတာ ဘယ်သူတွေ ပါလဲ လို့ မေးချင်ပါတယ်။ 'အစ ကောင်းမှ အနှောင်းသေချာ' တဲ့ ။ ဘယ်နေရာပဲ ဖြစ်ဖြစ် တဆင့်ပြီးတဆင့် လှမ်းတတ်နိုင်ဖို့ ရာ အခြေခံ baseလိုအပ်ပါတယ်။မိမိတို့ ရဲ့ ရည်ရွယ်ထားတဲ့ လမ်းကြောင်းမှန်ကို စနစ်တကျရောက်ရှိရေးအတွက်ဟာ အထောက်အပ့ံ့ ကောင်း လိုအပ်ပါတယ်။ အထောက်အပ့ံ့ကောင်း ဆိုရာမှာလည်း ဥပမာ အားဖြင့် မိမိကို သင်ကြားပြ သ ပေး သူ ကဖြင့် Ph.D,ME,... AGTI ဆိုပြီး Level အနိမ့်အမြင့်လိုက် ခွဲခြား အားငယ်နေစရာမလိုပဲ သင်ယူဆည်းပူးရင်းသာဝါသနာပါရာပညာရပ်ကို ဆင့်ပွားတိုးတက်အောင် ဆက်ပြီးလေ့့လာရမှာ ဖြစ်ပါတယ်။
nml တို့ နိုင်ငံ ကြီးတိုးတက်ဖို့ အတွက် အရည်အချင်း ပြည့်၀တဲ့ အင်ဂျင်နီယာ ပညာရှင်တွေ များစွာ ပေါ်ထွန်းစေ ချင်ပါတယ်။ သူများနိုင်ငံမှာ နည်းပညာ အမျိုးမျိုးနဲ့ စမ်းသပ်တီထွင်နေ ကြ သလို ကိုယ့်နိုင်ငံကို လဲ သူတို့ လိုပဲတိုးတက်စေချင်ပါတယ်။'စည်းလုံးခြင်း သည် အင်အား 'ဆိုတဲ ့စကားလေးအတိုင်း မည်သည့် အင်ဂျင်နီယာ အသိပညာရှင်၊ အတတ် ပညာရှင်မဆို တယောက်နှင့်တယောက် လို အပ်သည်များ ကို ဖြည့်စွက်ဖေးမ ကူညီရင်းစည်းလုံးညီညွတ်စွာဖြင့် အနာဂါတ် မျိုးဆက်သစ် အင်ဂျင်နီယာ လူငယ်မောင်မယ်များကို လက်တွဲခေါ်ဆောင် သွားကြပါစို့ လို့ တိုက်တွန်းဆန္ဒ ပြုရင်း nml ရဲ့ ပထမဦးဆုံး ပို့(စ်) နဲ့သူငယ်ချင်းများကို စတင် မိတ်ဆက်လိုက်ပါတယ် ။

သင်ဆရာ၊မြင်ဆရာ၊ကြားဆရာ များကို ဦးထိပ်ထားလျက်

nml

မေမေပြောပြတဲ့ Management အကြောင်း

2009-11-07T10:46:00.003+08:00

အခုခေတ်နောက်ပိုင်းမှာ Management ဆိုတာ တော်တော်ကိုရေးပန်းစား လူသုံးများတဲ့ စကားလုံးဖြစ်လာတာ ကိုတွေ့ရပါတယ်။ တကယ်တော့လည်း စီမံခန့်ခွဲမှုဆိုတာ နေရာတိုင်းမှာ လိုအပ်သလို နေရာတိုင်းမှာ ရှိနေပါတယ်ပါတယ်။ ကျမတို့တွေဟာ မွေးဖွားလာချိန်ကတည်းကစပြီး အမေ့ရဲ့ စီမံခန့်ခွဲမှုအောက်မှာ ကြီးပြင်းလာကျရတယ်လို့ ‌ပြောရင် မှားမယ်လို့ မထင်ပါဘူးနော်.... Management ကို ပညာရှင်ကြီးများက အဓိပွာယ်အမျိုးမျိုး ဖွင့်ဆိုခဲ့ကျသလို ဆောင်းပါတွေ စာတမ်းတွေ စာအုပ်တွေ အမျိုးမျိုးထုတ်‌ဝေ ရေးသားထားတာကိုလည်း တွေ့ရပါတယ်။ Management အကြောင်းရေးသားထားကို ဘယ်လိုပုံစံနဲ့ပဲရေးရေး ဖတ်လို့ကောင်းသလို ပညာဗဟုသုတလည်း အများကြီးရပါတယ်။ ကျမကို ကိုသန့်ဇင်ဦးက Management အကြောင်းရေးပေးပါတဲ့ …ကျမတော်တော်လေးစိတ်ညစ်သွားတယ်၊ တကယ့်ပညာရှင်ကြီးတွေ ပုံစံအမျိုးမျိုးနဲ့ရေးသားနေကျတဲ့ Management ကို ကျမလို မိုးလင်းက နေမိုးချုပ် အလုပ်ထဲမှာပဲနစ်မြှပ်ပြီး ဘာစာပေဗဟုသုတမှလဲမရှိ စာဖတ်ချိန်လည်းမရှိ ကိုးကားစရာ စာအုပ်တွေကလည်း အဆင်သင့်မရှိ ၊ ရှာဖွေချိန်လည်းမရှိ၊ ရှိခဲ့ရင်တောင်မှလည်း ကျမလိုမဖြစ်ညစ်ကျယ် ညဏ်ကလေးနဲ့ဒီလို Management အကြောင်းကို ဘယ်လိုရေးလို့ ရမလဲနော်...ကိုသန့်ဇင်ဦးနဲ့တွေ့တိုင်းလည်း ဒါပဲတောင်းနေတယ်၊ ကိုသန့်ဇင်ဦး ကျမကိုနှိပ်စက်ပြီ… ကဲဘယ်လိုလုပ်ရပါ့မလဲနော်….စဉ်းစား…ကျမရဲ့ဦးနှောက်သေးသေးလေးနဲ့ စဉ်းစားရတာတောင်မလွယ်ဘူးနော်… ကျမတော်တော်စိတ်ညစ်နေပြီ…ကိုသန့်ဇင်ဦးနဲ့တွေ့မှာတောင်ကြောက်နေပြီ...အကြွေးမရရင်သူ့သာ တောင်းခိုင်း ရမှာသေချာတယ်…... :P လူနာအမဲ‌ခြောက်ဖုတ်တောင်းတာထက်တောင် ပိုဆိုးသေးတယ် တကယ် ပြောတာ မယုံမရှိနဲ့… ခလုပ်ထိတော့အမိတတဲ့…. ကျမစိတ်ညစ်တိုင်း ကျမမေမေကို သတိရတယ်လေ..အမေကိုချစ်တဲ့သူတိုင်း ဒီလိုပဲဖြစ်မှာ ပါပဲလေ….. မေမေ…ကျမရဲ့မေမေ…သိပ်ကိုတော်တဲ့ မေမေ..တကယ်‌ပြောတာ ကိုယ်အမေမို့လို့ပြောတာ မဟုတ်ဖူး မေမေကိုသိတဲ့သူတိုင်းက မေမေကတော်တယ်လို့‌ပြောတဲ့ကျမကို အပိုပြောတာမဟုတ်ဘူးဆိုတာကိုလက်ခံမှာပါ .. အခုတော့ကျမရဲ့မေမေကမရှိတော့ပါဘူး ၁၉၉၀ခုနှစ်အောက်တိုဘာလ ကဆုံးသွားခဲ့ပါပြီ…ကျမ စီပွားရေးတက္ကသိုလ် ပထမနှစ်ကို ၁၀ရက်ပဲတက်ရသေးတယ် ကျမရဲ့မေမေဟာ နှလုံးရောဂါနဲ့ဆုံးသွားခဲ့ပါတယ်။
ကဲ ကိုသန့်ဇင်ဦးရေ တခြား Management အကြောင်းကိုမရေးပေးတတ်တော့ ကျမတို့ မိသားစုမှာ ကျမမေမေရဲ့ Management အကြောင်းကို ပြောပြမယ်နော်…ကျမတို့မိသားစုမှာ ဖိုးဖိုးရယ် ဖွားဖွားရယ် ဖေဖေရယ် မေမေရယ် ကိုကိုရယ် မမရယ် ကျမရယ်ဆိုတော့ အားလုံး (၇)ယောက်ရှိတာပေါ့နော်…ကျမ မှတ်မိတဲ့အချိန်မှာတော့ ဖိုးဖိုးနဲ့ဖွားဖွားက ဘာမှမလုပ်တော့ဘူးလေ.. အသက် ၇၀ ကျော်သွားပြီဆိုတော့ ဖေဖေကဘာမှ မလုပ်ရတော့ဘူး ဆိုတော့…အငြိမ်းစားဖြစ်သွားကျပြီလေ...ဖေဖေကအစိုးရဝန်ထမ်းတစ်ယောက်ပါ၊ ကျမမှတ်မိနေပါတယ် ဖေဖေလခထုတ်ပြီးပြန်လာရင် မေမေ့ကို ပိုက်ဆံတွေအပ်ပါတယ်၊ အဲဒီအခါမှာ မေမေက ပိုက်ဆံလေးတွေကို ပုံပါတယ်၊ ဒါကဈေးဖိုး၊ ဒါကကျောင်းစရိတ်၊ ဒါက ဖိုးဖိုးနဲ့ဖွားဖွားအတွက်ဆေးဖိုး၊ ဒါကသာရေးနာရေးဆိုပြီး ပိုက်ဆံအိတ်လေးတွေ ထဲကိုခွဲပြီးထည့်ပါတယ်…
မေမေက ကျမတို့ကို အပြင်က အစားအစားတွေကိုဝယ်ကွေျးခဲပါတယ်၊ မေမေကိုယ်တိုင်ပဲအိမ်မှာချက်ကွေျးပါတယ် ဒီနေ့အိမ်မှာကြက်သားဟင်းချက်လျှင် မနက်ဖန်မနက်အစောစာကတော့ အုန်းနို့မပါတဲ့ခေါက်ဆွဲဟင်း ချက်မှာသေချာပါတယ်၊ ဒီနေ့ငါးဟင်းချက်ရင်တော့ မနက်ဖန်မနက်ကို မုန့်ဟင်းခါးပေါ့နော် ဝက်သား ချက်တဲ့နေ့ဆိုရင်တော့ တရုတ်ထမင်းကြော်စား ရပြီး ဆိတ်သားချက်တဲ့နေ့ဆိုရင်တော့ ပဲပြုတ်နဲ့ထမင်းကြော်စား ရပါတယ်… ဒါဟာပုံမှန်ပါပဲ… ကျမတို့မိသားစုက ဂျီးတော့မများကျပါဘူး… မေမေစီမံတဲ့အတိုင်းပါပဲ…မေမေကဟင်းချက်လဲကောင်း တယ်လေ.. မေမေဘာချက်ချက်အကုန်စားလို့ကောင်းတာကိုး ဒီတော့ဘယ်ဂျီးများမလဲနော်..ပြီးတော့မေမေက အကုန်လုံးလည်းချက်တတ်တယ်လေ…ကျမ ၁၀တန်းအောင်တော့ မေမေကိုယ်တိုင် ဒံပေါက်ချက်ပေးတယ်၊ အချိုပွဲ အတွက် ကျောက်ကျောကိုပုံစံမျိုးစုံ ထိုးပေးတယ်၊ အာလူးစနွင်းမကင်းလဲဖုတ်ပေးတယ်…
ကျမတို့မိသားစုမှာ ဖေဖေကအစိုးရဝန်ထမ်းဆိုတော့ ပိုပိုလှံျှလျှံကြီးမရှိခဲ့ပါဘူး..မေမေရဲ့စီမံမှုအောက်မှာ ကျမတို့မိသားစုဟာ ပိုတယ်ဆိုတာမရှိသလို၊ လိုတယ်ဆိုတာလည်းတစ်ခါမှမရှိခဲ့ပါဘူး…မေမေဟာမနက်ကို၅နာရီ ထိုးတာနဲ့ထပါတယ်၊ ပထမဆုံး ထမင်းအိုးတည်ထားပြီး ဘုရား‌ဝေယျာ‌ဝေစ္စကိုစလုပ်ပါတယ် ဆွမ်းကျက်တာနဲ့ ဆွမ်းတော်ကပ်ပြီးဘုရားရှစ်ခိုးပါတယ် ၆နာရီထိုးတာနဲ့ ကျမတို့ကိုနိုးပါတယ် ၊ ပြီးတော့မနက်စာစားဖို့ပြင်ဆင်ပါတယ် ၇နာရီထိုးတာနဲ့ မနက်စာကိုစားရပါတယ် မနက်စာစားနေရင်းနဲ့ ဖိုးဖိုးနဲ့ဖွားဖွားကို ဒီနေ့ဘာဟင်းစားချင် လဲမေးပါတယ် ၊ ကျမဖိုးဖိုးနဲ့ဖွားဖွားက ဖေဖေရဲ့အဖေနဲ့အမေဖြစ်ပြီး ထားဝယ်လူမျိုးတွေဖြစ်ပါတယ်၊ ကျမမေမေက ရန်ကုန်သူဆိုတော့ အစားအသောက်မှာ ဒေသကွဲတော့ နဲနဲစကား‌ပြောပါတယ်၊ ဒါပေမဲ့ ကျမမေမေက ဖိုးဖိုးနဲ့ဖွားဖွားကြိုက်တဲ့ ထားဝယ်ရိုးရာအစားအစာကိုလည်း ကောင်းကောင်းချက်တတ်ပါတယ်၊ ကျမဖွားဖွားက ပေါ်ဦးပေါ်ဖျားဆိုရင်အရင်ဆုံး စားရမှကျေနပ်ပါတယ် ၊ မစားရရင်မေမေကိုရန်လုပ်နေတတ်ပါတယ်….
၇နာရီခွဲတာနဲ့ မေမေကဈေးသွားပါတယ်၊ ကိုကိုနဲ့မမက စားပြီးသားပန်းကန်တွေဆေးရပါတယ်၊ ပြီးရင် ၈နာရီခွဲမေမေဈေးက ပြန်လာတဲ့အထိ စာကျက်ရပါတယ် ၊ပြီးရင်မေမေကကိုကိုနဲ့မမကို ၅ဝပြားဆီမုန့်ဖိုး ပေးပြီး ကျမကိုတော့ တစ်မတ်ပေးပါတယ် ပြီးတော့မေမေက ဈေးဝယ်လို့ပိုတဲ့အကြွေတွေအားလုံးကို ဇီးကွက်ရုပ် စုဘူးထဲကိုအကုန် ထည့်လိုက်ပါတယ်၊ ဒါဟာ မေမေနေ့တိုင်းလုပ်နေကျအလုပ်တွေပါပဲ…မုန့်ဖိုးရတာနဲ့ ကျမတို့ဟာလွယ်အိပ်ကိုယ်စီလွယ်ပြီး ကျောင်းသွားကျပါတယ်.. ၁၂နာရီကျောင်းကပြန်လာ တဲ့အချိန်မှာ မေမေဟာ ဖိုးဖိုးနဲ့ဖွားဖွားကို ထမင်းကွေျးပြီးပါပြီ၊ ကျမတို့ ရေချိုးဖို့ ပြင်ဆင်ပေးပါတယ်… ပြီးတော့ ၁၂နာရီခွဲတော့ ဖေ‌ဖေပြန်လာပါတယ်၊ ကျမတို့မိသားစု ထမင်းစားကြပါတယ်…ကျမကိုတော့ မေမေကခွံ့ကွေျးပါ တယ်၊ ကျမကရေချိုးပြီး အလှတွေပြင်ထားတာဆိုတော့ ပေကုန်မှာဆိုးလို့ မေမေကို့ခွံခိုင်းတာပါ၊ မေမေမခွံကျွေးရင် ကျမ က ထမင်းမစားဘူးဆန္ဒပြတယ်လေ၊ ကိုကိုနဲ့မမအပေါ်မှာထားတဲ့ မေမေရဲ့စည်းကမ်းတွေက ကျမနဲ့တော့ နဲနဲလျော့ရဲရဲနိုင်တာပေါ့နော်…၁း၁၅ ရောက်တော့ ဖေဖေကအလုပ်ပြန်သွားသလို ကျမတို့မောင်နှမ ၃ယောက်က ကျောင်းပြန်သွားရပါတယ်၊ ၄း၃၀ ကျောင်းဆင်းပြန်လာရင်တော့ မေမေ့ကိုသနားခါးအဖွေးသားနဲ့ အပေါက်ဝမှာကျမတို့ပြန်အလာကို ကြိုေနေတာတွေ့ရပါတယ် ကျမတို့မောင်နှမ ၃ ယောက်ဟာမေမေ့ကိုအလုအယက်‌ပြေးဖက်ကျပါတယ်၊ ကျမက မေမေ့ကို အရမ်းသဝန်တိုပါတယ် မေမေအနားကို ကျမတစ်ယောက်ထည်းပဲ ကပ်ချင်ပါတယ်... ဒါကိုသိတဲ့ ကိုကိုနဲ့မမက ကျမကိုအမြဲတမ်းစပါတယ်၊ မေမေကအဝတ်အစားလဲပေးပြီး ‌ပြောင်းဖူးလိုမျိုး ရာသီပေါ် သီးနှံ စာလေးဝယ်ထားတာကို ကွေျးပါတယ်၊ ကျမတို့ဟာ မုန့်စားရင်း ကျောင်းမှာဖြစ်ပျက်ခဲ့တာကို အလုအယက် မေမေကိုပြောပြပါတယ်၊ မေမေကလဲ သိချင်တာပြန်မေးလိုက် ကျမတို့ကလည်း‌ဖြေလိုက်နဲ့ ရေပက်မဝင်နိုင်အောင်ကိုပါပဲ၊ ဖေဖေပြန်လာတဲ့ ၅နာရီအထိပေါ့နေဲာ်…၆ နာရီထိုးတာနဲ့ ဖိုးဖိုးရောဖွားဖွားပါ မိသားစု စုံစုံညီညီ ညစာကိုစားရပါတယ်၊ ၇နာရီထိုးတဲ့အချိန်မှာတော့ မေမေနဲ့အတူ ကျမတို့မောင်နှမ ၃ယောက် ဘုရားရှစ်ခိုးရပါတယ်.. ဖိုးဖိုးနဲ့ဖွားဖွားကို ကန်တော့ရပါတယ် ဖေဖေနဲ့မေမေကို ကန်တော့ရပါတယ်၊ မေမေက ပညာတတ်သူဌေးမကြီးဖြစ်ပါစေလို့ ဆုပေးတဲ့အခါတော့ ကျမ အကြိုက်ဆုံးပါပဲ၊ ဒါပေမဲ့မေမေက အဲ့ဒီဆုကိုပေးခဲပါတယ် သူတော်ကောင်းတရား ပွားများအားထုတ်နိုင်ပြီး နိဗန်မဂ််ဖိုလ်ကိုရက်တိုတိုနဲ့ လျှောက်လှမ်းနိုင်ပါစေလို့ပဲ ဆုပေးတာ များပါတယ်… အဲဒါကြောင့်ထင်တယ်နော်.. မေမေက ကျမတို့နဲ ့အစောကြီးခွဲသွားရတယ်… ပြီးရင်တော့ ကျမတို့ စာကျက်ရပါတယ်၊ မေမေက စာကျက်ခိုင်းတယ် ပြန်ဆိုခိုင်းတယ်၊ အဲ့ဒီအချိန်ကတော့ ကျမအတွက်စိတ်အညစ်ဆုံးပါပဲ၊ ကျမရဲ့မျက်လုံးတွေက ဖွားဖွားကို ခဏခဏ လှမ်းကြည့်မိနေတယ်၊ ဖွားဖွားဘယ်တော့ခေါ်မလဲပေါ့နော်။ ၈နာရီထိုးတာနဲ့ ဖွားဖွားက အိပ်ဖို့ကျမကိုလှမ်းခေါ်ပါပြီ၊ ဒီအချိန်ဟာ မေမေနဲ့ဖွားဖွား စကားများတဲ့အချိန်ပါပဲ ကလေးစာမရသေးဘူး.. ၉နာရီမှ အိပ်ရမယ်လို့ မေမေ‌ပြောတဲ့အခါ ဖွားဖွားက ဂး၃၀ ရင်တော်ပြီ ဆိုပြီးဈေးဆစ်တတ်ပါတယ်၊ ကျမကအတန်းငယ်သေးတော့ မေမေကဘာမှမ‌ပြော တော့ပဲ ကိုကိုနဲ့မမကိုပဲမောင်းပါတော့တယ်၊ ကိုကိုနဲ့မမကတော့ ၁၀နာရီအထိစာကျက်ရတယ်တဲ့…
မေမေကကျောင်းပိတ်ရက်တွေမှာ ရုပ်ရှင်လည်းလိုက်ပြတတ်ပါသေးတယ်...စာကြီးပေကြီးတွေတင်မကဘူး အပျင်‌းပြေကာတွန်း ၀ထ္ထုစာအုပ်ု အကုန်ဖတ်ခိုင်းပါတယ်၊ ရုပ်ရှင်ကြည့်ပြီး စာအုပ်ဖတ်ပြီးပြီဆိုရင် မေမေ့ကို ပြန်ပြောပြ ရပါတယ် အဲ့ဒီအခါမှာ ကိုကိုက ယောကျာ်းလေးဆိုတော့ မင်းသားက ဘယ်လိုဖိုက်တင်ပလေးလိုက်တာ၊ လူဆိုးတွေကို ဘယ်လိုပြန်ချလိုက်တာ‌ ပြောတတ်သလို မမနဲ့ကျမ ကတော့ မိန်းခလေးပီပီ မင်းသမီးဝတ်တဲ့ အကျီင်္က ဘယ်လိုလှတာ၊ မင်းသမီးက ဘယ်လိုချောတာကိုပဲ‌ ပြောတတ်ပါတယ်၊ မေမေဟာ ကျမတို့ပြောတာကိုပြုံး ပြီး နားထောင်နေပြီးရင်တော့ မေမေက စ ပြောပါတော့တယ် ရုပ်ရှင်ကြည့်ရင်ပဲဖြစ်ဖြစ် စာအုပ်ဖတ်ရင်ပဲဖြစ်ဖြစ် ရည်ရွယ်ချက်ကဘာလဲ မင်းသား၊မင်းသမီးကဘဝကို ဘယ်လိုအောင်မြင်အောင်ကြိုးစားခဲ့သလဲ ၊ မိသားစုအပေါ် ဘယ်လိုအနစ်နာခံခဲ့သလဲ၊ ရန်သူအပေါ် ဘယ်လိုမြင့်မြတ်တဲ့စိတ်ထားနဲ့ တုန့်ပြန်ခဲ့သလဲဆိုတာကို ပြောပြပါတယ်...မေမေက ကျမတို့ကို ဘယ်တော့မှရန်ကိုရန်ခြင်း မတုံ့ပြန်ခိုင်းပါ၊ မေတ္တတာထား သည်းခံခိုင်းပါတယ်၊ နောက်ပြီးမေမေက ကျမတို့ကိုတစ်ခါမှ ရိုက်ပြီး မဆုံးမဘူးသလို နှုတ်နဲ့လည်း ကြမ်းကြမ်းတမ်းတမ်း မဆုံးမခဲ့ပါဘူးပါဘူး၊ မေမေဖြစ်ချင်တာကို လေအေးအေးနဲ့ပဲ ဆုံးမတတ်ပါတယ်၊ ဖြစ်ချင်တာနဲ့ ဖြစ်သင့်တာကိုလည်း အမြဲခွဲခြားပြောပြလေ့ရှိပါတယ်၊ မေမေကိုကြည့်ရမြင်ရတာ တကယ့်ကိုအေးချမ်းပါတယ်...
ဒီလိုနဲ့ပဲ တစ်ရက်ပြီးတစ်ရက် ကုန်ဆုံးလာခဲ့ပြီး၊ နွေရာသီကျောင်းပိတ်ရက်မှာ ကျမတို့မိသားစုကိုးကွယ်တဲ့ ဘုန်းကြီးကျောင်းမှာ အလှူလုပ်မယ်တဲ့ ကျမတို့ကရှင်ပြုနားသပြီးသားဆိုတော့ ရှင်မပြုနိုင်တဲ့ကလေးတစ်ယောက် ကိုရှင်ပြုပြီး ကျောင်းရေစက်ချပွဲတဲ့၊ အလှူဆိုတော့ ကျမတို့ပျော်တာပေါ့နော်…ပြီးတော့ ကျမတို့ကိုးကွယ်တဲ့ ဘုန်းကြီးကျောင်း က တောထဲမှာလေ၊ အရမ်းပျော်ဖို့ကောင်းတယ်၊ တောထဲလျှောက်သွားပြီး သ‌ပြေပန်းခူး၊ တောပန်းလေးတွေခူး၊ စမ်းချောင်းလေးမှာရေချိုး တစ်တောင်တက်လိုက် တစ်တောင်ဆင်းလိုက်နဲ့ အရမ်းပျော်ဖို့ ကောင်းပါတယ် ဒါပေမဲ့ မေမေက အလှူပြီးတာနဲ့ မေမေရှင်ပြုပေးတဲ့ ကိုရင်လေးနဲ့အတူတူ ကျမတို့မောင်နှမ ၃ယောက် တရားရိပ်သာမှာ တစ်လ တရားအားထုတ် ရမယ်ဆိုတော့ သိပ်မပျော်ချင်တော့ဘူး ဖြစ်သွားတယ်…
အလှူနေ့မှာတော့ မေမေမျက်နှာဟာကြည်လင်ဝင်းပနေတယ်၊ ဖေဖေကိုကြည့်ရတာကလည်း ကမာ္ဘပေါ်မှာကံ အကောင်းဆုံးလူလိုပဲ၊ ဖိုးဖိုးနဲ့ဖွားဖွားကလည်း ဒီလိုပဲ၊ အလှူလာကြတဲ့သူတွေကလည်း မေမေကိုချီးမွမ်းကျတယ် အရမ်းတော်တယ်တဲ့ ဖိုးဖိုးနဲ့ဖွားဖွားကိုလည်း ခွေျးမကောင်းရတယ်တဲ့၊ ဖေဖေကိုကျတော့လည်း မြင့်မြတ်တဲ့ပါရမီ ဖြည့်ဖက်တဲ့၊ ကျမတို့ကိုကျတော့ တကယ့်လမ်းပြကောင်းတဲ့ မိခင်ကောင်းတဲ့၊ ဘာ‌တွေ‌ပြောနေကျတာလဲဟင်၊ ကျမဘာမှနားမလည်ဘူးလို့ ကိုကိုနဲ့မမကိုမေးတော့ ကိုကိုနဲ့မမက ကျမကို ခေါ်သွားပြီးပြပါတယ် ခပ်လတ်လတ် အရွယ်ရှိတဲ့ ကမဌာန်းကျောင်းအသစ်လေး၊ မေမေဆောက်ပြီးလှူထားတာတဲ့၊ အင်းလေ ကျမသိတယ်လေ၊ အဲ့ဒါဘာဖြစ်လဲ ဆိုတော့ မေမေကအဲ့ဒီကျောင်းလေးကို ဈေးဖိုးပိုတဲ့အကြွေလေးတွေကိုစုပြီးဆောက်ထားတာတဲ့၊ အဲ့ဒီတော့မှ ကျမပါးစပ်ကလေး အဝိုင်းလိုက်ဖြစ်သွားပါတော့တယ်၊ ကျမမျက်စေ့ထဲမှာပြန်မြင်ယောင်လာပါ တော့တယ် မေမေ ဈေးကပြန်လာတိုင်း ကျောင်းဖွင့်တဲ့ရက်ဆိုကျမတို့ကို မုန့်ဖိုးပေးတယ်ပြီးတော့ ပိုတဲ့အကြွေလေးတွေကို ဇီးကွက်စုဗူးထဲထည့်တယ်၊ ကျောင်းပိတ်တဲ့ရက်ဆိုရင် ကျမတို့ကိုမုန့်ဖိုးမပေးတော့ပဲ ပါလာတဲ့အကြွေတွေကို အကုန်ထည့်လိုက်တယ်…အဲ့ဒီစုဗူးလေးကိုမေမေနှစ်သက်မှန်းသိတော့ ကျမအလိုမကျတိုင်း မေမေ့ကိုစိတ်ဆိုးတဲ့အခါတိုင်း အဲဒီစုဗူးကို တွန်းလှဲ ပစ်ထုတ်လုပ်တတ်ပါတယ်…ကျမ ငရဲကြီးမလားမသိဘူးနော်…
ဒီလိုနဲ့ပဲ ကျမ ၈တန်းနှစ်ရောက်တဲ့အခါမှာ မေမေကျန်းမာရေးဟာ ချို့ယွင်းလာခဲ့ပါတော့တယ် ၊ ဖိုးဖိုးနဲ့ဖွားဖွားကလည်း ကျမ ၆တန်းနှစ်မှာ ရှေ့ဆင့်နောက်ဆင့်ဆုံးသွားပါတယ်၊ ကျမ ၉တန်းနှစ်ရောက်တဲ့အခတာ့ မေမေဟာ တော်တော်လေးကိုပိန်လာပါပြီ ကျမတို့ကို သိပ်ပြီး မစီမံနိုင်တော့ပါဘူး၊ ကိုယ်တိုင် မလုပ်နိုင်တော့ပဲ နှုတ်နဲ့ပဲ စီမံနိုင်ပါတော့တယ် ဒါပေမဲ့ မေမေ့စီမံမှု အောက်မှာအသားကျခဲ့တဲ့ ကျမတို့မှာ မေမေမစီမံနိုင်လဲ မေမေစီမံသလိုပါပဲ၊ အငယ်ဆုံးဖြစ်တဲ့ကျမတောင် ထမင်းဟင်းကောင်းကောင်းချက်တတ်ပြီ မုန့်ဟင်းခါး၊ အုန်းနို့ခေါက်ဆွဲ အကုန်ချက်တတ်နေပြီဖြစ်လို့ မေမေဟာကျမတို့ထားခဲ့ပြီး တရာရိပ်သာကိုပဲ ဝင်နေပါတော့တယ်၊ တစ်ခါဝင်ရင် တစ်လကြာပါတယ်…ကျမတို့ကို ပညာကုန်သင်ပေးပြီး စိတ်ချရတဲ့ တစ်နေ့မှာတော့ မေမေဟာကျမတို့ကိုထားသွားပါတော့တယ်၊ ကျမတို့မိသားစုအတွက် စီမံခန့်ခွဲလမ်းညှွန်မှုပေးခဲ့တဲ့မေမေဟာ သူ့အတွက်လည်း ဘဝကူးကောင်းအောင်၊ သံသရာကောင်းအောင် ကုသိုလ်ကောင်းမှုတွေအဆက်မပြတ်လုပ်ခဲ့သလို၊ ဝိပဿနာတရားကိုလည်း တစ်ခါ ထိုင်ရင်တစ်လကို ရှစ်ကြိမ်တိုင်တိုင် တရားအားထုတ်သွားခဲ့ပါတယ်၊ နောက်ဆုံးအကြိမ်တရားရိပ်သာကို သွားတဲ့အခါမှာ မေမေဟာ အသက်ကိုတောင် ခဲရာခဲဆစ်ရှုသွင်းနေရတဲ့အချိန်ဖြစ်နေပါပြီ၊ ဒါပေမဲ့ ရှစ်ပါးသီလ ကိုနိုင်အောင်ထိန်းပြီး တစ်လကို ရအောင်တရားအားထုတ်သွားခဲ့ပါတယ်…
မေမေအခုဆိုရင် မီးမီးက အရာရှိတစ်ယောက်ဖြစ်နေပါပြီ စက်ရုံက Production ကောင်းအောင် Operation Ratio ကောင်းအောင် စီစဉ်ညှွန်ကြားနေရပါတယ်၊ မီးမီးလက်အောက်မှာရှိတဲ့ ဝန်ထမ်းတွေရဲ့ဘဝ ကျန်းမာပျော်ရှွင်အောင် ၊ အလုပ်ခွင်မှာပျော်ရှွင်စွာ လုပ်အားအပြည့်သုံးနိုင်အောင် မီးမီးတာဝန်ယူထမ်းဆောင် နေရပါတယ်၊ မေမေသင်ပေးခဲ့တာတွေအားလုံးကို မီးမီးတတ်ခဲ့ပါတယ်မေမေ… ဒါပေမဲ့ တစ်ခုတော့မတတ်ဖူးဖြစ် နေတယ်မေမေ… အဲ့ဒါတော့ မေမေ‌ခြေရာကိုလုံး၀မနင်းနိုင်တဲ့ မီးမီးရဲ့ညံ့ဖျင်းမှုပါပဲမေမေ… မီးမီးဝန်ခံပါတယ် မေမေ...မေမေ့သမီးဖြစ်ပြီး မလုပ်နိုင်တာကိုလဲ ရှက်မိပါတယ်မေမေ၊ မေမေကဖေဖေရဲ့လခလေးနဲ့ မီးမီးတို့ မိသားစု ၇ယောက်ရဲ့ စားဝတ်နေရေး အားလုံးစီမံခန့်ခွဲနိုင်တဲ့အပြင် ဈေးဖိုးပိုတဲ့အကြွေလေးတွေစုပြီး တရားထိုင်တဲ့ကမဌာန်း ကျောင်းလေး ဆောက်ပြီးလှူနိုင်ခဲ့တယ် နော်… အခု မီးမီးမှာ လခတွေအများကြီးရနေပြီလေ၊ မေမေလို ပေါ်ဦးပေါ်ဖျားမစားရရင်၊ အစားအသောက်ဂျီး များတဲ့ ဖိုးဖိုးနဲ့ဖွားဖွားလို တာဝန်ယူစရာလည်းမရှိဘူး၊ နောက်ပြီး မေမေလို ကျောင်းစရိတ်တွေထောက်ပံ့ပေးရတဲ့ သားသမီးတွလည်း မီးမီးမှာမရှိဘူး၊ သီတင်းကျွတ်ရယ် မီးမီးမွေးနေ့ရယ်မှာ ဖေဖေကိုကန်တော့တာကလွဲလို့ ဖေဖေကို မီးမီးတာဝန်မယူရဘူး၊ မီးမီးလခကို မီးမီးတစ်ယောက်ထဲပဲ သုံးနေရတယ် မေမေရဲ့… အခုမီးမီလခတွေ အများကြီးရနေပြီလေ…ဒါပေမဲ့ မေမေလို ကမဌာန်းကျောင်းလေးဆောက်ပြီး မလှူနိုင်ဘူး…ပြီးတော့ မေမေ ရှိတုန်း ကလို တရားရိပ်သာသွားပြီး တရားအားမထုတ်နိုင်ဘူး… မေမေကို မီးမီလခတွေ အပ်ချင်ပါတယ်မေမေ၊
မီးမီးဆီကို ခဏလေးဖြစ်ဖြစ် ပြန်လာခဲ့ပါလား မေမေ… မီးမီးရဲ့လခလေးတွေအပ်ချင်လို့ပါ၊ ခဏလေးဖြစ်ဖြစ်လာပြီး မီးမီးရဲ့ လုပ်ခလစာလေးကို အကျိုးရှိရှိ စီမံခန့်ခွဲပေးပါအုံးမေမေရယ်…..မီးမီးရဲ့အသက် ၁ဝနှစ်ကိုနှုတ်ယူပြီး မေမေ့အသက်မှာ ၁နှစ်ပေါင်းပေးမယ်ဆိုရင်လည်း အားရဝမ်းသာစွာနဲ့ကျေနပ်ပါတယ်မေမေ...ဒီလိုမျိုးဘယ်သူလုပ် ပေးနိုင်သလဲဆိုတာ မီးမီးကိုပြောပြပါ မေမေ၊ မီးမီးအတွက် မေမေက အရမ်းကိုလိုအပ်နေလို့ပါ၊ သူများတွေကိုတော့ စီမံအုပ်ချုပ်ေနေပြီး ကိုယ့်ကိုကိုယ်လဲ ဘယ်လိုစီမံအုပ်ချုပ်ရတယ်ဆိုတာ မီးမီးကို ခဏလေးလာပြီး စီမံညှွန်ကြားပေးပါအုံးမေမေရယ်......

မမမီးမီး

Reference Image : http://www.ipuzzlebiz.com